Samuyeli kitaabi hana
[Samuyeli ɲaaye kiitikutaana yi]
(1 Samuyeli 1-7)
[Samuyeli bangeyen do a leminaaxu]
1
Yugo yogo ɲi Raama¤,
Hefarayimu gidinsiŋanun di,
a toxon ni Yelixaana.
Aken haaba ɲi Yoraama yi,
ken haaba ɲi Yeliihu yi,
ken haaba ɲi Toohu yi,
ken haaba ɲi Cuufu yi,
Hefuraatinken ya n ɲi.
2 Yaxaru hilli ya n ɲi yugo ke maxa,
Hanna do Peniina.
Renmun ɲi Peniina maxa,
nxa,
ho ma ɲi Hanna maxa.
3 Siine su,
ke yugo ɲi dagana Silo¤ Tunka Duumanten batu,
Tagahoonun su Kama,
nan xurusindi a da.
Yeli renyugun hilli ya n ɲi no sadaaxakiɲandaanu yi,
Hofini do Pinaasi.
4 Yelixaana nda sadaaxan bugundi koota be,
a ɲi saada kinni i yaqe Peniina do i renmun su yi,
5 nxa,
a ɲi taqi xerexerente kinni Hanna yi,
bawo,
a ɲi ken ya munda moxosiri,
na a toxo Tunka Duumanten ɲi ga da a ɲa boroge yi.
6 Peniina ɲi i tayinen tegerini haxati su na a sababun ɲa a renkitayinbalaaxun ŋa.
7 Siine su ke tegerinde ya ɲi ɲaana Hanna yi i dagante Tunka Duumanten batikan di.
A ɲi butunu nan wu,
nan bara yigene.
8 Siine yogo,
kiinen da a tirindi :
« Hanna,
manni an ga bara yigene,
an ga wa wuunu,
manni an sunnunten ga ni ?
An ti,
nke nta haso an da renmu tanmi yi ? »
9 Bire be i ga duguta yigeyen ŋa,
Hanna giri.
Ken da a ɲi sadaaxakiɲandaana Yeli wa taaxunu allabatikan raqen ŋa i taaxuhon di.
10 Na a toxo sunoyen di,
a da Tunka Duumanten ɲaaga,
a wunte,
yaaxanjin wa surundini,
11 na takken wutu Alla da nan ti :
« Tunka Duumante,
Tagahoonun su Kama,
genni an yaaxen ga wa an komiyaxaren maxayanqayen ŋa,
an ga ma mungu in ŋa,
hinne in ŋa na renyugo kini in ŋa,
n wa lahidun wutunu,
n wa renme ke kinni an ŋa,
a wuyun wucen su,
a yinmen nta siini abada¤. »
12 Xoyi a ga dalla Tunka Duumanten ɲaaganden ŋa,
Yeli ɲi na a raqen koroosi.
13 Hanna ɲi nan ɲaagandi gundo ya di,
a soomun baane ya ɲi yilleyillene,
ho wo ho ma ɲi mukki.
Yeli ɲi ga da a sinma a mininten ya ni,
a ga nta i du maxa.
14 Yeli ti a da :
« Eh,
an wa toqo ke minne maxa kundu ba ?
Daga,
an haqire nan saage katta du yi hina ! »
15 Hanna ti a da :
« N yinmanke,
n mininte he de !
N noxudusamunten ya ni,
n ri n hin koyi Tunka Duumanten ŋa.
16 Maxa in sinma baataransere yi,
an ga da a wari n ga dalla Alla ɲaageyen ŋa,
hanmi xote ya na in ŋa. »
17 Kendi,
Yeli ti a da :
« Anhan,
a ga xeeri di,
yelli Banisirayila Alla ga na an muuruhon kini an ŋa. »
18 Hanna ti a da :
« Yelli n ga na xeeri kita do an sababun ŋa.
» Hanna daga,
kendi a yige,
yaaxatiidiyen xa ɲi ga ɲeme.
19 Ken yillankaran soxubahana,
Yelixaana do i kaadunkon daga Tunka Duumanten batu,
nan saage i deben di Raama.
Yelixaana ga saxu do i yaqe Hanna yi,
Tunka Duumanten haqiren toxo a duwaawun di.
20 Hanna warijaaxe,
ken halle nan saare ti renyugo yi.
A ti kendi :
« Xoyi n da a mundu Tunka Duumanten ya maxa,
n wa a toxorana Samuyeli¤. »
21 Ku dangi halle,
Yelixaana do i kaadunkon daga Silo xurusindi Tunka Duumanten da xoyi siine su moxo,
ado a ga da takke be lahidun wutu.
22 Nxa,
keetara Hanna ma daga do i kiina yi,
a ti a da :
« N wa sikki renmen ga na hate,
n wa dagana a sunsi Silo,
na a kini Tunka Duumanten ŋa,
ayiwa,
a toqo non ya yi bada. »
23 Yelixaana da a jaabi :
« Hi be ga wa genme an ŋa,
ken ɲa.
Toxo yere ma renmen ga hate.
Yelli Tunka Duumanten ga na i lahidun sabatindini.
» Hanna toxo Rama na i renmen sugundi ma a ga hate.
24 Renmen ga hate,
man do a daga Tunka Duumanten noqun ŋa Silo.
A da siinosikkingunbo¤ xa raga,
do yillijuranbooto do girihe hakka resenji,
ke haxati da a ɲi Samuyeli ni leminaane ya yi.
25 I da gunbon ɲa sadaaxa yi,
ken halle nan daga ti leminen ŋa Yeli noqun ŋa.
26 Hanna ti Yeli da :
« N yinmanke,
n kuna ti an bireyen ŋa,
nke ya ni yaxare be ga ɲi sikki an tintoyen di yere na Tunka Duumanten ɲaaga.
27 N ɲi Tunka Duumanten ɲaagana ke renme ya yi,
a xa da a kini in ŋa.
28 Kendi,
nke xa wa a kinni Tunka Duumanten ŋa,
a na i wuyun su ɲa a maxa.
» Ken ga ɲa,
a xusanta sujudi Tunka Duumanten da.