1 Samuyeli 4

Samuyeli xusanta ke sehen kiɲandi su yi.

[Gemuxannen waxanden rageye xonnun ŋa]

Ken halle, koota yi, Banisirayilaranko bugu, nan daga filisitinun gemu gajaŋen xannemaxa. I daaxa Hebeni-yeseeri kaaran ŋa. Filisitinu, kun daaxa Hafeexa kaaran ŋa. 2 Filisitinun da i sapanun dabari Banisirayilaranko xannemaxa, gajaŋen joŋe nan xoto, nxa filisitinun katta Banisirayilarankon da na wujunu naxati yugo me kari i di. 3 Kuren ga saage riini daaxan ŋa bire be, Banisirayila xirisun ti : « Mani maxa ga da filisitinun toxono i ga katta o da ? Kendi o n daga Silo, na Tunka Duumanten wutu riini o naxa, a na o kisindi o xonnun ŋa. » 4 I da yogonu wara dagana Silo, i ri ti Tunka Duumante, Tagahoonun su Kaman waxanden ŋa, a taaxunten wa naxa. Yeli renyugun hilli xa ri do waxande ke batte, Hofini do Pinaasi.

[Gemuxannen waxanden boosiye]

5 Tunka Duumanten gemuxannen waxanden ga ro daaxan di, Banisirayilaranko da direyi xoore girindi ɲaxaliyen maxa, ma ɲiiɲanxotten ga wa sarallene. 6 Filisitinun da manqaŋe ke mugu, i ti : « Ke ni mani manqan xoore yi Habaraaninu daaxan ŋa ? » I da a tu nan ti Tunka Duumanten waxanden ya n ri daaxan ŋa. 7 Filisitinun xusanta kanu nan ti : « I alla ri daaxan ŋa, bone wa oku da de, bawo ke me ma ɲa hina. 8 Bone wa oku da de, ko wa riini oku kisindi ku alla senbentu yi ? Aken ya ni Alla be ga da Misiranko katu ti bonen danbe su yi gunjuran di. 9 Filisitinu, xa ɲa senbentu yi, nan ɲa yugu yi, Habaraaninu n maxa ri axa komaaxundi xoyi axa ga da i komaaxu moxo be, xa ɲa yugu yi, axa na i gaja. » 10 Filisitinun da i gaja, nan katta i da, i baane su wuru, nan daga i gooren wure. A ɲa bonondindi xoori-xoore yi Banisirayilaranko maxa, tanjikke wujune gajanyugo ya n kara i di. 11 Filisitinun da Alla waxanden wutu, Yeli renmun hilli xa kara Hofini do Pinaasi.

[Yeli faatiye]

12 Ken koota baane yi, Beniyamiina soxooden yogo wurunten bugu gajannoqun ŋa nan ri Silo, a yiraamun booxonte, na a yinmen su ɲa seyiŋen ŋa. 13 Ken da a ɲi Yeli wa taaxunu i taaxuhon di killinkaaran ŋa, a wa koroosindini, bawo a sondonmen ɲi ga kanu Alla waxande ke xibaaren ŋa. Yugon ga kiɲe, na xibaaren ko deben di, deben su xaaru. 14 Yeli da xaaruxannen mugu, a xusanta tirindindi : « Ke ni mani manqaŋe yi kundu ? » Yugon da a soobe kendi nan daga Yeli xibaari. 15 Ken da a ɲi Yeli wa tankabe do siinu segi, a hinkinten ni, a ntaxa ho walli xadi. 16 Yugon ti Yeli da : « N bugu gajannoqun ya yi, n wuru bakka no lenki. » Yeli ti a da : « Xibaaren xa na kan moxo, n renme ? » 17 Xibaari kiɲandaanan ti a da : « Banisirayilarankon wuru filisitinun kaane, bonondindi xoore ro kuren di, an renyugun hilli xa kara Hofini do Pinaasi, gemuxannen waxanden xa rage. » 18 Gemuxannen waxanden toxon ga koni baane, Yeli xusanta xenu bakka i taaxuhon di raqen kaaran ŋa, a xannen xose nan kara, bawo xirise ya n ɲi hatintiyigume ya n ɲi. Ken da a ɲi a da tannaxate siine ya ɲa Banisirayilaranko yinmen ŋa.

19 A renyugo Pinaasi yaqen warijaaxanten ɲi, a ɲi ga tinto saareye yi. A ga da a mugu ti gemuxannen waxanden rage, i kalliyugon do i kiina xa bono, jalan xusanta ri a yi, a tusi nan saare. 20 A xusanta ro kallen xiitun di, yaxaru beenu ga ɲi a deemana saareyen ŋa ti a da : « Maxa kanu, an da renyugo ya saara. » A ma jaabindi, a ma ɲooxoɲooxo. 21 Nxa ken halle, a da renmen toxora Yixabooda. A da ke ko, bawo Alla nooron ntaxa Banisirayila xadi. Gemuxannen waxanden wuti, a kalliyugon do a kiina xa bono. 22 A ti xadi : « Nooron ntaxa Banisirayila, bawo gemuxannen waxanden wuti. »