Yuusawu 22

[Yaradefanŋe kinbakkankutandunkon saageye katta i kaara]

Ken bire keeta Yuusawu da Rubeenikaarankon xiri, a do Gaadikaaranko, kafiini Manaasekaara fonlaqi taxanden ŋa, 2 nan ti i danŋa : « Axa da ke be su Tunka Duumanten kome Muusa ga da axa ɲaamari a yi tanga, axa da in xa xannen mugu ti in ga ɲaamarindi axa maxa ti fo wo fo yi. 3 Gelli siini gabu keeta nan ri a wara lenki ke koota yi, axa ma axa waaxinun wara ; axa da tangefon tanga gelli Tunka Duumanten ɲaamarindixannun ŋa, axa Alla. 4 Saasa ke, Tunka Duumante, axa Alla da axa waaxinun deejendi, xo moxo be a ga da a ko. Keeta ke, xa daga axa tilliisun ŋa, katta axa ɲiiɲa maranto beenu Tunka Duumanten kome Muusa ga da i kini axa yi kutan ŋa. 5 Ganta tannu, xa na ɲaamarindixannun do sariyan tanga moxo siri na i golli, sariya be annabi Muusa ga da axa ɲaamari ti a yi, Tunka Duumanten kome, kuudo na Tunka Duumanten xanu, axa Alla, na a liŋun su tera, a do na a ɲaamarindixannun su tanga, do an nan tigiti a yi, nan golli ti axa sondomun su yi, a do axa yonkinun su yi. »

6 Yuusawu duwa i da na i wara, i nan daga i tilliisun ŋa. 7 Manaasekaara xabiila taxande ke, Muusa da taqe kini i ya Basaani yi ; taxandi baane ke kuŋa, Yuusawu da i ku kafiini i waaxinun ŋa Yaradefanŋe dan ken kuta yi kinxennan ŋa. Ken bire Yuusawu da i wara dagana i tilliisun ŋa, nan duwa i danŋa. 8 A da a koni i da nan ti : « Axa do bannaaxun fo gabe, xa saage katta axa tilliisun ŋa, a naaburu siginten gabi-gabe, kafiini kanŋen do xaalisin ŋa, a do jaxawallen do mexenbinne, yiraamen gabi-gabe. Xa da axa xonnon kittidufoonun taxandi me yi kafiini axa waaxinun ŋa. » 9 Rubeenikaarankon do Gaadikaaranko, a do Manaasekaara xabiila taxande, i saage, nan giri ŋa Silo be gaa Kanaana jamaanen ŋa, kuudo nan daga Gilaadi jamaanen ŋa, i duudanɲiiɲe be i ga da a foyaaxu Tunka Duumanten ɲaamariyen kanma yi ti annabi Muusa faarannaaxun ŋa.

[Allanbatira tageye Yaradefanŋe falle]

10 I ri Yaradefanŋe Gelilooti be gaa Kanaana jamaanen ŋa. Rubeenikaarankon do Gaadikaaranko a do Manaasekaara xabiila taxande, i da allanbatira taga Yaradefanŋe yi non ŋa, batira dinka ya ni yaaxo kaane. 11 Banisirayilaganko da a mugu, ti Rubeenikaarankon do Gaadikaarankon do Manaasekaara xabiila taxanden faayi ga da batira taga, Kanaana jamaanen jonkonmen ŋa katta Yaradefanŋe Gelilooti yi, katta Banisirayilagankon kutan ŋa. 12 Banisirayilagankon ga da ken mugu, i da Banisirayilagankon jaman su kafu me yi Silo, nan setu i xanne maxa, kuudo na i gaja.

13 Banisirayilagankon da sadaxakiɲandaana Lajaari renme Pinaasi xayi katta Rubeenikaarankon do Gaadikaarankon do Manaasekaara xabiila taxande ke yi Gilaadi jamaanen ŋa ; 14 yinmanko tanmi wa do a batten ŋa, xabiila su seri baane-baane, fonlaqe su yinmanki baane, Isirayila xabiilanfaabanun su. 15 I ri Rubeenikaarankon do Gaadikaarankon do Manaasekaara xabiila ke taxanden ŋa Gilaadi jamaanen ŋa na a koni i da ti : 16 « Tunka Duumanten jaman danman su da ku ya ko : “ Axa ke miileye xa ni axa da man ŋa, axa ga miile ti Isirayila Alla yi, nan fallakoyi Tunka Duumanten ŋa lenki ti allanbatira taganden ŋa axa du da, nan muruti Tunka Duumanten maxa lenki ? 17 Xoyi Poora yangon nan roxo o da ya ba ? Ke be o ma seno bakka a yi hari ke lenki, a guman gaa finne Tunka Duumanten jaman kanma ! 18 Lenki kuŋa, axakun saage yilleene bakka Tunka Duumanten ŋa ! Lenki, axa ɲa murutaano yi a maxa, a xa wa riini butu katta Isirayila jaman danman su yi xunbane. 19 Ken kuŋa jamaane be gaa axa xallaaxun ŋa sobinten ya ga ni, axa kare katta jamaane be gaa Tunka Duumanten xallaaxun ŋa, Tunka Duumanten sabati noqu ke. Axa xa nan fogumaaxu o noxon ŋa. Xa maxa muruti katta Tunka Duumanten ŋa ; oku xa be ga ni, xa maxa muruti katta o yi ti batira taganden ŋa axa du da, a ga feti Tunka Duumanten batiran ŋa, o Alla. 20 Yaala Jeera renme Haxanna ma sooxindi roono haraamen ŋa ba, yanganxatan ga saxu Isirayila jaman danman su kanma ? Sere baane ma halaki wo ! ” »

