30
Muusa da xibaaren su ko Banisirayilaganko da, xo moxo be yinme Tunka Duumanten ga da a ɲaamari.[Tekku]
2 Muusa digaamu Banisirayilaganko xabiilan yinmankon da : « Tunka Duumanten ga da a ɲaamari ke be yi, ken ya faayi ke : 3 yugo be nda tegu Tunka Duumanten da, ma a ga na kunaye kuna, na fo lajami du kanma, a n maxa i diganxannen guruja de ; fo wo fo ga bogu a raqen ŋa, a wa ken dabarini.
4 « “ Yaxanne ga na tegu Tunka Duumanten da, ma a ga na fo lajami du kanma, na a ɲi a finna i faabankan ya yi a ma yaxi, 5 faaben xa da a teguxanne ke do duulajaminde ke mugu, a toxo kuurunu a ma sefe renme ke da, ken bire ke, tekke ke do duulajamindifo ke su wa sabatiini. 6 Xa ganta, selli faabe ke ga na teguxanne ke do duulajamindifi ke mugu, a ga xosi renme ke kaba a koota su yi, ken bire a teguxanne ke do duulajaminfi ke su ntaxa sabatiini. Tunka Duumanten wa yanpana a maxa, baawo faaben ya n da a kaba.
7 « “ Teguxanne ke do duulajamifi ke be ga duguta a yi, a ga da i soomon bogu me na a ko, a do a ga ro kiinanka yi, 8 koota be kiinen ga na a mugu, a ga ma a kaba ken koota yinme yi, a ga kuuru a kanma, yaxare ke teguxannen do a duulajamindifo ke be a yinme ga tegu ti a yi, ma a ga da a lajamindi du kanma, i sabatiini ya. 9 Xa selli kiinen ga da a mugu, a ga da a kaba a koota yinme su yi, tekke ke guruje bakka a kanma, duulajamindifo ke xa be ga duguta a yi, a yinme ga da i soomon bogu me yi na a ko, ken xa xenu bakka a kanma, Tunka Duumanten wa yanpana a maxa.
10 « “ Xa wundunbaare, ma yaxarinwarante, i teguxannen do i duulajamindifin su sabatiini i kanma ya. 11 Selli yaxare ga na tekke wutu kiinankan ya yi, ma a ga na fo lajamindi du kanma, 12 kiinen da a mugu, xa a toxo kuurunu a maxa, a ma a kaba, ken bire teguxannen su sabatinten ya ni, a ga da fo wo fo xa lajamindi du kanma, ken sabatiini ya. 13 Xa selli kiinen ga na a guruja a mugikoota yinme, ken bire, hari fo be ga bogu yaxare ke yinme soomonfaton naxan ya yi, gelli tekke, ma fo lajaminde i du kanma, ken ntaxa sabatiini. Kiinen da a guruja, Tunka Duumanten xa yanpa a maxa.
14 « “ Teguxanne su ma kunaxanne su gaa riini ti duukabanden ya yi bakka fo yogo yi, kiinen ra wa ken maxafakka, a ra wa a gurujana xa. 15 Xa selli kiinen ga na kuuru a kanma bogobogo gelli koota ma a men koota, ken ŋa a da tekke ke do duulajamindifi ke su sabatindi yaxare ke kanma ; a da i sabatindi ya, baawo a ga da a mugu koota be, a toxo kuurunu a kanma ya. 16 Xa selli a ga na i guruja i mugikootan dangi falle ya, a da yaxaren garamajigingollen likken tiŋa de ! ” »
17 Ku ya ni farilanun ŋa Tunka Duumanten ga da Muusa ɲaamari ti i ya taŋeene yugon do i yaqen ŋa, a do faabe do renyaxare be gaa yaxannaaxun ŋa finna taaxunu i faabankan ŋa.