1 Samuyeli 10

[Ten surundiye Sawulu kanma na a ɲa tunkayugo yi]

Ken halle, Samuyeli da tengubon wutu na a surundu Sawulu yinmen di na a sunbu-sunbu nan ti : «  da an sugandi yinmanke yi, i jaman kanma. 2 An ga na daga bakka yere lenki, an do yugu hilli wa genme Raheli xaburun baŋen ŋa, Seelisa, Beniyamiina gingun ŋa. I hilli wa tini an da : “ An ga daga hariyaxaru be mundu, i wari, an haaba mungu do harun xibaaren ŋa, a sinmeyen su na axakun ya kanma saasa, ma a ga wa tini : ‘ Nke wa mani ɲaana, n ga wa in renme ke walli ? ’ ” 3 An wa jokkini do an killen ŋa ma an ga kiɲe Tabooro yitti xooren ŋa, an do yugu sikki wa genme non ŋa, i wa dagana bati Beeti-yeli allabatiran ŋa. Hana, sugunlenmu sikki wa ken maxa, hillandi, buuruyinmu sikki wa ken maxa, sikkandi, girihe hakka resenji wa ken maxa. 4 I wa an kuuɲini na buuruyinmu hilli kini an ŋa, an na i raga. 5 Ken dangi halle, an wa kiɲene Gibeeya-elohimi, filisitinun kurinlentangandaanun yogonu ga wa noqu be. An ga na tinto deben ŋa, an do jama wa genme bakka allabatiran ŋa, xooran do ɲanɲooren tinmaanu, dinmen do huligumun wa i kaane, nooron yanqanten wa i kanma i wa nan xibaarindi. 6 Tunka Duumanten hanken wa xusanta yanqa an kanma ti senbe yi, an wa xibaarindini kapa i ya, an wa ɲaana yugo tana yi. 7 Ku taagumansu su ga na ɲa bire be, an ga ra wa ho wo ho yi, ken dabari, bawo Alla wa da an ŋa. 8 An nan daga in kaane Giligaali. N wa riini an ne, na sadaaxa xuruminte bugundi, ado allatiigeyinsadaaxa. An nan terinkandi no bito ɲeeri, ma in ga ri an ŋa, na an xibaari, an ga n xawa ke be ɲaana. »

9 Sawulu ga da i halle koyi bakka Samuyeli noqun ŋa, Alla xa da a sondonmen yilla ya de. Ken koota baane su di, sehi koninten su ɲa i moxon di. 10 Sawulu do i yugunninlenmen ga kiɲe Gibeeya, annabinyinmun jama da a gemu, Alla hanken xa yanqa a kanma ti senbe yi, a xusanta xibaarindi kahunu i ya. 11 Ku beenu su ga ɲi a tu nan xaso, i ga da a wari xibaarindini do annabinyinmun ŋa, i ti me da : « Mani xa hi nan ɲa Xiisu renmen da ? Sawulu xa ɲa annabinyinme yi ba ? » 12 Baane ɲi jama ke di, ken ti : « Ku annabinu yinmenu, i haabanu ni ko yi ? » Gelli ken, ke ɲa taali yi : Sawulu xa ɲa annabinyinme yi ba ? 13 Sawulu ga duguta xibaarinden ŋa, a daga allabatiran ŋa.

14 Kendi, Sawulu haabatugunnen ti a do i yugunninlenmen da : « Axakun ɲi ga daga minna ? » A ti : « O ɲi ga daga harimundi, o ga ma i wari, o daga Samuyeli ne. » 15 Sawulu haabatugunnen ti : « Samuyeli ga da hi be ko axa da, a ko in da ! » 16 Sawulu ti : « A ti o da, harun wari. » Nxa, Samuyeli ga da hi be ko a da tunkayugaaxun hin di, a ma ken laxami a da.

[Sawulu tunkaaxun bangeye]

17 Samuyeli da xiri, i n ri allabatiran ŋa Micipe. 18 A ti i da : « Ke haayi, Tunka Duumante, Banisirayila Alla ya sehe yi : “ Nke ya n da Banisirayilaranko bugu Misira, na axa kisindi Misiranko komaaxun ŋa, ado marande kutte be su ga da axa dexu. ” 19 Nxa saasa, axa bara axa Kaman be ga wa axa kisindini bakka axa tooranun do axa tanpiyun ŋa nan ti : “ O nta ho wo ho di, tunkayugo wara o yinmen di. ” Kendi saasa, axa su n ri sigi Alla jon di, xabiila-xabiila, boronlaqe-boronlaqe. »

20 Samuyeli da manen wutu Banisirayilaranko xabiilan su do me naxa, manen ɲoro Beniyamiina xabiilan ŋa. 21 Ken halle, a da manen wutu Beniyamiina xabiilan do me naxa, a gemu Maatiri boronlaqen ŋa. Lagarun ŋa manen ri gemu Xiisu renyugo Sawulu ya. I da a mundu, i ma a wari. 22 I xusanta Tunka Duumanten tirindi kendi : « Yugo ke ri yere ba ? » Alla ti i da : « Yabo, a fuxunten ya na yokkun do me naxa ! » 23 I wuru nan daga do a batte na a riiti. A ga sigi jaman di, a ɲi ga n giila beesu yi, a yinmen wa beesu kanmara. 24 Kendi Samuyeli ti jaman su da : « Tunka Duumanten ga da ke be sugandi, axa yaaxe wa a yi ba ? A me nta jama ke su di. » Jaman su xusanta henti nan ti : « Ari na tunkayugon birandi ! »

25 Kendi, Samuyeli da tunkayugon haqenun do a waajibinun moxoko jaman da, na i saha kitaabe di na a saxundi allabatikan di, ken halle Samuyeli da jaman rawara, baane su daga i kaara. 26 Sawulu xa daga i kaara Gibeeya. Jama daga do a batte, yugu saagu, Alla ga ɲi ga kati i xa sondonmun ŋa. 27 Nxa baataranserun ti : « Ke ra wa o kisindini kan moxo ? » I da a baataranlaga, i ma duŋe darontanho kinni a yi, nxa, Sawulu ma ken jaate.