[Hanna allatiigeye]
2
Hanna da Alla tiiga nan ti :
« Nan sababu Tunka Duumanten ŋa,
n sondonmen ɲaxali,
nan sababu Tunka Duumanten ŋa,
n yinmarawuti,
n ra wa wasono in xonnun ŋa,
bawo,
n nimisiwase ti anken deemanden ya yi.
2 Ho nta xoyi Tunka Duumanten moxo,
tangandaana su nta xoyi a moxo.
O Kama,
hillandi nta an ŋa.
3 Xa da axa du tigiti bakka dundaraaxun sehikonnen maxa,
yaagunloxinsehe nan maxa mugu axa yi,
bawo Tunka Duumanten ni Alla tuwaanan ya yi,
aken ya wa gollun xensene.
4 Gajanyugun kaahanun wa xosexosene,
laahuntun wa senbene.
5 Hagunton wa dullunu,
dullunton wa hakka,
borogen wa renmun ɲeeri saarana,
lendunjaaxen wa ɲaana karankaranjaaxe yi.
6 Tunka Duumanten wa karindini nan ŋarindi,
a wa yanqandini hurun kaara nan segendi.
7 Tunka Duumanten ya wa misikiinaaxundini nan bannaaxundi,
a ya wa maxayanqandini nan wurugindi.
8 A ya wa misikiinen girindini bakka seyen di,
na fuxaaren girindi bakka ɲagamen di,
na i kahu seri xoorun ŋa,
na darontaaxun korondanmen kini i ya taqe yi,
bawo ɲiiɲen gondanmanun ni Alla ya xalle yi,
a ga da duna taga i kanma.
9 A wa allankannaanun teretaanun koroosini,
nxa allakutaanun wa roono bitanbinnen di,
bawo,
seren ra nta niyindini ti i yinme senben ŋa.
10 Tunka Duumanten xonnun wa xosexosene,
kangidinlenmen wa yanqana i kanma bakka kanmun di.
Tunka Duumanten wa ɲiiɲen su kiitini.
A wa hankan kinni i tunkayugon ŋa,
a wa i seri sugandinten yinmarawutunu. »
11 Ken halle,
Yelixaana saage dagana i kaara Raama,
nxa,
renmen toxo Tunka Duumanten gollen ŋa sadaaxakiɲandaana Yeli noqun ŋa.
[Yeli renmu]
12 Yeli renmun ɲi jikkunloxu yi,
i ma ɲi kanna Tunka Duumanten ŋa.
13 I ga ɲi moxonu be ɲaana serun ŋa haayi :
sere be nda ri sadaaxa bugundi,
sadaaxakiɲandaanan golliɲaŋaanan wa riini a yi tiyen soro waxatin ŋa,
furuseti kanbasikkinman wa a kitten di.
14 A ɲi a xurubana barama walima ginen di.
Furusetin do ho wo ho ga ɲi bakka,
sadaaxakiɲandaanan ɲi ken wutunu i du da.
I ɲi ku moxonu ya ɲaana Banisirayilaranko su beenu ga ɲi riini Silo ya.*
15 Haxatinu,
sadaaxakiɲandaanan golliɲaŋaanan ɲi riini katti sadaaxandaanan ŋa katta katoyen ga wa xurumini,
a wa tini a da :
« Li ti tiyen yogo yi,
o na a biyi sadaaxakiɲandaanan da,
bawo a nta duŋene an tiyi soronten sadaaxan ragana,
a xayen baane ya wa ragene ! »¤
16 Sadaaxabugundaanan wa tini a da :
« Sigi katoyen nan biyi hina,
kendi hi be ga liŋi an da,
an na ken wutu.
» Golliɲaŋaanan wa tini :
« Ayi,
li ti a yi saasa,
ken ga he,
n wa a ragana an ŋa ti hankan ŋa ! »
17 Yeli renmun junuubun ɲi ga n xoora moxoburu Tunka Duumanten maxa,
bawo,
i ɲi ga da Tunka Duumanten sadaaxanun baataranlaga.
18 Samuyeli toxo Tunka Duumanten gollen ŋa,
a ɲi leeninxusaabinnen ya rondini.
[Samuyeli taaxe Silo]
19 A maa ɲi forokiyanne dabarini a da siine su.
A ɲi a sanbana a yi,
a ga ɲi dagana do i kiina batte siine su sadaaxanbakken ŋa.
20 Yeli ɲi duwana Yelixaana do i yaqen da,
a wa tini :
« Yelli Tunka Duumanten ga na an warijaaxa renmu tananu yi bakka ke yaxare yi,
a ga da ke be kini Tunka Duumanten ŋa haraxaaden ŋa.
