Ruuti
[Toora xoore be ga da Yelimeleexi koren kita]
1
Waxati be kiitikutaanon¤ ga ɲi fankan ŋa Isirayila, dullen kutundi jamaanen noxon ŋa. Ken ya ni, Beeti-leheeminke yogo do i xojidunken do i ren yugun filli giri Yehuuda maran ŋa, nan daga taaxu Mowaaba ¤ jamaanen mara siren ŋa katta waxati ya. 2 Yugo ke toxon ni Yelimeleexi, a xojidunken toxon ni Nayoomi, ren yugu baanen toxon ni Mahalooni, baanen xa toxon ni Kiliyooni; i ni Hefuraati soxoodi yogo ya yi, i gaa Beeti-leheemi deben ŋa, Yehuuda maran ŋa. 3 I taaxen noxon ŋa Mowaaba, Yelimeleexi faati, Nayoomi do i ren yugun filli toxo.4 Ren yugu ku filli xojidunkon ni Mowaabanka yaxarun ya yi : yaxarin baanen toxon ni Woripa, baanen toxon ni Ruuti. I da siino tanmi me ɲa non ŋa. Ken falle, 5 ren yugu ku filli xa bono, Mahalooni do Kiliyooni. Nayoomi ɲa wundunbaare yi, a kaagun yugon do a renmun su faati falle.
[Ruuti daga do Nayoomi batten ŋa Beeti-leheemi]
6 Na Nayoomi toxo Mowaaba, a da a mugu ti yideyen ri i kaara, ɲaaxamon kite. Ken ya ni, a da i moxo sirondi, a do i kallu yaxarun filli, nan saage katta Yehuuda jamaanen ŋa. 7 I gaa killen ŋa katta Yehuuda yi, 8 Nayoomi ti i kallu yaxarun danŋa : « Baananbe su nan yille katta i faaba kan ŋa. Axa ga siro nke do kallaano ku danŋa moxo be, Tunka Duumanten|Tunka Duumante gan siroono axa danŋa ken moxo yi ! 9 Tunka Duumanten na kiine kini axa baananbe su yi, na xeeri ɲa axa danŋa axa kiinankan noxon ŋa ! » Ken falle, a do i kallu yaxarun filli sare me yi na i falle koyi i ya, kallu yaxaru ku xosi wuruge 10 nan ti a danŋa : « Aayi ! O do an dagana doome ya katta an xabiilan ŋa. » 11 Nayoomi yille tini : « N ren yaxaru, xa saage katta axa kaara yi. Axa ra na riini do in batten ŋa kan moxo ? N xaso, n ra ntaxa renmu saarana keeta, i ra ga axa saagandini. 12 Xa daga axa banŋen ŋa. Xa saage ! N xaso buru yaxu danŋa. Hari n gan tini : “ Jikke wa in danŋa nan yaxi wuro ke yinme, n gaa ren yugu saarana ”, 13 yaala axa ra wa terinkeene ma kun ren yugu gan xooro ba ? Yelli axa wa duŋeene nan toxo yaxanbalinu yi ba ? Aayi, n renmu, ken ra nta ɲaana ! Tunka Duumanten da nke ya tanpindi, axa sunoye be gaa in ŋa, a nan kasafu. » ¤
14 Kallu yaxarun filli tallan sonqo. Lagarundin ŋa, Woripa do i kallu yaxaren sare me yi nan daga, xa Ruuti ma duŋe booxene bakka i kallu yaxaren ŋa. 15 Nayoomi ti Ruuti danŋa : « An gubudon faaga yille katta i xabiilan do i munon ŋa. An xa nan saage katta an banŋen ŋa xoyi a moxo. » 16 Xa Ruuti ti : « Maxa mali in ŋa ti in nan booxe bakka an ŋa, n nan saage katta in banŋen ŋa. An gaa dagana noqu be, n dagana non ya yi; an gaa taaxunu noqu be, n taaxunu non ya yi. An seron wa ɲaana in seron ŋa, an Alla wa ɲaana in Alla yi. 17 An ga na kara noqu be, n kalla non ya yi, n buliini non xa ya yi. Tunka Duumanten gan na bone xenundi in ŋa, selli kallen baane ya ga ma in do an fata su ! » 18 Nayoomi ga da a wari ti Ruuti mali toqen ŋa do i batten ŋa, a da a wara.
19 I daga doome ma Beeti-leheemi. I riyen ɲa kaawafi ya non seron su danŋa. Yaxarun ti : « Ee ! Nayoomi ! » 20 Nayoomi ti i danŋa : « Xa maxa in xiri xadi ti “ Nayoomi ”,¤ ganta xa da in xiri ya ti “ Mara ”,¤ baawo Raniyaanan da in sondonjoxi buru. 21 N foogumunman ya n giri yere nan daga, xa Tunka Duumanten da in riiti, n kitti duuro. Ken ya ni, xa maxa in xiri xadi ti “ Nayoomi ”, baawo Raniyaanan da i falle koyi in ŋa na in yanganxata. » 22 Kundun ya ni Nayoomi do i kallu yaxare Ruuti Mowaabanke ga ri nan giri Mowaaba jamaanen ŋa. I riyen gemu yillifateyen jope biren ya yi Beeti-leheemi.