Yuusawu 23

[Yuusawu digan lagare Banisirayilaganko da]

Wucu laatu ɲaŋi ken falle, Tunka Duumanten ga da yangandi gelli i xonnon danmon su yi, i yoorindan ŋa, xasoyen ri Yuusawu yi moxo siri. 2 Yuusawu da Isirayila su xiri, a xirisu, a yinmanko, a kiitaano, a do a fiigumu. A ti i da : « Nke ke, xasoyen ri in ŋa keeta ti in siinon ŋa. 3 Axa yinmenu kun da a wari Tunka Duumante, axa Alla ga da ke be su ɲa ke jama kundu yi axa da, baawo a yinme ya n gaja axa da. 4 Xa da a wari, n da ku jama kuttu kundu xenundi axa da ti taqe kininden ŋa axa xabiilanun ŋa gelli yi, ken do xabiilanu beenu su in ga da i xoso gelli geeji xooren ŋa kinxenna. 5 Tunka Duumante, axa Alla yinme wa i yontono gilli axa kaane, na i fontanŋaaxu axa kaane. Axa na i jamaanun foyaaxunu xo Tunka Duumante, axa Alla ga da a ko axa da moxo be. 6 Xa da duruxoto moxo siri, axa nan tangandi annabi Muusa sariya safanten danman su maxa, a do nan golli ti a yi : xa nan maxa miile bakka i ya tayen ŋa, a do noogen ŋa. 7 Xa maxa ro ke jama kundu be gaa kafiini axa yi. Xa maxa finkoŋi ti i allanu toxonun ŋa, xa maxa kuna ti i ya, xa maxa i batu, axa nan maxa du maxayanqa i da. 8 Xa, axa nan tuuge ti Tunka Duumanten ŋa, axa Alla, xoyi axa ga da a ɲa moxo ke be yi ma lenki ke koota. 9 Tunka Duumanten da jama xooro fontanŋaaxu bakka axa kaane, a do senbento. Sere ma katu sikki axa kaane hari ke lenki yi kundu. 10 Axa du baananbe su ra wa wujune faraxatunu, baawo Tunka Duumante, axa Alla ya n gajanŋa axa da, xoyi a ga da a ko axa da moxo be. 11 Xa da axa yinmenu tanga moxo siri, na Tunka Duumanten xanu, axa Alla. 12 Baawo, axa ga na saage yilleene, nan mali ke jama kutte kundu be faayi ga toxo kafiini axa yi, na i yaxanlenmaaxu, i xa ga da axa yaxanlenmaaxu, 13 ken bire keeta de, xa da a tu de nan ti Tunka Duumante, axa Alla ntaxa ke jama kundu fontanŋaaxunu axa kaane yi xadi de ! I riini ɲaŋi axa danŋa kopan ya yi, a do sellequ, a do jaanu axa segon ŋa, nan ɲa saasun ŋa axa yaaxon ŋa, ma i ga na n xosi axa buruxa bakka ke ɲiiɲa sire kundu kanma yi, Tunka Duumante axa Alla ga da ke be kini axa yi.

14 « Inke ken faayi dagana lenki ti duna su killen ŋa. Axa da a tu ti axa sondomun do axa yonkinun danmon su yi, nan ti digan baane ma xenu bakka digan siru beenu Tunka Duumante axa Alla ga da i daali axa xibaaren kanma. A su ri axa da. Digan baane ma xenu bakka i ya. 15 Moxo ke be Tunka Duumante, axa Alla digan siru ku danmon beenu su a ga da i digaamu axa da, ken moxo baane ya ni Tunka Duumanten gaa digan buren xa riitini axa da, ma a ga na n da axa buruxa bakka ku ɲiiɲa siru kanma, Tunka Duumante axa Alla ga da ku beenu kini axa yi. 16 Axa ga na xenperandangi Tunka Duumanten laayidu ke be a ga da xa ɲaamari ti a yi, axa Alla, nan daga kamanenu tana batu, nan sujudi i da, Tunka Duumanten butten yanganxatan wa axa ragana ; axa na karamanburuxe bakka ɲiiɲa sire ke be ga kini axa yi. »