» Ken halle,
i wa saagene dagana i kaara.
21 Tunka Duumanten xa xusanta siroye ɲa Hanna da,
a jiidi ti renyugu sikki do renyaxaru hilli yi.
Ke be ga ni Samuyeli yi,
aken xooro Tunka Duumanten kan di.
[Yeli doxoye i renmun ŋa]
22 Yeli ɲi ga xirisaaxu moxosiri,
a renmun ga ɲi ho wo ho ɲaana Banisirayilarankon ŋa,
a da a su mugu,
hari nan ti i ɲi saqa do yaxaru beenu ga ɲi riini golli megemuyen tillisen raqen ŋa.
23 A ti i da kendi :
« Axakun wa ku gollu ɲaana mani saabu da ?
Axa ga wa golli bure be ɲaana ke jama yi,
a kiɲe in ŋa de !
24 N renmu !
N ga wa na xibaare be mugu axa kanma Tunka Duumanten jaman di,
a sire he,
xa da a raqe wara.
25 Sere nda hobure ɲa sere yi Alla wa ken kiiten kutunu,
nxa seren nda hobure ɲa Tunka Duumanten yinme yi,
koxa ra wa ken kiiten kutunu ?
» Nxa,
renmu ku ma haaben sehen terinka,
bawo Tunka Duumanten ɲi ga kiiti a yi,
i na i kari ya.
26 Ke be ga ni Samuyeli yi,
a ɲi kanma nan xooro,
ayiwa a hin wa talla liŋono Tunka Duumanten do serun da.
[Alla gongonde katta Yeli do i kaadunkon ŋa]
27 Alla xeyihaare yogo ri katta Yeli yi nan ti a da :
« Ke ni Tunka Duumanten sehen ya yi :
“ Nke da in yinme bangandi an haabanu kaadunkon da,
na i toxo komaaxun ŋa Misira Firawunan maxa.
28 N da Haaruna sugandi bakka Banisirayila xabiilanun su naxa,
na a ɲa sadaaxakiɲandaana yi,
ikun ya na sadaaxanun kinni in ŋa,
na hutaadun biyi,
na batinxusaaben rondi in jon di sadaaxandinoqun ŋa.
Ayiwa,
n da taqe kini i ya Banisirayilaranko sadaaxan su di.
29 « “ Mani maxa n ga yaamarindi ti in sadaaxanun do in kuyindu beenu yi,
n konpi sennen da,
axa ga wa ken ɲaana roxondiho yi ?
Mani maxa an ga wa an renmun darono diinanta inke yi,
axa ga wa axa du katondini ti in jama Banisirayilaranko sadaaxa buguntun ho sirun ŋa ? ”
30 Ken saabu da,
Tunka Duumante,
Banisirayila Alla sehen haayi :
“ Nan xaso,
nke da lahidun wutu nan ti anken kaadunkon do an haaba kaadunkon nan toxo in gollen ŋa bada.
Nxa saasa,
n ntaxa ken kanma de,
sere beenu nda in daro,
n wa kun darono,
sere beenu xa nda in roxo,
i wa maxayanqana.
31 Ayiwa,
waxati wa riini,
n wa an senben xosono,
na an haaba kaadunkon senben xoso,
sere su nta ɲaana wuyigume yi axa di abada nan ɲa xirise yi.
32 Banisirayilaranko ga na neeme bire su,
anken wa liixini.
Ayiwa,
sere su nta birene axa di nan ɲa xirise yi.
33 Nxa,
n wa riini an soxoodi baane* ɲa sadaaxakiɲandaana yi.
Kutten su wa kalla honnanxayaaxu di,
an yaaxun hilli nan kare,
an butten nan xaasa.
34 « “ N sehe ke taagumansen ga ni hi be yi,
an renmun hilli Hofini do Pinaasi su wa kalla koota baane.
35 Ken halle,
n wa sadaaxakiɲandaana duntaŋe sugandini in du da,
ken wa gollini ti in yonkin liŋun do in sagon ŋa.
N wa a kamanen soxoodun sabatindini,
i n golli n ga wa riini tunkayugo be sugandi da bada.
36 Ayiwa,
anken soxoodu beenu ga wa toqo,
i wa riini tusi sadaaxakiɲandaana ke da godi baanen walima buuru kutte saabu da,
i wa tini a da :
‘ N wa an ɲaagana,
an na in wara sadaaxandinoqun ŋa gollen yogo yi,
nan bire baatara. ’ ” »