Yuusawu 2

[Kanaana sonsolonde]

Nuunu renme Yuusawu da yugu filli mullin xayi gilli Sitiimu yi nan ti : « Axa daga, axa na jamaanen faayi, a do Yeriiho. » I daga. I ri sangaana yaxare yogo kan ŋa, a toxon ga ni Lahaabu. I saxu non ŋa. 2 A koni Yeriiho tunkanyugon da nan ti : « Sero yogonu faayi ga ri yere yi wuro roye, gelli ŋa, kuudo na jamaanen fiinun jaga. » 3 Yeriiho tunkanyugon da faaren xayi Lahaabu yi kuŋa, nan ti : « Ku yugu beenu ga ri katta an ŋa, i bagandi. Ku beenu ga ri an ka ke yi, i ri kuudo na jamaanen fiinun ya jaga. » 4 Yaxare ke da yugu ku filli wutu kuŋa, na i muxundi, ken falle a ti : « Ken yinme ya ni, yugu ku filli ri in ŋa baadi, xa in nta i tu, minnanko ni. 5 Xo biten ga na ro, [bulunlaxaxooren] baafi xooren gaa soxeene, i bakka ya. Inke ken ma yugu ku daganoqu tu. Xa sukke do i ya karama, axa nan rage i ya ! »

6 Aken xa yinme ya n da i segendi xuben kanma na i muxundi i sasinselebi saxunton wure yi xube ke kanma yi. 7 Sero ku da i fanpa taŋene juben killen ŋa. Fanpandaanon bogu falle do i batten ŋa, baafi xooren soxe. 8 Saado I gaa saqa tannu, a sege katta i ya xube ke kanma. 9 A ti yugu ku da : « In da a tu ti Tunka Duumanten da jamaane ke kini axa yi, xaaxantaaxun nan xosi xenu o yi, jamaanen seren su nan xosi jikkirankuti axa kaane yi kundu ! 10 Baawo o da a mugu, axa bogunton ŋa Misira yi Tunka Duumanten ga da jin kaawandi bakka axa kaane ŋa, a do axa ga da fo be ɲa Hamoorikaarankon tunkanyugun filli yi, Yaradefanŋe kutan ŋa, Sihoona do Wooga, axa ga da i ɲamallexu moxo be. 11 O da ken mugu ; o buttun kuti. Sere yonki ntaxa saakono axa kaane, baawo axa Alla, Tunka Duumante, a ya ni kamanen ŋa kanmun ŋa, a do wureedun ŋa ɲiiɲen kanma. 12 Saasa ke, axa kuna in da ti Tunka Duumanten ŋa, baawo in da siroyen ɲaŋi axa da, axa xa na a me siroye ɲaŋi in faabankaadunkon da, axa na daliilu xulle kini in ŋa, 13 nan ti axa wa in ma do in faaba toqo bireene, a do in waaxi yugun do in waaxi yaxaru, a do fo wo fo ga ni i mareefo yi, axa wa o yonkinun kisiini kallen ŋa. » 14 Yugu ku ti a da : « O yonkinun do axa yonkinun ya n tikkiti me yi. Xa ganta, an nta ke digaame laxamini de. Tunka Duumanten ga na jamaane ke kini o yi, o wa siroono an da, tinmeye yaaxe maxa. »

15 A da i yanqandi ti kacen ŋa falle yi ti palanteerin ŋa, baawo a kan kariini tegeyinbinnen ya yi, aken taaxunten na tegeyinbinne ke ya yi. 16 A ti i danŋa : « Axa daga giden ŋa, fanpandaanon nan maxa rege axa yi, axa na bito sikki ɲa muqu non ŋa, ma fanpandaano ku ga na yille, ken falle axa na daga. » 17 Yugu ku ti a da : « Oku baarinton ya ni bakka o kunaye ke be o ga da a kuna an da, 18 o wa jikki a siren ni ya ; o ga na ro jamaanen ŋa, an na ke murufingaari dunbe siiti an palanteeri be an ga da o yanqandi ti a yi. An na an ma do an faaba do an faaba kaadunkon su do an waaxinun kafu du yi an kan ŋa. 19 Ayiwa i be su ga na an ka ke ganlaqe kutu nan bogu sellan ŋa, a kaman foron na a yinme ya yi de ! Oku baarinton ya ni ken bire. Na i be su toxo an ka ke xa noxon ŋa, kitte ga na kiɲe a kaman ŋa, ken foron na oku ya yinmun kanma ken bire. 20 Ayiwa an ga na o da ku digaamun laxami xa, ah, ken bire oku baarini bakka o ga da kunaye be kuna an danŋa yi ya de ! » 21 A ti i danŋa : « Axa ga da a ko moxo be, a nan ɲa kundun ŋa. » A da i wara kuŋa, i daga. A da murufi dunbe ke siiti palanteerin ŋa.

22 I daga nan ri giden ŋa, nan taaxu non ŋa bito sikki, ma fanpandaanon gaa saagene. Fanpandaano ku da i mundu do killen muuman su yi, xa i ma i kita. 23 Yugu ku filli yanqa gilli giden ŋa nan kare, nan ri Nuunu renme Yuusawu yi. Fo wo fo ga da i kita, i da a su jaate a da. 24 I da a ko Yuusawu da nan ti : « Tunka Duumanten da jamaanen danman ro o kittun ŋa, ayiwa xaaxantaaxun xenu jamaanen taaxaanon su yi o kaane. »