Yuusawu 21

[Leewikaarankon taqidebu]

Leewikaarankon faabanxirisun tinko sadaxakiɲandaana Lajaari do Nuunu renme Yuusawu yi, a do faabankan faabanxirisu, 2 na i diganlenmaaxu Silo yi, Kanaana jamaanen ŋa, nan ti : « Tunka Duumanten ɲaamarindi ti Muusa faarannaaxun ŋa, nan ti debu do i nagaaniranun nan kini o do o naaburun ŋa, kuudo o nan taaxu. » 3 Banisirayilagankon da ku debu do i nagaaniranun kini Leewikaarankon ŋa bakka i xallitaqen ŋa Tunka Duumanten ɲaamariyen kanma :

4 Sokken saxu Xehaatilankon da, kun ni Leewikaarankon yogo ya, bakka sadaxakiɲandaana fonlaqen ŋa, na debu tanmi do sikko kita bakka Yehuudakaarankon do Simoonakaarankon do Beniyamiinakaarankon kutiyen ŋa ti sokkun ŋa. 5 Xehaatilankon kuttun da i taqen kita ti sokkun ŋa bakka Hefarayimukaarankon do Daanikaarankon kutiyen ya yi, a do Manaasekaara fonlaqi taxande.

6 Geresoonilankon da debu tanmi do sikko kita Basaani yi ti sokkun ŋa, bakka Yisaxaarikaarankon do Haseerikaarankon do Nafutaalikaarankon do Manaasekaara fonlaqi taxanden kutiyen ŋa.

7 Meraarilankon da debu tanmi do fillo kita i fonlaqen lanɲaran da, bakka Rubeenikaarankon do Gaadikaarankon do Jebuluunukaarankon kutiyen ŋa.

8 Banisirayilagankon da ku debu kundu ya do i nagaaniranun kini Leewikaarankon ŋa ti sokkun ŋa, xo Tunka Duumanten ga ɲaamarindi ti Muusa faarannaaxun ŋa.

9 I gaa riini ku debu kundu be toxonun xiri, i da kun ya kini i ya, bakka Yehuudakaarankon do Simoonakaarankon maxa. 10 Sokken saxu Haaruna fonlaqen fina ya da, kun ga ni Xehaatilankon ŋa bakka Leewikaara yi :

11 I da Xiriyaata-haraaba kini i ya, i gaa a xilli Heburoona, Yehuuda gidinjamaanen ŋa, a do i nagaaniran yoorinda. Haraaba ke ni Hanaaxi faaba ya. 12 Xa, debe ke gunnen do a debinlenmu, i ɲi ga da kun kini Yefunne renme Kaalebu yi taqe.

13 Sadaxakiɲandaana Haaruna fonlaqe, i da Heburoona do i nagaaniranun kini i ya xaliifedebe yi, a do Libina do i nagaaniranu 14 do Yatiiri do i nagaaniranu, Sitimooya do i nagaaniranu, 15 Holoona do i nagaaniranu, Debiiri do i nagaaniranu, 16 Heeni do i nagaaniranu, Yuuta do i nagaaniranu, a do Beeti-semesi do i nagaaniranu : debu kabi ya n wuti ku xabiilanu filli maxa.

17 Beniyamiinakaaranko, debu naxati ya n kuti i maxa : Gibooni do i nagaaniranu, Geeba do i nagaaniranu, 18 Hanatooti do i nagaaniranu, a do Halimoona do i nagaaniranu.

19 Haaruna fonlaqen debun kafumanto, sadaxakiɲandaano ku, debu tanmi do sikko ya ni, i do i nagaaniranu.

20 Xehaatilankon kuttu, nan bogu Xehaati fonlaqen ŋa Leewikaara yi, i da i debun kita bakka Hefarayimukaarankon ya maxa ti sokkun ŋa :

21 I da xaliifedebun ya kini i ya kallen futuxiyenmun da, Sixemu do i nagaaniranun gaa Hefarayimu gidinjamaanen ŋa, a do Gejeere do i nagaaniranu, 22 a do Xibicaayimu do i nagaaniranun do Beeti-horoona do i nagaaniranu : debu naxati.

