[Mediyaananko gajanŋe]
31
Tunka Duumanten daali Muusa da ti : 2 « Tanbon tuga Mediyaananko yi Banisirayilaganko da. Gajanŋen ɲeme falle, an na daga abadansaxu kafiini an seron ŋa. » 3 Muusa jaabi jaman danŋa : « Sero yogo nan bogu axa yi, i na i gajanyokkun wutu, nan daga Mediyaana gaja, kuudo nan tanbutuge Tunka Duumanten da Mediyaana kanma. 4 Banisirayilaganko xabiilanu ku su, xabiila su wujune yugo, an na i wara dagana gaja. » 5 Wujune yugo sagare bakka xabiila su yi kuŋa. Isirayila wujununjaatu ku su kafumanto, wujunu tanmi do fillo kurayugo ya n bogu. 6 Xabiila su wujune, Muusa da i xayi dagana kuren ŋa do sadaxakiɲandaana Lajaari renme Pinaasi batten ŋa, yokki sennun do xibarindibuutunun xibaaren na aken ya maxa dagana gajannoqun ŋa. 7 I xenu Mediyaanankon ŋa na i gaja xoyi Tunka Duumanten ga da Muusa ɲaamari moxo be ; i da yugon su kari. 8 I da Mediyaana tunkanyugun kari kafiini i seri karinton ŋa, kun ga ni : Heewi, Lexeemu, Suuru, Huura, Reeba, ku ni Mediyaana tunkanun karagi ya. Ken do Booro renme Balaamu, i da a xa kari ti kaafan ŋa.9 Banisirayilaganko da Mediyaana yaxarun do i renmun wutu komo yi, na i tanmison wutu, na i nan do i fo siren su wutu, kun ni laxanloxonaaburen ya. 10 I ga ɲi taaxunu debu beenu yi, a do i dabbaayu, i da a su buyi ti yinben ŋa. 11 I da laxanloxonaaburen su wutu, i da seren xa su raga, kafiini daaban su yi. 12 I da laxanloxonaabure ke do seri raganto ku su wutu, i do i ri katta Muusa do sadaxakiɲandaana Lajaari yi, a do Banisirayilaganko jama, kun gaa daaxan ŋa Mowaaba ɲiiɲanbaayanmen ŋa, Yaradefanŋe kutan ŋa Yeriiho banŋe. 13 Muusa do sadaxakiɲandaana Lajaari, kafiini jama ke yinmankon su yi, i bogu daaxan ŋa nan daga gemu i ya. 14 Kurunyinmanko ku riyinto gilli gajannoqun ŋa, wujununsapo ku do kamansapo ku yinmanko, Muusa butu i wure. 15 A ti : « Yaala axa da yaxaren su toxo bireene ya ba ? 16 Taawoonen ga xenu Tunka Duumanten jaman ŋa Poora yi, a sababun kite ku ya yi mene, Balaamu digaamen ya n da i janba Banisirayilaganko yi, ma i gaa Tunka Duumanten kutana. 17 Saasa kuŋa, xa da ren yugon su kari, yaxare su gaa yugon tu saxa yi, xa da a su kari. 18 Xa yaxare su ga n roxo, a ga nta yugunsaqe tu, kun nan ɲa axa xallu yi.
[Gajanfallen senoye]
19 « Xa daaxe daaxan falle bito ɲeri, axakun beenu su ga da sere kari, do axakun beenu su kati seri karinte yi ; bita sikkandin do bita ɲerundin ŋa, axa do axa komon na du senondi. 20 Begin su, a do faten su, a do fo be su ga dabari ti suguyinten ŋa, ken do yokke su ga ni sollen ya, xa da i senondi. »
21 Ku yugu beenu ga daga kure ke yi, sadaxakiɲandaana Lajaari ti i danŋa : « Tunka Duumanten ga da Muusa ɲaamari ti sariyan farilaaxu be yi, a faayi ke : 22 “ Kanŋen do xaalisixulle, a do jaxawallen do mexenbinne, kafiini mexexayen do godonxaye, 23 fo wo fo su ra gaa roono yinben ŋa ya, xa da a ro yinben ŋa, a na seno. Xa ken do fi su, a senoono ti ji sennen xa yi ya. Fo wo fo ra ga nta roono yinben ŋa, axa n xawa ken roono jin ya yi. 24 Xa na axa yiraamun wanqi bita ɲerundin ŋa, axa na seno ; ken falle, axa na ro daaxan ŋa. ” »
[Laxanloxonaaburen taxandinde]
