Samuyeli kitaabi hana
Samuyeli hana roraqe
Samuyeli hana kitaaben ni kitaabe ya taxandi hana yi, a ga taxandi hillo yi, bawo i hilli ma toŋo darimeleke baane di. Kitaabe ke ga wa sehene sere ke be yinme kanma, ken toxon ya kini a yi : Samuyeli, aken ni xeyihaare yi ado Banisirayila kiitikutaanun ho lagaren ŋa. Samuyeli kitaaben wa sehene kiitikutaanun kiyen do tunkayugun kiyen naxan ya kanma.
Kitaabe ke taxandi hana, nan giri soora hanan ŋa katta ɲeerundin ŋa (1-7), ken wa sehene Samuyeli ga da Banisirayilaranko deema na i xonnun gaja kanma. Waxati dangi halle, jaman da a mundu Tunka Duumanten maxa, a na tunkayugo kini i ya, ke be ga wa i kapa me yi nan ɲa i da kurinyinmanke yi.
Taxandi hillandi nan giri soora segundi nan daga a wara tanmu do karagandin ŋa (8-15), Tunka Duumanten wa a konni Samuyeli da, a na Sawulu daari na a ɲa Banisirayila tunkayugu hanan ŋa. Sawulu do i renyugo Yoonata niyindi gajaŋi gabu di, i do Hamoonirankon do filisitinun naxa, nxa, Sawulu ma Alla sehexannen su batu.
Taxandi sikkandi, nan giri soora tanmu do tunmundi nan daga a wara tanjikke do baanandin ŋa (16-31), Tunka Duumanten wa Samuyeli yaamarini, a na Daawuda daari, Yisaayi renyugo. A kiiluxoteyen saabu da, a ɲa yugu saage bangante yi, ma Sawulu ga wa suuxunu a di. Kitaaben kutten wa Daawuda ga da i yinme kuren dabari moxo be, ado a ga wuru Sawulu yi ya kanma. Kitaaben ɲamaran wa sehene Sawulu do i renyugun kallen kanma. Janbeyi gabu wa kitaabe ke di, nxa Tunka Duumanten yinmen ɲa a su yaaxabugundaanan ŋa. Ken ya saabu da, Kamanen sehe do Yeli yi nan ti : « Sere beenu nda in daro, n wa kun darono, sere beenu xa nda in roxo, i wa maxayanqana. » (2.30)
Kitaaben noxon hi xooru
Samuyeli ɲaaye kiitikutaana yi (1-7)
Sawulu ɲaaye Banisirayila tunkayugon ŋa (8-10)
Sawulu maranden siini hananu (11-15)
Daawuda sugandiye Alla maxa (16)
Jaaluuta kalle Daawuda maxa (17)
Sawulu ramuuruye na Daawuda kari (18-30)
Sawulu do i renyugun kalle (31)
Samuyeli kitaabi hana