[Sawulu ɲaaye Banisirayila tunkayugon ŋa]
(1 Samuyeli 8-10)
[Banisirayilaranko tunkayugumuuruye]
8
Bire be,
Samuyeli ga xaso,
a da i renmun sugandi yinmanku yi Banisirayilaranko da.
2 A sooman toxon ɲi Yooweli,
hillandin ɲi Haabiya yi,
i ɲi kiiten kutunu Beeri-seba.
3 Nxa,
renyugu ku ma ɲi haaben killen kanma,
ikun ɲi xaalisixannaanu ya yi,
i ɲi wurunhon ragana na kiiten ɲengendi.
4 Ken ga ɲa,
Banisirayila xirisun su kahu me yi nan ri katta Samuyeli yi,
Raama.
5 I ti a da :
« A haayi,
anken xaso,
an renmun xa nta an killen kanma,
kendi,
tunkayugo kini o yi,
a nan kiiti o kanma xoyi xabiila kuttun moxo. »
6 Ke ma liŋo Samuyeli da,
i ga ti :
« Tunkayugo kini o yi,
a nan kiiti o kanma.
» A xusanta na Tunka Duumanten ɲaaga.
7 Alla ti a da :
« Banisirayilarankon terinka,
i ga wa ho wo ho konni.
I ma bara anken ŋa de,
i bara inke ya yi,
yelli n nan maxa i mara.
8 I ga da gollu beenu ɲa inke yi,
n ga da i bugundi bakka Misira nan ri a wara lenki yi,
na in toxono na kamanu tananu batu,
i wa na ken me ya ɲa anken ŋa saasa.
9 I terinka,
nxa,
i gongo,
an na i xibaari ti tunkayugon haqen ŋa i kanma. »
10 Samuyeli da Banisirayilaranko xirisu beenu ga da tunkayugo mundu,
xibaari ti Alla sehi koninten su yi.
11 A ti :
« Tunkayugon haqen ga ni ke be yi,
a haayi ke yi :
a wa axa renyugun ɲaana i gajanwotoronun wurundaanun ŋa,
na yogonu ɲa sinsettaanun ŋa,
na yogonu ɲa kun wa wurunu a yinme wotoron kaane.
12 Yogonu wa ɲaana wujune sorodaasi yingume yi,
yogonu xa wa ɲaana tankarage sorodaasi yingume yi,
yogonu wa a ten soxono,
na a hata,
yogonu wa ɲaana a gajanyokkun do a wotoronyokkun dabarindaanun ŋa.
13 A wa axa renyaxarun ɲaana timaliŋidabaraanu do sorondaanu do buurukattaanu yi.
14 A wa axa teenun ho sirun wutunu,
ken do axa resennaaxo do axa jayituunu,
na i kini i gajanyugun yingumun ŋa.
15 A wa axa soxohoonun do axa resennaaxo taxanditanmundin wutunu na a kini i golliɲaŋaanun do i hankan hiyaaxabugundaanun ŋa.
16 A wa axa komiyugun do axa komiyaxarun wutunu,
na axa honnanxayun ho senbentun wutu,
do axa tanmisun do axa harun ho sire na i gollindi i yinme da.
17 A wa axa tanmisun taxanditanmundin ragana,
na axa yinme komaaxundi.
18 Ayiwa,
koota wa riini,
axa wa raxaduxaasana katti Tunka Duumanten ŋa,
yelli a na axa kisindi bakka ke tunkayugo be,
axa ga da a sugandi axa du da.
Tunka Duumanten nta riini axa jaabi ken kootan ŋa. »
19 Xirisun bara Samuyeli terinkana,
i ti :
« Ayi,
o wa tunkayugo ya munda.
20 O n ɲa xoyi seri kuttun moxo,
tunkayugo nan kiiti o kanma,
na o geesu,
na o gajaŋun ɲa o da. »
21 Samuyeli da jaman sehen su terinka,
na a saagandi Tunka Duumanten da.
22 Tunka Duumanten ti Samuyeli da :
« I terinka,
an na tunkayugo kini i ya.
» Kendi,
Samuyeli ti Banisirayilaranko xirisun da :
« Xa daga,
baane su n daga i deben di. »