[Sawulu maranden siini hananu]
(1 Samuyeli 11-15)
[Sawulu kattaye Hamoonirankon da]
11
Hi halle,
Hamooni tunkayugo Nahaasi sege na Yaabesi raqeraga Gilaadi.
Yaabesi serun su ti a da :
« Lahidu wutu o da,
o n xaaye an da. »
2 Nahaasi ti i da :
« A siro,
n wa lahidu wutunu axa da,
a saratin ni :
n na baane su yaaxi tayen kara.
Ken nan ɲa saxamu yi Banisirayilaranko su kanma. »
3 Kendi Yaabesi xirisun ti a da :
« O terinka bito ɲeeri,
o na haare wara dagana Banisirayila baŋen su yi,
o ga ma sere kita na o kisindi,
o wa o du kinni an ŋa. »
4 Haarun ga kiɲe Sawulu deben di,
Gibeeya,
na ke sehe koni,
jaman su sonqo.
5 Ken da a ɲi,
Sawulu wa saagene bakka gunnen di ti i naanun ŋa.
A ti :
« Mani xa n ɲa ?
Manni serun ga wa sonqono ?
» Haarun ga da Yaabesi sehe be ko,
i da a hilla a da.
6 Sawulu ga da ke sehe mugu,
Alla hanken yanqa a kanma ti senbe yi,
a butu moxoburu xa.
7 A xusanta naanun hilli raga na i xurusi na i kutu-kutu na i kettun xeyi do haaru ku yi Banisirayila noqun su,
nan ti :
« Sere be ga ma bugu nan daga gaja do Sawulu do Samuyeli batte,
an naanun lagarun ɲaana kundu ya.
» Tunka Duumanten ga xusanta kannen yanqandi i sondonmun di,
i su xusanta bugu doome.
8 Bejeexa noqun ŋa,
Sawulu da i jaate :
Banisirayila yugun ɲi kamu sikki wujunu,
Yehuuda yugun ɲi tanjikke wujunu.
9 I ti haaru ku da :
« Xa da a ko Yaabesi jaman da ti :
“ Xunbane katta kinsiga,
axa wa kisini.
” » Haarun saage na xibaaren ko Yaabesi jaman da,
i xusanta ɲaxali.
10 Kendi,
Yaabesi serun ti Hamooninkon da :
« Xunbane,
o wa du kinni axa yi,
hi be ga liŋi axa da,
axa wa ken ɲaana o yi. »
11 Ken yillankara,
Sawulu da kuren taxandi taxandiraanu sikki,
nan ro xonnun daaxan di na soxuban saama.
A da Hamoonirankon kari ma kinsigan haxati,
ibeenu ga ma kara,
kun sanqi,
hari seru hilli ma ɲi doome xadi.
12 Banisirayilaranko ti Samuyeli da :
« I beenu ga ma ɲi a munda Sawulu nan ɲa tunkayugo yi,
i na minna ?
Xa da i kini o yi,
o na i kari ! »
13 Nxa Sawulu ti :
« Lenki me koota,
o nta xawa sere kalli,
bawo Tunka Duumanten da kattaye kini Banisirayilaranko ŋa lenki ya. »