Ruuti 4

[Buwasi wa a mulla nan saage Yelimeleexi batten ŋa]

Buwasi daga taaxu deben bulunlaxa xooren ŋa, non gaa kaaran ŋa. Yelimeleexi maaren tinke be Buwasi ga da a fin ko Ruuti danŋa, a dangi ti non ŋa. 2 Buwasi ti : « N gida, bogu ti in ŋa. » Yugo ke ri taaxu kuŋa. Ken falle Buwasi da a muuru deben yinmanko tanmi maxa, ti i nan taaxu kafiini i ya. I ga taaxu, 3 a ti Yelimeleexi maaren tinke ke danŋa : « An wa a tu ti Nayoomi yille riini nan giri Mowaaba jamaanen ŋa. Ken ya ni, a wa a mulla na o maarenme Yelimeleexi soxanten xaliifa sere yi. 4 N da a xanu na an tuyindi ti a yi, do na a muuru an maxa, an nan duŋe soxante ke yi deben yinmankon do sero beenu su gaa yere yi jon ŋa. Selli an gaa xaliifa ke mulla, a raga, ma ken ga fe, an na in tuyindi ti a yi, baawo nke ya n xawa siga ke wuttu anke dangi falle. » Yugon ti : « N wa duŋeene soxante ke yi. » 5 Xa Buwasi yille tini : « Selli an gaa duŋeene Nayoomi soxanten ŋa su, an duŋeene Ruuti Mowaabanke xa ya danŋa an gaa a saagandini de, kuudo a na ren yugo kita gilli an ŋa, ren yugo be gaa ɲaana a kiina furen xayimaxantan renmen ŋa. Ken saabu da kiina furen naaburen na ɲa ken ren yugo xalle yi, xa an ken kiina fillandi xalle nta ɲaana soxante ke yi de. » 6 Yugon ti : « Kundun ya ga ni, nke yanpa a yi, baawo ken wa in yinme xayimaxantan renmun taqen naqasini. Anken nan sigi siga ke yi, baawo nke ra nta sikki siga ke yi. »

7 Gannin ŋa laadan ɲi ya, an ga na ɲi yanpana an xallen ŋa na a kini sere tana yi, an na an tepun ya bagandini na a kini baanen ŋa seedaaxu yi. 8 Ken ya ni, bire be yugon ga da a ko Buwasi danŋa ti a yinme nan sigi siga ke yi, a da i tepun bagandi na a kini Buwasi ya. 9 Ken falle, Buwasi da a ko sero xooron do sero beenu su ga ɲi non ŋa danŋa ti : « Axa wa a seeda lenki ti fo wo fo ga ɲi Yelimeleexi do a ren yugun xalle yi, Kiliyooni do Mahalooni, i gaa Nayoomi maxa, i ɲaŋi in xalle yi. 10 Xadi, n wa Ruuti Mowaabanke saagandini, ken ga ni Mahalooni, hari na a neema, a yaqen ŋa. Ken ŋa, soxanten wa toqo bonnaanan seron xallaaxun ŋa, kuudo a toxon nan duumu a kaadunkon naxa, do a deben xibaarun noxon ŋa, ti a bonsonŋun ŋa. Axa ni ken xa seedan ŋa lenki. » 11 Sero xooron do ku beenu su ga ɲi non ŋa, i su ti : « Yabo, o wa a seeda. Yaxare be gaa roono an kan ŋa, yelli Tunka Duumanten| gan na a deemana, na a do Raxeli do Leeya baanondi, kun ga ni Yaaxuba xojidunkon filli ya, i ga da Isirayila kan sigindi ! Na an naaburen jiidi Efarata xabiilan noxon ŋa, na an toxon wurugi su yi ! 12 Yelli Tunka Duumanten gan na an koren jiidini xoyi Pereci koren moxo, a ya ga ni Yehuuda do Tamara ren yugon ŋa, ti ke fonnanxaye yi ! »

[Buwasi da Ruuti yaxi; Woobedi bangeye, a ya ga ni Daawuda burujun ŋa]

13 Ken ya ni, Buwasi da Ruuti yaxi. da Ruuti warijaxa, a da noxon wutu na ren yugo saara. 14 Beeti-leheemi yaxarun ti Nayoomi danŋa : « Tiigayen wa Tunka Duumanten danŋa ! A da tuumandaana kini an ŋa lenki. Na an kisimaren toxon wurugi, Isirayila ! An kallu yaxaren nan faso an danŋa ren yugu ɲeri ya, baawo a da an xanu, a da ke kisimare xa kini an ŋa, 15 a gaa riini senbe kini an ŋa an xirisaaxun ŋa, na an sorogo. » 16 Nayoomi da lemine ke wutu kuŋa, na a xoorondi. 17 Taaxanlen yaxarun ti : « Nayoomi da kisimare kita. » I da lemine ke xiri « Woobedi. » Woobedi ya n da Yisaayi saara, Yisaayi xa da Daawuda saara.

[Daawuda burujunun toxonu]

18 Daawuda burujunun toxonun faayi na a wutu Pereci ya : Pereci da Hecerooni saara, 19 Hecerooni xa da Araama saara, Araama ya n da Hamidaabu saara, 20 Hamidaabu xa da Naxasoona ya n saara, Naxasoona da Salama saara, 21 Salama xa da Buwasi saara, Buwasi da Woobedi saara, 22 Woobedi da Yisaayi saara, Yisaayi xa da Daawuda saara.