Ruuti 3

[Buwasi da laayidu kini Ruuti ya]

Bito dangi falle, Nayoomi ti Ruuti danŋa : « N renme, n wa a mulla, an na kiina sire kita, an gaa xeeri kitta moxo be. 2 Xoyi an gaa a tu moxo be, ke Buwasi be ga duŋe an nan golli do i yaxarin golliɲanŋaanon batten ŋa, o maarenmen ya ni. Ayiwa, a wa i yillen woyini duganbaran ŋa wuro ke. 3 Ken kuŋa, wanqi, an na du daari, na timi liŋen ro du yi, na an yiran sirun rondi. Ken falle, an na daga a duganbaran ŋa, xa maxa du koyi Buwasi ya saado a gaa dugutana yigeyen ŋa de. 4 A ga na ɲi saqa, an na koroosindi na a saxuran tu. Ken falle, an na daga katta a yi, na a xufan bogu a taanun ŋa fonne, nan saxu a taanun ŋa. Ken ŋa, an ga n xawa na moxo be dabari, a yinme wa ken koyini an ŋa. » 5 Ruuti ti a danŋa : « An ga da fo wo fo su ko in danŋa, n wa a ɲaana. »

6 Ruuti daga Buwasi duganbaran ŋa, kallu yaxaren ga da a wara kille moxo be yi, a bogu ti ken moxo yi. 7 Buwasi yige siri ken ŋa. Ken ɲa sababu yi na a faten bogu me yi, ken falle, a daga saxu i yillifunsen kaaran ŋa. A ga xenqe, Ruuti mullin tinko a yi na xufan bogu a taanun ŋa, nan saxu a taanun ŋa. 8 Katta kaananan ŋa, Buwasi ga seede du yi, a gerebesi nan taaxu, a xosi yaxaren ya wari saqa i taanun ŋa. 9 A ti : « Ko ni an ŋa ? » Ruuti ti : « Nke Ruuti battaransere ya ni, n ri ya ma an wa in likken wuttu, baawo an seri tinke ya ni in ŋa. » 10 Buwasi ti a danŋa : « Yelli Tunka Duumanten| gan na xeeri ɲaana an danŋa, Ruuti ! An da an hooraaxun ya koyi kundu katta an kallu yaxaren seron ŋa, an dan ke golle ya nan xoora diinanta an golle fanan ŋa. Baawo an ma sukke do maxanbaanun batten ŋa, bannanu ma misikiinu ga na i ya. 11 Ken kuŋa, maxa jooti ! Fo wo fo ga n liŋo an danŋa, n wa ken ɲaana, baawo deben seron su wa a tu ti an ni yaxarin dawulante ya yi. 12 Tonŋun ya ni, n nan xawa an tiŋana ti maarenmaaxu sababu yi, xa yugo yogo wa no, a ken do an kallu yaxaren nan tinka diinanta nke yi. 13 Wuyi yere : xunbane suxuba, o na a fi tu, selli yugo ke gaa a mulla nan sig i sigan ŋa an danŋa. Selli a gaa a mulla nan sigi i sigan ŋa, a na an saagandi. A ga nta sikki i sigan ŋa xa, n da laayidun kini an ŋa Tunka Duumanten ŋalintaaxun ŋa ti n wa sikki in sigan ŋa an danŋa. Saado ken ŋa, saxu yere ma suxuba. »

14 Ruuti wuyi saqa Buwasi taanun ŋa, xa a furute gilli saado xurayen gaa bakka seron nan maxa i tu. Baawo Buwasi ma ɲi a mulla, a nan tuyi ti Ruuti ri ken noqu yi. 15 Buwasi ti Ruuti danŋa : « Lanxanne be gaa an ŋa, a bagandi an nan tigiti a yi siri. » Ruuti da i lanxannen tigiti, Buwasi da yillin muudu karagi ro a lanxannen ŋa na a deema tiŋeene.

16-17 Ken falle, Ruuti saage katta i kallu yaxaren ŋa, kaanun ŋa. Kallu yaxaren ti a danŋa : « N renme, fiinun ɲaŋi kan moxo ? » Ruuti ti : « A ti in kitti duuro nta yilleene katta an ŋa, a da ke yille su kini in ŋa. » Ken falle, Buwasi ga da fo wo fo su ɲa a danŋa, a da a su laxami i kallu yaxaren danŋa. 18 Nayoomi ti : « N renme, taaxu an nan terinke, na xibaare ke lagarun dugu. Buwasi nta taaxunu a ga ma a yaaxen bagandi ya falle lenki yinme ! »