Yuusawu
Roraqe
Banisirayilaganko ga da Kanaana jamaanen raga na a foyaaxu, Yuusawu kitaaben digaamunu ken ya kanma, ken da a ɲi Yuusawu ya na Banisirayilagankon geesunu. Aken ya ni annabi Muusa battamaxen ŋa.
Kitaabe taxandinten na taxandu filli ya. Taxandi fanan wa a wuttu soora fanan ŋa katta soora tanmu do fillandi. Ken digaamunu Kanaana jamaanen rageyen ya kanma, ken do Banisirayilaganko ga da Yaradefanŋe kara, Alla da i deema gajan gabu yi. I da Yeriiho deben raga. Kaawafi gabu ɲaŋi, i da Gibooni gajanŋen waalen wutu. Xa bire be Banisirayilaganko ga da saratin sooxi i do Alla naxa, Haayinko da i ni gajanŋen ŋa. Ke su na taxandi fana ke noxon ya.
Kitaabe ke taxandi fillandin na a wuttu soora tanmu do sikkandin ya yi katta tanpille do naxatandin ŋa. Ken gaa sefene fiinu beenu kanma, kun ni : Ɲiiɲen ga taxandi Banisirayila xabiilanun tanmi do fillon naxa, na a saxu Alla ɲaamariyen kanma Leewikaarankon ga ma duranɲiiɲe kita, na a sababun ɲa ikun ga ni sadaxakiɲandaanon ŋa. Ikun taaxunton na do debu ya yi, i ga nta me kanma, fo wa yere, fo wa dooke. Alla yinme ya n da ken ko Yuusawu da, ti a na xaliifedebu taaxundi, Sere be nda sere kari futuxiyen ŋa, a na daga xaliife kun debu du baananbe yi.
Faare ma ɲi Yuusawu do Alla naxa, a na xibaarun wuttu Alla yinme ya maxa, na i kiɲandi Banisirayilagankon jaman ŋa. Yuusawu da Banisirayilaganko kuralli ta gabe, na i buttun xotondi xa, kuudo i n sabati liimaanagankaaxun ŋa Alla kanma. Saado Yuusawu gaa Faatini, a da a ko Banisirayilagankon jaman da nan ti :
« Xa sugandindi lenki axa gaa ke be batta...xa nke ken do n ka ke, oku na Tunka Duumanten ya batta. » (24.15)
Xibaari xooro beenu gaa kitaabe ke noxo
Na a wutu soora fanan ŋa katta soora tanmu do fillan ŋa, ken digaamunu Kanaana jamaanen rageyen xibaaren ya kanma.
Na a wutu soora tanmu do sikkandin ŋa katta soora tanpille do baanandi, ken digaamunu Kanaana ɲiiɲen taxandiyen ya kanma.
Soora tanmu do sikkandin digaamunu Yaradefanŋe kinbakkanɲiiɲen ya kanma.
Na a wutu soora tanmu do naxatandin ŋa katta tanmu do kabundi, ken digaamunu Yaradefanŋe kinxennanɲiiɲen xibaaren ya kanma.
Soora tanpillendin digaamunu xaliifedebun ya kanma.
Soora tanpille do baanandin digaamunu Leewikaarankon debun ya kanma.
Kinxennan taaxaanon saageye katta i noqu, soora tanpille do fillandin digaamunu ken ya kanma.
Yuusawu ga da i wasuxan lagaren kini, nan faati, soora tanpille do sikkandin do tanpille do naxatandin digaamunu ken ya kanma.