23 I da debu naxati ya kini i ya bakka Daanikaara maxa : kun ni Yeliteexa do i nagaaniranu, Gibitoona do i nagaaniranu, 24 Yaloona do i nagaaniranu, Gaata-linmoona do i nagaaniranu.

25 Manaasekaara fonlaqi taxanden maxa, Tanaaxi do i nagaaniranu, a do Gaata-linmoona do i nagaaniranu, debu filli.

26 Debu beenu su do i nagaaniranun gaa Xehaatilankon kuttun da, debu tanmi do i nagaaniranun ya ni.

27 Geresoonilanko, bakka Leewikaara fonlaqun ŋa,

i kuyi bakka Manaasekaara xabiila taxanden ya maxa. I da Golaana do i nagaaniranun kini i ya Basaani yi bakka i kutiyen ya yi, xaliifera yi kallenfutuxiyenmen da, a do Besiteera do i nagaaniranu : debu filli.

28 I da Xisiyoona do i nagaaniranun kini i ya bakka Yisaxaarikaara kutiyen ŋa, a do Deberaati do i nagaaniranun 29 do Yarimuuti do i nagaaniranu, a do Heeni-ganniimu do i nagaaniranu : debu naxati.

30 Bakka Haseerikaara kutiyen ŋa, i da Misaale do i nagaaniranun ya kini i ya, a do Habudoona do i nagaaniranu, do 31 Helixaati do i nagaaniranu, ken do Lehoobu do i nagaaniranu : debu naxati.

32 I ri Xedesi be gaa Galiile yi do i nagaaniranun kini xaliifedebe yi kallenfutuxiyenmen da, bakka Nafutaalikaara maxa, a do Hanmooti-dooro do i nagaaniranu, kafiini Xaritaane do i nagaaniranu : debu sikki.

33 Geresoonilankon fonlaqen lanɲaran debun su ni debu tanmi do sikko do i nagaaniranun ya.

34 Meraarilankon ni Leewikaara yogo ya yi,

i da Yoxinaamu do i nagaaniranun kini i ya bakka Jebuluunukaara maxa, a do Xarata do i nagaaniranu, 35 a do Dimina do i nagaaniranun do Nahalaale do i nagaaniranu : debu naxati.

36 I da Beceere do i nagaaniranun kini i ya bakka Rubeenikaara maxa, a do Yahaca do i nagaaniranu, 37 a do Xedemooti do i nagaaniranu, kafiini Mefaati do i nagaaniranu : debu naxati.

38 Gaadikaara ɲiiɲen kanma, i da Lamooti do i nagaaniranun kini i ya Gilaadi yi, xaliifedebe yi kallenfutuxiyenmun da, a do Mahanaayimu do i nagaaniranu 39 do Hesiboona do i nagaaniranun do Yaajere do i nagaaniranu : debu ku su ni naxato ya.

40 Meraarilankon ni Leewikaara fonlaqen yogo ya, i sokkun gemu debu tanmi do fillo ya yi i fonlaqen lanɲaran da.

41 Leewikaara debun su ni tannaxate do debu segi do i nagaaniranun ya yi Banisirayilagankon raganden noxon ŋa. 42 Ku debu kundu su, debe do debe su nagaaniran na a yoorindan ya yi, ku debu kundu su ni ken ya.

43 Tunka Duumanten da jamaanen danman su kini Isirayila yi, ke be a ga sape ti i wa a kinni i faabanu yi. I da a foyaaxu, nan taaxu a yi. 44 Tunka Duumanten da kudeyen ɲaŋi i da gelli fonkaaron ŋa, xo moxon maxa a ga sape i faabanu da : sere ma sigi i kaane xa. Tunka Duumanten da i xonnon danman su kini i ya xa. 45 Digan sire ma xenu bakka digaamu beenu su Tunka Duumanten ga da i digaamu katta Isirayila dunkoonun ŋa : a su ri ti i yaaxen ŋa.