21 Rubeenikaarankon do Gaadikaaranko kafiini Manaasekaara xabiila taxandi baane ke, i da Isirayila xabiilanu ku xirisun jaabi kuŋa nan ti : 22 « Alla, O Alla, Tunka Duumante, Alla, O Alla, Tunka Duumante, a wa a tu, Isirayila xa wa riini a tu ! Selli murutiyen ya ga ni, ma selli duntenfuyintaaxun ya ga ni katta Tunka Duumanten ŋa, o gan na nta kisi lenki ke koota yi ; 23 batiran taganden ŋa o du da kuudo nan saage yillene bakka Tunka Duumanten ŋa, ma selli o ga da sadaxa xuruminte sadaxi a kanma yi, a do allatiigeyinsadaxa yi, walla ma na allatiigeyinsadaxa ɲi a kanma yi, Tunka Duumanten gan na o tirindi a yi ! 24 Xa ken fe ! Jooten ya n da o wara ku ɲanŋen ŋa, nan ti xunbane axa renmu wa a koono o renmun da nan ti : “ Man na axakun do Tunka Duumanten naxa, Isirayila Alla ? 25 Tunka Duumanten da Yaradefanŋe ke kini o yi ginge, oku do axakun Rubeenikaaranko naxa, a do Gaadikaaranko. Taqe nta axa maxa Tunka Duumanten ŋa. ” Axa renmun na ri o renmun saagandi bakka Tunka Duumanten kannen ŋa. 26 O ti kuŋa : “ A daga o da, o na batira dabari o renmun da, sadaxa xuruminte yaaxooni fe, sadaxanu tana xa fe ; 27 ken ni na fon ya seedannaaxu a gaa oku do axakun naxa, a do o fonlaqu, kuudo na Tunka Duumantengollen golli a yinme jon ŋa ti o sadaxa xuruminton do o allatiigeyinsadaxa ŋa, a do allankuyu tana. Ken kuŋa axa renmun nta tini o renmun da xunbane : ‘ Man na axakun do Tunka Duumanten naxa ? ’ ” 28 O ti, selli xunbane i nda ke ko o da, a do o konponlaqun da, o na ti : “ Tunka Duumanten batira ke sawuran yinme ya faayi ke kundu be o faabanu ga da a dabari, sadaxa xuruminte do sadaxo sadaxinde danŋa fe, ke ni na fon ya seedannaaxu, fo be gaa o do axa naxa. ” 29 Oku nan muruti katta Tunka Duumanten ŋa, nan saage yilleene bakka Tunka Duumanten ŋa lenki ti batira taganden ŋa, sadaxa xuruminten do allatiigeyinsadaxa do sadaxon tana sadaxinden ŋa, a ga feti Tunka Duumante, o Alla sadaxindinoqu be gaa a jon ŋa, hari na ken laato o yi ! »

30 Bire be keeta sadaxakiɲandaana ke, Pinaasi do jaman yinmanko, kafiini Isirayila xabiilan yinmankon ŋa ga da ku digaamu beenu Rubeenikaarankon do Gaadikaarankon do Manaasekaarankon ga da i ko mugu, ken liŋo i da. 31 Sadaxakiɲandaana Lajaari renme Pinaasi ti Rubeenikaarankon do Gaadikaarankon do Manaasekaarankon da : « O da a tu lenki nan ti Tunka Duumanten wa kafiini o yi, axa ma sooxindi Tunka Duumanten ŋa ke yi ti sooxira yi. Axa da Banisirayilagankon kisi Tunka Duumanten ŋa ya kundu ! » 32 Sadaxakiɲandaana Lajaari renme Pinaasi do yinmanko ku giri Rubeenikaarankon do Gaadikaarankon ŋa Gilaadi jamaanen ŋa katta Banisirayilagankon ŋa Kanaana jamaanen ŋa, na xibaaren saagandi i da. 33 Fiinu ku siro Banisirayilaganko da ; i da Alla tiiga, i maxa kure digaame ko taŋeene jamaanen buruxanden ŋa, jamaane be Rubeenikaarankon do Gaadikaarankon gaa taaxunu a yi. 34 Rubeenikaarankon do Gaadikaarankon da batira ke toxora « Seeda » baawo ke ni « Seedan » ya yi o naxa nan ti Tunka Duumanten ni Alla ya.