[Samuyeli xiriye Tunka Duumanten maxa]
3
Lemine Samuyeli ɲi Tunka Duumanten gollen ɲaana Yeli kaaran ŋa,
ken haxatin ŋa Tunka Duumanten sehen ɲi ga n roxo,
a wariyen ɲi ga n roxo.
2 Wuro yogo,
Yeli ɲi xenqene i saxura xasen ŋa,
ken da a ɲi a yaaxun joŋe laahunu,
a ma ɲi ho soobe walli xadi.
3 Samuyeli xa ɲi xenqene Tunka Duumanten kan di gemuxannen waxanden* kaaran ŋa,
katta Alla hitillen* ga wa kalla.
4 Kendi,
Tunka Duumanten da Samuyeli gangu,
a da a ɲiimi nan ti a da :
« Naamu ! »
5 Ken halle,
a wuru nan daga Yeli noqun ŋa nan ti a da :
« N haayi ke yi,
n xaramoxo,
an ga da in xiri.
» Yeli ti a da :
« Nke ma an xiri de !
Saage dagana saxu.
» Samuyeli daga saxu i batten di.
6 Tunka Duumanten saage na Samuyeli gangu xadi.
Samuyeli xusanta giri nan daga Yeli noqun ŋa,
nan ti a da :
« N haayi ke yi,
an ga da in xiri.
» Yeli ti a da :
« N ma an xiri de,
n renme !
Saage,
an nan daga saxu. »
7 Samuyeli ma ɲi Tunka Duumanten tu ti ke moxo yi,
bawo Tunka Duumanten ma ɲi ga da a sehenlenmaaxu hina.
8 Tunka Duumanten da Samuyeli xiri ta sikkandin ŋa,
a giri nan daga Yeli noqun ŋa nan ti a da :
« N haayi,
an ga da in xiri !
» Yeli da a haamu nan ti,
Tunka Duumanten ya wa na leminen xiri.
9 Kendi Yeli ti Samuyeli da :
« Daga saxu,
an ga na xiri,
an nan ti :
“ Sehe,
Tunka Duumante,
an komen taro wa a di.
” » Samuyeli saage i batten di nan saxu.
10 Tunka Duumanten ri nan sigi no,
nan gangundi xoyi ta dangintu ku moxo :
« Samuyeli !
Samuyeli !
» Samuyeli xusanta ti :
« Sehe,
an komen taron wa a di. »
11 Kendi Tunka Duumanten ti Samuyeli da :
« N wa riini hi ɲa Banisirayilarankon ŋa,
sere su nda a mugu,
a wa ɲaana xoyi kanperenqeɲe a taron di.
12 Ken kootan ŋa,
n ga da ho wo ho koni Yeli kaadunkon xibaaren di,
n wa a su ɲaana i yaaxemaxa,
nan giri a hanan ŋa ma a lagaru.
13 N da a ko a da,
n wa riini bone xenundi a kaadunkon ŋa bada,
na a sababun ɲa a renmun jikkulloxaaxun do i kaafiraaxun ŋa ti Alla yi.
A wa a seedo,
nxa,
a ma i guhu.
14 Ken ya saabu da,
n kuna nan ti Yeli kaadunkon hobure,
xurusinden nta a yaahana,
sadaaxan danbe su nta a yaahana abada. »
15 Samuyeli toxo i batten di nan saxu ma soxuba.
Ken halle,
a da Tunka Duumanten batikan raqun wuɲi,
nxa a kanu na Alla wariye ke ko Yeli da.
16 Yeli da a gangu nan ti :
« N renme Samuyeli !
» Samuyeli ti a da :
« Naamu ! »
17 Yeli ti a da kendi :
« Kamanen da mani ko an da ?
Maxa a huxundi in ŋa.
Yelli Alla ga na an ɲanganxata ɲanganxateyi xote yi,
an ga na hari baane huxundi in ŋa Kamanen sehi koninten di ! »
18 Kendi,
Samuyeli xusanta a su laxami a da,
a ma hari baane huxundi a yi.
Yeli ti kendi :
« Aken ya ni Tunka Duumanten ŋa,
ke be ga liŋi a da,
a na ken ɲa. »
19 Samuyeli xooro,
Tunka Duumanten ɲi do a batte.
A ɲi a sehi koninten su xa sabatindini.
20 Banisirayilaranko su da a tu,
gilli Daani saahilin di nan daga a wara hankitten di Beeri-seba¤,
nan ti Tunka Duumanten da Samuyeli sugandi xeyihaare yi.
21 Tunka Duumanten toxo a wa i du bangandini Silo,
a wa i jaatin koyini Samuyeli yi non ŋa na a sehenlenmaaxu.