Yuusawu 24

[Laayidun sabatinde Sixemu yi]

Yuusawu da Isirayila xabiilan su kafu me yi Sixemu yi, na Isirayila xirisun xiri, a do a yinmanko, a do a kiitaano, do a fiigumu, i su hadari Alla jon ŋa.

2 Yuusawu ti jaman danman su da : « Ke moxo saanan ya ni Tunka Duumante Isirayila Alla ga daali : “ Axa faabanu ɲi taaxunu Furaatafanŋe da ken kuta ya yi, Teera, annabi Ibirahiima faaba, a do Nahooro faaba, i ɲi alla tananun ya batta. 3 In da axa faaba Ibirahiima wutu fanŋen ken kuta yi, na a yiilandi do Kanaana jamaanen su yi. In da a funtifo gabo, na annabi Isiyaaxa kini a yi. 4 In da annabi Yaaxuba do Yesaawu kini Isiyaaxa yi, na Seyiri gidinjamaanen kini Yesaawu yi kuudo a na a xaye. Yaaxuba ken kuŋa, a do i renmun yanqa Misira yi.

5 « “ In da annabi Muusa do xayi, n ga da ke be ɲa Misira noxon ŋa, n da a katu ti ken ya yi, ken falle na axa bagandi. 6 In da axa faabanu bagandi Misira yi, axa ri ŋa. Misiranko do siinun do wotoronun da axa faabanu fanpa ma Xulunjuumu fanŋe. 7 I sonqo inke Tunka Duumante yi ; in da bitanbinnen wara axa do Misiranko naxa. Geejin ri i kanma, i yoole. Axa yinme yaaxen da a wari, ke be in ga da a ɲa Misiranko yi. Axa taaxu gunjuran ŋa wucu gabu.

8 « “ In da axa riiti Hamoorikaarankon jamaanen ŋa, i taaxunton gaa kutan ŋa. I do axa gaja ; in da i ro axa kittun ŋa. Axa da i jamaanen foyaaxu ; in da i buruxa axa kaane. 9 Ken falle, Mowaaba tunkanyugo Balaaxi giri, Cipooro renme, na Isirayila gaja. A xayindi na Booro renme Balaamu xiri, a na axa langa. 10 In ma duŋe Balaamu terinkana, a duwa nan duwa axa danŋa, n da axa kisi Balaaxi yi.

11 « “ Axa da Yaradefanŋe kara nan ri Yeriiho. Yeriiho kamannu do axa gaja, Hamoorikaarankon do Perijinu, Kanaanaganko, Heetiganko, Girigaasikaaranko, a do Hiiwikaarankon do Yebuusikaaranko. N da i ro axa kittun ŋa. 12 N da jaamen ya xayi i da axa kaane, a na Hamoorikaarankon tunkanun filli xata bakka axa kaane ; an kaafa fe, an bundanŋe fe. 13 In da jamaane kini axa yi, axa ga ma tanpi a yi, nan taaxu debu yi, ku beenu axa ga ma i taga. Axa wa reesenun do jayituunanun yigana, na a ɲi axa ma i lori. ”

14 « Saasa kuŋa, axa kanu Tunka Duumanten ŋa, axa na a batu tinmeye do xalasiye yaaxe maxa. Tonŋun tonŋu, xa da du saagandi bakka kamanenu ku beenu axa faabanu ga ɲi i batta Furaatafanŋe dan ken kuta yi, a do Misira. Axa na Tunka Duumanten batu. 15 Xa selli na Tunka Duumanten batu ga n ŋariɲa axa yaaxon kaane, axa na a mulla na ko batu kuŋa, xa sugandindi lenki axa gaa ke be batta : selli allanu ku beenu axa ga ɲi i batta Furaatafanŋe ken kuta yi ya ga ni, ma Hamoorikaaranko ku allanun ya ga ni, axa gaa taaxunu jamaane ke be yi, xa nke ken do n ka ke, oku na Tunka Duumanten ya batta. »

