Yuusawu 3

[Yaradefanŋe karande]

Yuusawu furute gilli Sitiimu yi suxuba fanan ŋa nan ri ma Yaradefanŋe|Yarade, a do su. I wuyi non ŋa saado i gaa kareene. 2 Bita sikkandin ŋa, jaman yinmankon da daaxan wura, 3 na jaman ɲaamari ti : « Axa ga na Tunka Duumante, axa Alla wutunten wari maxa, kun ga ni Leewikaarankon ŋa, axa na janbandi gilli axa batten ŋa, nan sukke do a yi. 4 Ken moxo yi, axa wa killen tuunu, axa ga n xawa telle ti a yi, baawo axa ma ɲi killu ku tu nan xaso. Xa, axa nan laato bakka a yi, na wujunu filli sogone me toxo axa do a naxan ŋa, axa maxa tinko a yi de ! »

5 Yuusawu ti jaman da kuŋa : « Xa da du senondi, baawo xunbane Tunka Duumanten na kaawafin ya ɲaana axa jon me naxa. » 6 Yuusawu da a ko sadaxakiɲandaanon danŋa nan ti : « Xa da laayidunwaxanden wutu, axa nan dangi jaman kaane. » I da laayidunwaxande ke wutu nan dangi jaman kaane.

7 Tunka Duumanten daali Yuusawu danŋa : « Lenki ke koota, n wa an daronden jopana Isirayila su jon ŋa, kuudo i na a tu ti in wa ɲaana do an batten ŋa, xoyi in ga ɲi do Muusa yi moxo be. 8 Saasa ke, sadaxakiɲandaano beenu gaa laayidunwaxanden wuttu ɲaamari, nan ti, i ga na ri ma Yaradefanŋe jinlaqun ŋa, i n xenpe non ŋa jin noxo. »

9 Yuusawu ti Banisirayilaganko da : « Xa tinko yere, axa na Tunka Duumanten daalen mugu, axa Alla. 10 Axa wa a tuunu ti Allaŋalinten wa axa kaaran ŋa. A wa Kanaanagankon kumana kunamaxen ŋa axa danŋa xa, a do Heetigankon do Hiiwikaarankon do Perijinun do Girigaasikaaranko, a do Hamoorikaarankon do Yebuusikaaranko. 11 Ken ni ya : duna muuman Kaman laayidunwaxanden faayi, a gaa kareene axa kaane Yaradefanŋe yi. 12 Saasa kuŋa, xa da yugu tanmi do fillo sagara bakka Isirayila xabiilanun ŋa, xabiila su yugu baane baane. 13 Sadaxakiɲandaano ku beenu duna su kaman Tunka Duumanten waxanden wutunten gaa i maxa, i tandegerun ga na ro Yaradefanŋe jin ŋa, wura ke be gaa yanqana gilli kanmun ŋa, a wa sikki noqu baane, nan tageyi me kanma. »

14 Bire be jaman gaa janbandini gilli i tilliisun ŋa na Yaradefanŋe kara, sadaxakiɲandaano ku beenu laayidunwaxanden wutunten gaa i maxa, i na jaman kaane ya. 15 Ken da a ɲi sanjaanen waxatin ya ni, fanŋen gaa ŋaamini. Laayidunwaxanden wutundaanon ga ri ma Yaradefanŋe yi, sadaxakiɲandaano ku ga da i taanun filli dopa Yaradefanŋe jin ŋa tan, 16 jinwuran xosi kuti, nan sege-sege me kanma xo tageyi baane, gelli laatoyen ŋa katta Hadaama deben gaa Saritaani kaaran ŋa, a do ke be gaa yanqana katta guufuren xaaren ŋa, ken ga ni Sapinxaare, a kuti lewu ; jaman kare Yeriiho jonkonmen ŋa. 17 Sadaxakiɲandaano, i ya ga ni Tunka Duumanten laayidunwaxanden wutundaanon ŋa, i taanun sigi kaawayen ŋa Yaradefanŋe noxo. Ken di, Isirayila su kare kaawayen ŋa, ma koren su gaa dugutana kareene Yaradefanŋe yi.