1 Samuyeli 9

[Samuyeli do Sawulu mewariye]

Haxati yi, Beniyamiina soxoode ɲi no, a toxon ni Xiisu, yugu saage ya ni. A haaba ni Haabiyeli yi, ken haaba ni Sorooro yi, ken haaba ni Bexoraata yi, ken haaba ni Haafiya yi. 2 Renyugo ɲi a maxa, a toxon ni Sawulu, honnanxayi haranpare, yugo ma ɲi Banisirayila, a ga ɲi a bakka. A ɲi ga n giila beesu yi, a yinmen wa beesu kanmara.

3 Koota yi, Sawulu haaba Xiisu hariyaxarun sanku, a ti i renme Sawulu da : « Yugunninlen baane wutu do an batte, an nan daga harun mundu. » 4 I daga nan dangi Hefarayimu gidinsiŋanun ŋa, nan daga Saalisa maran di, i ma i wari no. I dangi nan daga Saliimu maran di, i ma i wari non xa yi. I dangi nan daga Beniyamiina maran di, i ma i wari non xa yi. 5 Bire be, i ga kiɲe Cuufu maran di, Sawulu ti i yugunninlenmen da : « Li, o n saage, ke bire n haaba mungu harinhin ŋa, a wa yi nan sinme do oku yinme ya yi. » 6 Yugunninlenmen ti a da : « N yinmanke, an ma a wari, Alla seren ya na ke debe di yere, serixoore ya ni, a nda ho wo ho ko, a wa ɲaana. Li, o n daga a noqun ŋa, a me wa a di, a na o xibaari, o ga n xawa dagana do kille be yi. » 7 Sawulu ti i yugunninlenmen da : « O nda daga, o wa mani kinni yugon ŋa ? Silahandan ntaxa o maxa. Ho wo ho tana nta no, na a kini a yi ! » 8 Yugunninlenmen saage na a jaabi : « Godixullin galaŋe wa inke maxa, o wa ken kinni yugon ŋa, a na o killen xibaaren ko o da. » 9 Nan xaso, maxa, i ga na ɲi dagana hiiduxure Alla maxa, i tini ya, xa ri o n daga warindaanan ne. Lenki, ken ya wa xilli . 10 Sawulu ti i yugunninlenmen da : « A siro ! Li, o n daga. » I xusanta jokki do allansere ke noqun sagatanden ŋa. 11 I segento katta deben ŋa, i da xusu wari dagana ɲoŋo. I ti i da : « Haayindaanan wa yere ba ? » 12 I xusanta ti : « Yabo, a wa axa kaane ! A ri deben noxon di lenki, bawo, serun wa xurusindini lenki allabatiran ŋa, kendi, xa daga hane. 13 Axa nda ro deben di baane, axa wa a walli, katti a ga wa dagana allabatiran ŋa nan yige, bawo serun nta yigene ma a ga na ri nan duwa sadaaxan ŋa, kendi, seri xirintun wa yigene. Xa daga saasa, axa wa a ɲiini no. » 14 Sawulu do i yugunninlenmen xusanta daga deben di, i ronten xusanta Samuyeli wari riini katta i ya, a wa dagana allabatiran ŋa.

15 Nxa, na Sawulu riiyen saama ti koota yi, da ken bangandi Samuyeli da nan ti : 16 « Xunbane do ke haxati, n wa yugo xeyini an da bakka Beniyamiina maran di, an na ten surundu a kanma na a ɲa tunkayugo yi n jama Banisirayilarankon kanma. A wa i kisindini bakka filisitinun maxa, bawo n haayindi katti in jama ke yi, i sonqoxannen kiɲe in ŋa. » 17 Samuyeli ga da Sawulu wari, Tunka Duumanten ti a da : « Ke ya ni, n ga da yugo be hin ko an da. A ya wa in jaman marana. » 18 Yere, Sawulu tinto Samuyeli yi karaŋan raxaxooren ŋa nan ti a da : « Siro in da de, haayindaanan kan na minna ? » 19 Samuyeli ti a da : « Nke ya ni haayindaanan ŋa. Ware in kaane, o n daga allabatiran ŋa. Axakun hilli wa yigene do in batte lenki, soxuban ŋa, n wa an xibaarini ti ho wo ho ga wa na an hanmi, n na an rawara. 20 Hariyaxaru be ga sanku an da bito sikki lenki, maxa kanu i wure, i wari baati. Ho wo ho ga wa Banisirayila hosire yi xa, a waranten wa ko da ? Anken ya he ba, an do an haaba kaadunko ? » 21 Sawulu xusanta ti : « Nke ni Beniyamiinakaaranke ya yi, n xabiilan ya ni Banisirayilaranko xabiilanun su ho tugunnen ŋa, n boronlaqen ya ni Beniyamiinakaara su jaman ho tugunnen ŋa, anken xa wa ke sehe konni nke da mani yi ? »

22 Samuyeli da Sawulu do i yugunninlenmen rondi yigeran ŋa, na i taaxundi i yinme kaaran ŋa, a da a ɲi tanjikke sere me xirinte wa no. 23 Samuyeli ti sorondaanan da : « N ga ti an na taqe be taaxundi an maxa, li ti a yi. » 24 Sorondaanan xusanta ri ti togen do i kapamaxaadun ŋa, na i saxundi Sawulu wure. Kendi Samuyeli ti : « Ke na an taqen ya yi, a wara an jon di, an na a yiga. O da a taaxundi an da lenki ya xannemaxa, an na a yiga do seri xirintun batte. » Sawulu yige do Samuyeli batte ke kootan ŋa.

25 Ken halle, i saage bakka allabatiran ŋa nan daga deben noxon di. Samuyeli masala do Sawulu batte bilin kanma. 26 Fajirin ŋa, Samuyeli giri na Sawulu gangu bilin kanma nan ti a da : « Giri, n na an rawara. » Sawulu giri, Samuyeli bugu do a batte, a wa a walla kille. 27 I ga tinto deben kaaran ŋa, Samuyeli ti Sawulu da : « A ko an yugunninlenmen da, a nan daga o kaane honne. » Ken xusanta daga i kaane. Samuyeli ti Sawulu da : « Sigi, n na Alla sehexannen ko an da. »