Ruuti 2

[Ruuti wa yaareene Buwasi ten noxon ŋa]

Sere yogo ɲi Nayoomi maxa, ken ga ni a kiina Yelimeleexi maarenmen ŋa. Banna ya ni yugo ke yi, toxonten ya ni, a toxon ni Buwasi. 2 Koota yi, Ruuti Mowaabanke ti Nayoomi danŋa : « An nta in walla n nan daga yaare do fataanon batten ŋa ? N wa sere kitana a gaa duŋeene n nan yaare i ten ŋa. » Nayoomi ti a danŋa : « Daga ke, n renme. » 3 Ruuti xosi daga yaare fataanon falle te yogo noxon ŋa. Jaaxa te ke ni Buwasi ya te yi, Yelimeleexi maarenme ke.

4 Fi falle, Buwasi yinme ri nan giri . A ti fataanon danŋa : « Hari na axa deema ! » I xa ti a danŋa : « Hari na an deema ! » 5 Buwasi ti fataanon yinmanken da : « Ko ni ke yaxarin fonnanxaye yi ? » 6 Fataanon yinmanken ti : « Mowaabanka yaxaren ya ni, ke be ga ri do Nayoomi batten ŋa nan giri Mowaaba. 7 A da ɲaamariyen muuru ti i wa a mulla nan yaare do fataanon falle yi. Gelli suxuba a ga ri ma saasa, a na i tan ya kanma, a da fonne ya tuuma tannu gupen wure. »

8 Ken falle Buwasi ti Ruuti danŋa : « N gidanyaxare, yere terinka. Maxa daga yaare te tana yi; toxo yere. Yaxaru beenu gaa gollini in danŋa, ɲa do kun batten ŋa. 9 An na koroosindi siri, yaxarun ga na ɲi ten noqu fatante be berejun xoorono, an na yaare do i falle yi. N da in golliɲanŋaanon xa gongo, n ti i nan maxa an tooro. Daqun ga na an raga, golliɲaŋaanon ga da laalu beenu faga, an na daga mini i ya. » 10 Ruuti xosi tusi Buwasi jon ŋa na a tirindi ti : « Nke ni mukken ya yi, mani saabu da an gaa hinne in ŋa, nan siro in danŋa kundu yi ? » 11 Buwasi ti a danŋa : « An ga da fo be ɲa an kallu yaxaren danŋa gelli an kiina ga bono, i da a su laxami in danŋa. N wa a tu ti an giri an ma do an faaba yi, do an saare jamaanen ŋa nan ri taaxu do sero yi, an ga ma ɲi sero beenu tu nan xaso. 12 Tunka Duumanten| na an tuga ken ŋa. Tunka Duumanten, Alla na tugaadi tinmante kini an ŋa, baawo an ri du xaliifa a ya yi. » 13 Ruuti ti a danŋa : « An siro in danŋa de, n kaman yugo ! An da in kiilen taaxundi, na digan sirun ko in danŋa, na a ɲi xa hari yaxaru beenu gaa gollini an danŋa, i ya nan fasu nke yi. »

14 Yigebiren ga kiɲe, Buwasi ti Ruuti danŋa : « Tinko o nan yige doome; buuru dunŋe wutu an na a ro maxafonjin ŋa. » Ruuti taaxu fataanon kaaran ŋa. Buwasi da jogodo barabaranto yogonu kini a yi. Ruuti da a yiga nan fogu ma a gaa kutten toqo. 15 Ken falle, Ruuti giri nan daga yaare. Buwasi da i golliɲanŋaanon ɲaamari nan ti i danŋa : « Axa na a wara a nan yaare berejun do me naxa, sere xa nan maxa diganxan bure ko a danŋa. 16 Axa na jogodo dantanto yinme yerendi do du batten ŋa, kuudo a na i sagara. Axa nan maxa doxo a yi xa. »

17 Ruuti yaare Buwasi ten noxon ŋa kuŋa ma lelle. Ken falle, a da i jogodo yaaranton katu, i gemu muudu tanmu ya. 18 A do muudu ku tanmu daga kaanun ŋa, na i koyi i kallu yaxaren ŋa. A do i yigandi kutte ke xa daga na a kini i kallu yaxaren ŋa. 19 Nayoomi ti a danŋa : « An da ke su yaara minna yi lenki ? An golli minna yi ? Sere be ga siro an danŋa, hari na xeeri ɲa a kaman danŋa ! » Ruuti da xibaare ke su laxami i kallu yaxaren danŋa kuŋa, nan ti a danŋa i golli yugo yogo ya ten ŋa, a toxon ga ni Buwasi. 20 Nayoomi ti Ruuti danŋa : « Tunka Duumanten be gaa hinneene furun do ŋalinton ŋa, yelli a gan na xeeri ɲaana ke yugo danŋa ! » Nayoomi yille tini a danŋa xadi : « Buwasi ni o maaren tinke ya yi, o likken gaa ku beenu kanma, i du baananbe ya ni. » 21 Ruuti yille tini : « A da a ko in danŋa yinme ti in nan toxo yaareene do i golliɲanŋaanon falle yi ma i ga n duguta sanjaanen su yi. » 22 Nayoomi ti a danŋa : « Ken siro in renme, yaxaru beenu gaa gollini Buwasi danŋa, an ga na toxo do i batten ŋa, ken siren ni ke. An gan daga sere tana ten ŋa, i ra ɲa an roxoono. » 23 Ken ya ni, Ruuti yaare do Buwasi yaxarin golliɲanŋaanon batten ŋa ma sanjaanun gaa dugutana. Ruuti toxo do i kallu yaxaren batten ŋa.