16 Jaman da a jaabi nan ti : « Na Tunka Duumanten wara alla tananu batiyen da, hari na ken laatondi oku yi ! 17 Baawo Tunka Duumanten ya ni oku Alla yi, a ya n da oku do o faabanu segendi bakka Misira jamaanen ŋa gelli komon konpen ŋa. A da ku kaawafi xooro kundu dabari o jon ŋa. A da o tanga do kille be su o ga da a tera, a do o ga da jama be su naxan booxo. 18 Tunka Duumanten da jamon su xata gilli o kaane, ken do Hamoorikaaranko ku be gaa taaxunu jamaanen ŋa. Hari oku xa na Tunka Duumanten ya batta kooyi, baawo a ya ni oku Alla yi. »

19 Yuusawu ti jaman da : « Axa ra nta katta Tunka Duumanten batta, baawo Alla sennen ya ni, aken ni suuxaanan ya, a nta dangini axa kuteyun do axa futuxiyun ŋa. 20 Axa ga na Tunka Duumanten wara na alla sagatanto batu, a na saage fo buren ɲaana axa yi, na axa ɲamallexu siroyen ɲanŋen falle axa danŋa. » 21 Jaman ti Yuusawu da : « Ken fe, oku na Tunka Duumanten ya batta. » 22 Yuusawu ti jaman da : « Axa yinmenu ya n seedene axa du da, nan ti axakun da Tunka Duumanten ya sugandi axa du da, axa gaa a batta. » I ti : « O seede. » 23 « Ayiwa saasa ke, axa nan warandi bakka alla sagatanto ku beenu gaa axa noxon ŋa. Xa na axa sondomun taaxu Tunka Duumanten ŋa, Isirayila Alla. » 24 Jaman ti Yuusawu da : « O na Tunka Duumanten ya batta, o Alla, o na a ya xannen terinkana xa. »

25 Yuusawu da laayidun wutu jaman da ke koota yi kundu. A da farilanun do kiitun kini a yi Sixemu. 26 Yuusawu da ku digaamu kundu safa Alla sariyankitaaben ŋa. A da gidi dinka wutu, na a sigindi non ŋa allanyitten wure, Tunka Duumanten sennaaxun dingiran ŋa. 27 Yuusawu ti jaman danman su danŋa : « Ke gide faayi kundu, a ɲaana seedaana ya yi ti o yi, baawo a mugi ti Tunka Duumanten daale be su a ga da a daali o da. A wa ɲaana seeda yi ti axa yi, kuudo axa n maxa daga nakkari ti axa Alla yi. » 28 Ken dangi falle, Yuusawu da jaman wara, baane su ɲa ti i taqen ŋa.

[Yuusawu faatiye]

29 Ku fiinu kundu su falle, Tunka Duumanten kome, Nuunu renme Yuusawu, a faati, na a wuyin toxo kame do siino tanmi. 30 I da a bulu Timinata-seera yi, a taqikutiyen noxo, ken gaa Hefarayimu gidinjamaanen ŋa, Gaasa giden saaheli. 31 Isirayila da Tunka Duumanten batu Yuusawu kiyun danmon su yi, a do seri xason kiyun danmon su, ku beenu ga hadari Yuusawu falle, i beenu gaa Tunka Duumanten fo ɲaŋunton su tu, a ga da i ɲa Isirayila danŋa.

32 Yuusufu xottu ku beenu Banisirayilaganko do i ga sege gilli Misira yi, i da i bulu Sixemu yi, Yaaxuba ga da te be xobo Sixemu faaba Hamooro renmun ŋa kame godoxulle. Ken ɲiiɲe ɲa Yuusufukaarankon taqe yi.

33  renme Lajaari xa faati, i da a bulu i renme Pinaasi deben ŋa Gibeeya, ke be ga kini a yi Hefarayimu gidinjamaanen ŋa.