Yuusawu
[Kanaana Ragande]
[Kanaana royen moxosironde]
1
Tunka Duumanten kome Muusa faatiyen falle,
Tunka Duumanten daali Muusa xidimandaana Nuunu renme Yuusawu da :
2 « N kome Muusa faati.
Saasa ke,
giri,
an do Banisirayilaganko na ke Yaradefanŋe kundu kara katta jamaane ke be in gaa kinni i ya.
3 Axa tanbekkon ga tayi noqu su yi,
n wa a kinni axa yi,
xoyi n ga da a ko Muusa da moxo be.
4 Na a wutu gelli gunjura ke yi banboxun ŋa,
a do ke Libaano kundu yi saahelin ŋa,
a do fan xoore ke,
Furaata fanŋe kinbakkan ŋa,
Heetigankon jamaanen danman su,
a do geeji xoore,
kiyen taŋeeran ŋa,
ken ɲaana axa ɲiiɲen ya yi.
5 An birantaaxu ke wuce,
sere ra nta sikki an wure.
N wa ɲaana do an batten ŋa,
xoyi n ga ɲi do Muusa yi moxo be :
n nta an sedde,
n nta an walla xa.
6 Duruxoto,
an nan saako,
baawo n ga sape i faabanu da ti ɲiiɲe ke be yi,
an ya na a kinni i ya.
7 Duruxoto tannu,
an nan saako moxo siri.
N kome Muusa ga da an kooma ti sariyanu ku beenu yi,
an na i tanga kuudo na i ɲa.
Teleŋo tannu,
maxa teyigankaaxu,
maxa noogigankaaxu,
ken ŋa an ga na daga dingira su,
an wa wulluliŋontaaxunu.
8 Ke Sariya kitaaben nan maxa bogu an raqen ŋa,
an na toxo a mullin koono wuron do kiyen su yi,
kuudo an na golli ti fo wo fo safanten gaa a yi,
ken bire ya ni an na wulluliŋontaaxu,
an fiinun na tinme.
9 Xoyi n ma an ɲaamari ti an nan duruxoto,
an nan saako ?
Maxa kanu,
an nan maxa jooti,
baawo an ga daga noqu su,
Tunka Duumanten wa do an batten ŋa,
an Alla. »
[Yuusawu ɲaamarinde jaman yinmankon ŋa]
10 Yuusawu ti jaman yinmankon da :
11 « Xa ro do daaxan ŋa,
nan ti jaman da :
“ Xa da silifandanun gemundi du da,
baawo yere do bito sikki,
axa wa kareene ke Yaradefanŋe kundu yi,
kuudo na jamaanen kamanaaxun wutu,
jamaane ke be axa Alla gaa a kamanaaxun kinni axa yi,
Tunka Duumante. ” »
12 Rubeenikaarankon do Gaadikaaranko,
kafiini Manaasekaara taxande,
Yuusawu jaabi kun da ke moxo yi nan ti :
13 « Xa sinme do digaamen ŋa,
Tunka Duumanten kome Muusa ga da axa ɲaamari ku be yi,
nan ti :
Tunka Duumante axa Alla,
a da axa tuumandi ya,
a ga da ku jamaanu kini axa yi.
14 Ayiwa,
xa yaxaru,
leminu,
naaburu,
i wa toqo ke jamaane be Muusa ga da a kini axa yi Yaradefanŋe da ke kuta yi.
Ayiwa axakun kuralen xoto yinmenu su,
axa sapon nan dangi axa waaxinun kaane,
na i deema,
15 ma Tunka Duumante axa Alla ga na axa waaxinun xa tuumandi xoyi axa moxo,
na jamaanen kamanaaxun kini i xa yi.
Ken falle,
axa na saage katta Tunka Duumanten kome Muusa ga da jamaane be kamanaaxun kini axa yi Yaradefanŋe kinbakkan ŋa. »
16 I ti Yuusawu danŋa :
« An ga da o ɲaamari fo wo fo yi,
o wa ken ɲaana,
an ga na o xayi noqu su xa yi,
o wa telle.
17 Xoyi o ga da Muusa terinka fiinun su yi moxo be,
o na an xa terinkana ken moxo ya yi.
Ma Tunka Duumante,
an Alla ga ɲa do an batten ŋa,
xoyi a ga ɲi do Muusa yi.
18 Sere wo sere ga na muruti an ɲaamariyun ŋa,
an gaa o kandana fiinu ku beenu yi nan bara an sefexannun terinkana,
a kaman kalla ya.
Iyo,
anken ken nan duruxoto tannu,
an nan saako ! »