25 Tunka Duumanten daali Muusa da : 26 « Sadaxakiɲandaana Lajaari wutu, kafiini jama ke yinmankon su. Laxanloxonaabure ke be su ga rage, gelli sere katta daaba, xa na a su jaate. 27 An na ken fo ragante taxandi fillo yi kuren dagaanon do jaman kutten su naxa. 28 Kuranlenmo ku beenu ga da gajanŋen dabari, an na taqe wutu bakka i maxa yi Tunka Duumanten da, kamo karagi seri ragante su, seri baane ; nan do tanmisen do fare, kamo karagi su, baane. 29 Axa na ke wuttu bakka i taxandixallen ya yi, an na i kini sadaxakiɲandaana Lajaari yi, Tunka Duumanten xallitaqen ya ni. 30 Banisirayilaganko xallitaqu ku, an na seri baane wutu bakka tankarage su yi, daaban kutten su wa ken moxo yi : nan do faren do tanmise, an na i kini Leewikaarankon ŋa, i be siginton gaa do Tunka Duumanten allanbatika yiranman gollun ŋa. »
31 Tunka Duumanten ga da Muusa ɲaamari moxo be yinme yi, Muusa do sadaxakiɲandaana Lajaari da a ɲa ken moxo ya yi. 32 Kuranlenmon do fo be ga ri, ken ɲa kamo tunmi do tanɲere wujune, a do wujunu karagi tanmise, 33 na, tanɲere do wujunu filli, 34 fare, tandume do wujunu baane, 35 ken do haadamarenme, yaxaru be ga nta yugunsaqe tu, tanjikke do wujunu filli yaxanne.
36 Ku beenu ga bogu dagana kuren ŋa, i taxandixallun jaaten gemu kamo sikki do tanjikke wujune, a do wujunu ɲeri do kamo karagi tanmise. 37 Tunka Duumanten xalli taqen jaaten gemu kamo tunmi do tanɲere, a do tanmiso karagi. 38 Nan jaaten gemu tanjikke do wujunu tunmi, Tunka Duumanten xalli taqen ɲa tanɲere do naanu filli. 39 Faren ni tanjikke wujune, a do kamo karagi fare, Tunka Duumanten xalli taqen gemu tandume do baane. 40 Seri siginten ni wujunu tanmi do tunmu, Tunka Duumanten xalli taqen gemu tanjikke do sero filli.
41 Ke be ga ni Tunka Duumanten xalli taqen ŋa, Muusa da a kini sadaxakiɲandaana Lajaari yi, xo Tunka Duumanten ga da Muusa ɲaamari moxo be. 42 Muusa ga da Banisirayilaganko xallitaqe be kini i ya, 43 a gemu kamo sikki do tanjikke wujune, a do wujunu ɲeri do kamo karagi tanmise (337 500), ken ni jaman taxandixallen ya. 44 Nan gemu tanjikke do wujunu tunmi (36 000), 45 faren ni tanjikke wujune, a do kamo karagi (30 500) fare, 46 ken do wujunu tanmi do tunmu (16 000) seri siginte. 47 Banisirayilaganko xallitaqu ku, Muusa da baane baane wutu bakka tankarage su yi, seren do daaba, na i kini Leewikaarankon ŋa, kun be siginton gaa ti Tunka Duumanten allanbatika yiranman gollun ŋa, xo moxo be Tunka Duumanten ga da Muusa ɲaamari.
48 Kurunsapo ku yinmankon tinko Muusa yi, wujununsapon do kamansapon yinmanko, 49 i ti a da : « An xidimaanon da kuranlenmon jaaten wutu, ku beenu ga ɲi o kandan noxon ŋa, hari seri baane ma sanku bakka i ya. 50 Ken kuŋa, sere su ga da fo be kita, kanɲaagaaru : xo surunmu, godonlenmu, doronmo, torunlonŋu, jellu, o do i ri katta Tunka Duumanten ŋa allankuyu yi, kuudo nan xafarigeesimuuri o da Tunka Duumanten jon me naxa. » 51 Muusa do sadaxakiɲandaana Lajaari da kanŋe ke yokki dabarinten su wutu, a su ɲegunten ya ni. 52 I ga da ke kansadaxa be su wutu bakka wujununsapo ku yinmankon do kamansapo ku yinmankon maxa Tunka Duumanten da taqe yi, a jaaten gemu tannaxate do wujunu ɲeri a do komo karagi (47 500) menqalle. 53 Kurayugu ku, baane su da laxanloxonaabure duran wutu du da. 54 Muusa do sadaxakiɲandaana Lajaari ga da kanŋe ke raga wujununsapo ku do kamansapo ku yinmankon ŋa bire be, i do a ro genmanlenmaaxuntilliisen ŋa, ken ni sinmandindifo ya Banisirayilaganko danŋa Tunka Duumanten jon me naxa.