7
Xiriyaata-yariminkon ri,
na Tunka Duumanten waxanden wutu,
nan daga ti a yi Habinadaabu kaara,
siŋan kanma,
na a renyugo Lajaari senondi na a ɲa Tunka Duumanten waxanden tangandaanan ŋa.
[Samuyeli ɲaaye Banisirayilarankon kiitikutaanan ŋa]
2 Waxanden wara halle Xiriyaata-yarimi,
na waxati laate ɲa,
tanpille siine haqe,
Banisirayilaranko soxoodun su raxaduxaasa Tunka Duumanten ŋa.
3 Kendi Samuyeli ti i da :
« Genni axa sondonmun ga xalasi katta Tunka Duumanten ŋa,
xa da boorinu ku batiyen raqewara na axa allayaxaru Sitarootinu sedi.
Axa na axa jonkoyi Tunka Duumanten baane yi na a batu,
ken ga na ɲa,
a wa axa kisindini filisitinun ŋa. »
4 Kendi,
Banisirayilaranko da i allayugu Baalinu su sedi na allayaxaru Sitarootinu sedi,
na Tunka Duumanten baane batu.
5 Ken halle,
Samuyeli da yaamariyen kini nan ti :
« Banisirayilarankon su nan kahu me yi Micipe,
n wa Tunka Duumanten ɲaagana axa da non ŋa. »
6 I su kahu me yi Micipe,
na jin bugundi na a joxu ɲiiɲen kanma Tunka Duumanten jon di,
na ken kootan suumu,
nan xiire ti i junuubunun ŋa,
nan nimisi i junuubunun di katta Tunka Duumanten ŋa.
Non ya ni Samuyeli ga ɲa Banisirayilaranko yinmanken ŋa.
7 Filisitinun ga da a mugu nan ti Banisirayilaranko kahuma me yi Micipe,
i yingumun gemu a di nan daga i gaja.
Ke xibaare da Banisirayilaranko kanundi.
8 Kendi,
i ti Samuyeli da :
« Maxa Tunka Duumanten gangunden wara,
o Alla,
a na o kisindi filisitinu hankan ŋa. »
9 Samuyeli xusanta jaxalentolla raga,
na a da i moxon su ɲa sadaaxa xuruminte yi Tunka Duumanten da,
kendi na Tunka Duumanten gangu Banisirayilaranko da,
Tunka Duumanten xusanta a duwaawun jaabi.
10 Na Samuyeli toxo sadaaxabakken ŋa,
Filisitinun tinto yelli na Banisirayilaranko gaja,
Tunka Duumanten xusanta herenqeɲi xoore girindi filisitinun ŋa na i kanundi Banisirayilarankon ŋa,
i katta i da.
11 Banisirayila gajanyugun bugu do Micipe baŋen ŋa na filisitinun haraxatu,
i wa na i kari ma Beeti-kaara wure.
12 Kendi,
Samuyeli da gide wutu na a sigindi Micipe do Senni naxa,
na a xiri Hebeni-yeseeri [a wure ga ni :
deemanden gide] nan ti :
« Ma yere ya ni Tunka Duumanten ga da o deema. »
13 Filisitinun xose,
nan maxayanqa,
i maxa ro xadi Banisirayilaranko ɲiiɲen di,
Tunka Duumanten xa katunden toxo filisitinun kanma Samuyeli waxatin su.
14 Filisitinun ga ɲi ga da debu be raga Banisirayilarankon ŋa Hexoroona do Gaata naxa,
i saage Banisirayilarankon ŋa,
kahunu mara ke ɲiiɲa kutten ŋa.
Filisitinun maranden xa giri bakka Banisirayilarankon kanma.
Ayiwa,
genmen xa ɲi Banisirayilaranko do Hamoorikaarankon naxa ke haxati yi.
15 Samuyeli ɲa Banisirayilaranko kiitikutaanan ŋa,
a bireyen su.
16 Siine su,
a ɲi dagana yaala ku debu sikki di :
Beeti-yeli,
Giligaali do Micipe,
nan kiitikuti i di.
17 Kendi,
a wa saagene dagana i noqun xa yi Raama,
nan kiiti Banisirayilaranko naxa.
Non ya ni xa,
a da sadaaxandinoqun taga Tunka Duumanten batiyen da.