1 Samuyeli 6

[Tunka Duumanten waxandi sennen saageye Banisirayila]

da xasu ɲeeri ya ɲa filisitinun ɲiiɲen kanma. 2 Ken halle, i da i diinanyingumun do i haayindaanun xiri, nan ti i da : « O na mani ɲaana waxande ke yi ? Xa da moxo ko o da, o ga ra wa a walla i batten di. » 3 Yingumun do haayindaanun ti i da : « Axa ga wa a munda na Alla waxanden wara dagana kundun ŋa, xa da ho yogo bugundi a da, axa na jaare, axa na a tu mani saabu da, a ma i kitten tigiti axa yi. » 4 Filisitinun ti kendi : « O na mani sadaaxa kinni a yi ? » I jaabindi nan ti : « Kan xunturu karagi na i dabari xoyi hunbunnen moxo, ado kan xunturu karagi na i dabari xoyi gajan giyan moxo, nan ɲoro ti filisitinun yinmankon haqen ŋa, bawo ke maasiba yinme ya n da axakun do axa yingumun kita. 5 Xa da kaŋu ku dabari hunbunnen giyan kanma, ado gajan giyan kanma, ken be ga da ɲiiɲen soxo, axa na tunkaaxun saaga Banisirayilaranko Alla yi, ken ga na ɲa, a yogo di, a wa i kitten hegolondini axa do axa allanun kanma do axa ɲiiɲen kanma. 6 Manni axa ga wa axa sondonmun xotondini xoyi Misirankon do Firawuna moxo ? Alla ma i katu ti masiiban ŋa ma i ga wa Banisirayilaranko xatana ba ? 7 Kendi saasa, xa da wotoro kurunba dabari, ado naasugundaanu hilli be naansolle ma saxu i xannen ŋa abada. Axa na naayaxaru ku hilli siiti wotoron ŋa, na i renmun saagandi dagana gallen di. 8 Axa na Tunka Duumanten waxanden wutu, na a wara wotoron di, axa na waxande tana saxundi a kaaran ŋa, na kaŋun wara a di, ku beenu ga wa riini ɲa axa sadaaxan ŋa, kendi axa na a wara dagana. 9 Xa da a koroosi, a nda i jonkoyi Banisirayila baŋen ŋa katti Beeti-semesi yi, ken wa a koyini nan ti aken ya nda ke masiiba xote yanqandi o kanma. Nxa, a ga na jonkoyi baŋe tana yi, o wa a tuunu kendi nan ti aken kitten he, masiiba ya ni tanni, a ga yanqa o kanma. »

10 I da ke dabari, na naasugundaanu hilli wutu na i siiti wotoron ŋa, na i renmun hilli yetu gallen di. 11 I da Tunka Duumanten waxanden wara wotoron di, ado waxandi baane be gajan do hunbunnen giyan kaŋinman ga wa a di. 12 Naayaxarun hilli da i jonkoyi Beeti-semesi baŋen ŋa, i wa kanma nan tere nan xaasa, i ma ɲenge hari honne do taye yi walima nooginbaŋe. Filisitinun yinmankon tere da i halle yi ma i ga wa kiɲene Beeti-semesi gingun ŋa.

13 Ken haxati da a ɲi Beeti-semesinkon wa alikaama hatene holonberan di, i xusanta haayindi, i da gemuxannen waxanden wari, i ɲaxali moxosiri ti a wariyen ŋa. 14 Wotoron kiɲe Yuusawu ten di Beeti-semesinke ga ni, a sigi non ŋa gidi dinka kaaran ŋa. I da wotoron yittun xoso-xoso, na naayaxarun hilli ɲa sadaaxa xuruminte yi Alla da. 15 Leewikaarankon ɲi ga da Tunka Duumanten waxanden yanqandi, ado waxandi baane ke be ga ɲi a kaaran ŋa kan dabarintun ga wa a di, i da i hilli saxundi gidi dinkan kanma. Ken koota su yi, Beeti-semesinko da sadaaxa xuruminte do sadaaxa tananu bugundi Tunka Duumanten da. 16 Filisitinun yinmankon karagi ga da ke su wari, i saage ken koota kutte su di Hexoroona.

17 Hunbunnun kaŋinma be filisitinu ga da a ɲa sadaaxa yi Tunka Duumanten da, kan baane su ɲi debi baane ya toxo yi, ku debu karagi di : Sidoodo, Gaaja, Saxaloona, Gaata, do Hexoroona. 18 Kan gajanun ɲi filisitinun yinmankon karagi debun haqen ya yi, debe be koorinten wa ti kobi ya walima hi be xa koorinte ga he. Gidi dinka be, i ga da Tunka Duumanten waxanden saxu a kanma, hari lenki ken wa no, a wa Yuusawu ten di, ken be ga ni Beeti-semesinke yi.

19 Tunka Duumanten da bone xeyi Beeti-semesinkon da, bawo i da gemuxannen waxanden noxon haayi, a da tanɲeere yugo kari tankarage wujunu di. Jaman sonqo, bawo Tunka Duumanten da i katu ti ke masiiba xoore yi. 20 Kendi Beeti-semesinko ti : « Ko ra wa sikki ke Tunka Duumante Alla senne kaane ? Oku xa wa ke waxande walla dagana minna ? » 21 Ken halle, i da haaru wara dagana katta Xiriyaata-yarimi taaxaanun ŋa nan ti i da : « Filisitinun da Tunka Duumanten waxanden saagandi, xa ri a wutu dagana axa noqun ŋa. »