1 Samuyeli 5

[Gemuxannen waxanden ga ɲi filisitinun maxa bire be]

Filisitinun da Alla wutu bakka Hebeni-yeseeri baŋen ŋa, nan daga ti a yi Sidoodo. 2 Ken halle, na a rondi i alla Dagooni batuyinkonpen di, i da a saxundi Dagooni kaaran ŋa. 3 Ken yillankara soxuba hana, Sidoodonko ga giri, i xusanta na Dagooni xenunten ɲi i yaaxanlaqen kanma, waxanden jon di. I da a girindi, na a saxundi i batten di. 4 Bita hillandin ŋa xadi, i ga giri soxuba hanan ŋa, i da a ɲi Dagooni xenunten na i yaaxanlaqen kanma, Tunka Duumanten waxanden jon di, a yinkollan da a kittun hilli kutuntu, na i sedi xunbanlaqen ŋa, a gurudanman ya n toxo. 5 Gelli ken ŋa, Dagooni battaanun yingumun do sere ho wo ho ga wa roono a batiran ŋa Sidoodo, i nta danbunu non kanma hari lenki.

6 Tunka Duumanten da i kitten saxu Sidoodonkon kanma ti xotoye yi, ado debe su ga wa yoorini a yi ti hankinwatten ŋa na hunbunnen wara i ya, na ɲiiɲen su haga gajan ŋa. 7 Sidoodonkon ga da ke golli ɲante wara i ya, i ti : «  Alla waxanden nta toqo o maxa yere, bawo, a kitten ya n xoto o do o alla Dagooni kanma. » 8 I da haaren wara na filisitinun yinmankon su xiri riini. I ga kahu me yi, i ti i da : « O wa mani ɲaana Banisirayilaranko Alla waxanden ŋa ? » I ti i da : « Xa da a wutu dagana Gaata. » I da waxanden wutu dagana non ŋa. 9 I ga da a gana dagana non ŋa biran be, Tunka Duumanten da i kitten saxu debidunkon kanma na hunbunnen wara i ya, i ho tugunnen do i ho xoore, na a ɲa kiilugiriyi xoore yi. 10 I da waxanden wara dagana Hexoroona. A ga ro deben di baane, serun xusanta xaaruyen girindi nan ti : « I da Banisirayilaranko Alla waxanden wara katta o yi, yelli a na o kari na o ɲama. » 11 I da haare wara na filisitinun yinmankon su xiri. I ga kahu me yi, i ti i da : « Xa da Banisirayilaranko Alla waxanden wara dagana i batten di, a nan maxa ri o kari na o ɲama. » Bawo kallen ɲi ga da deben haga ti kiilugiriyen ŋa, Alla xa kitten ɲi ga ɲa i kanma. 12 Hari i beenu ga ma kara, hunbunnen xenu i ya. Sonqoxannen sege do kanmun ŋa.