Yuusawu 4

[Sinmeyingidu]

Bire be koren su ga kare yi nan duguta, Tunka Duumanten daali Yuusawu da nan ti : 2 « Xa da yugu tanmi do fillo wutu jaman ŋa, xabiila su yugu baane baane, 3 na i ɲaamari ti : “  taanun gaa sigira ke be yi, xa da gidu tanmi do fillo wutu, xa do i nan kare do du yi. Axa ga na wuyi noqu be, xa na i yanqandi axa wuyiran ŋa. ” »

4 Ken moxo yi kuŋa, Yuusawu da yugu tanmi do fillo xiri gilli yi, xabiila su yugu baane baane. 5 Yuusawu ti i da : « Xa dangi Tunka Duumante axa Alla kaane katta Yaradefanŋe noxon ŋa, yugu baane su na gide saxu i kunken ŋa, Banisirayila xabiilanun jaate, 6 kuudo kun na ɲa taagumansu yi axa naxan ŋa, axa renmun ga na axa tirindi xunbane nan ti : “ Manne xa gidu ni ku yi axa maxa ? ” 7 axa na ti i danŋa : “ Yaradefanŋe jin ga taxandi Tunka Duumanten laayidunwaxanden kaane, kun ya gidu ni ku yi kundu : sinmaado ya ni Banisirayilaganko da abada. ” »

8 Banisirayilaganko da ken ɲa xoyi Yuusawu ga da i ɲaamari moxo be yi : i da gidu tanmi do fillo wutu Yaradefanŋe noxon ŋa, xoyi Tunka Duumanten ga da a ko Yuusawu da moxo be, Banisirayilaganko xabiilanun jaate, i do i kare do du yi katta i wuyiran ŋa, i da i yanqandi non ŋa.

9 Sadaxakiɲandaano, i ya ga ni laayidunwaxanden wutundaano, Yuusawu da gidu tanmi do fillo sigindi i taanun sigiran wure Yaradefanŋe noxon ŋa, i wa non ŋa ma lenki ke koota. 10 Sadaxakiɲandaanon be laayidunwaxanden gaa i maxa, i sigi Yaradefanŋe noxo, ma karayen gaa dugutana, xoyi Tunka Duumanten ga da Yuusawu ɲaamari moxo be nan ti a nan digaamu koren da, xoyi moxonu beenu Muusa ga da Yuusawu ɲaamari. Koren kare karaman ŋa.

11 Jaman danman su ga duguta kareyen ŋa bire be, Tunka Duumanten waxanden kare, sadaxakiɲandaano ku wa jaman kaane. 12 Rubeenikaarankon do Gaadikaarankon kare Banisirayila kaane, i kurunkitte maxa, kafiini Manaasekaara taxanden ŋa, xoyi Muusa ga da a koni i da moxo be. 13 Tannaxate wujune kuranlenma ya moxo sironten nan dangi Tunka Duumanten kaane, gajanŋen xanne maxa katta Yeriiho guufurunbayanmen ŋa. 14 Ken koota Tunka Duumanten da Yuusawu daro Isirayila su yaaxon ŋa. I kanu a yi, xoyi i ga kanu annabi Muusa yi moxo be a birantaaxun wucen su yi.

15 Tunka Duumanten daali Yuusawu da kuŋa nan ti : 16 « An na sadaxakiɲandaano ku beenu seedaaxunwaxanden wutunten gaa i maxa ɲaamari ti : i nan sege bakka Yaradefanŋe yi. » 17 Yuusawu da sadaxakiɲandaanon ɲaamari nan ti : « Xa sege bakka Yaradefanŋe yi. » 18 Sadaxakiɲandaano ku segento gilli Yaradefanŋe noxon ŋa, Tunka Duumanten laayidunwaxande ke wutundaano, i tandegerun wutunton katta doŋan ŋa, Yaradefanŋe saage i batten ŋa nan sutundi xoyi waxati danginte ke moxo.

19 Jaman sege bakka Yaradefanŋe yi xasu fanan tanmun ya yi, nan yanqa Giligaali yi, Yeriiho kinbakka, nan daaxe non ŋa. 20 Ku gidu tanmi do fillo be i ga da i wutu Yaradefanŋe yi, Yuusawu da i sigindi Giligaali yi. 21 A jaabi Banisirayilaganko da nan ti : « Axa renmun ga na i faabanu tirindi xunbane nan ti : “ Manne xa gidu ni ku ? ” 22 axa na i tuyindi nan ti : “ Ɲiiɲa kaawanten ya ni Isirayila ga kare ti a yi ke Yaradefanŋe yi. 23 Tunka Duumante, axa Alla da Yaradefanŋe kaawandi axa kaane, ma axa jaman gaa dangini, xoyi aken Tunka Duumante, axa Alla ga da jin ɲa moxo be, a ga da a kaawandi o kaane, ma o gaa kareene. 24 Ken ya ni duna su na a tu, nan ti Tunka Duumante, axa Alla, senbenten ya ni, ken maana, axa na kanu Tunka Duumanten ŋa duna kooton danmon su yi. ” »