[Samuyeli sehe Banisirayilaranko da]
12
Samuyeli ti Banisirayilaranko da :
« A haayi,
a xa ga da hi be mundu,
n da a ɲa axa da :
n da tunkayugo taaxundi axa yinmen ŋa.
2 Saasa,
aken ya na axa geesunu,
bawo nke xaso,
n yinten xura,
n renmun kun wa yere,
i wa do axa ya batte.
Nke ya n da axa geesu gelli in leminaaxu ma lenki.
3 Ken ya saabu da,
n haayi ke yi Tunka Duumanten jon di,
a da a ga da tunkayugo be sugandi,
jaragi ga wa ke be maxa katta in ŋa,
a na a ko :
n da sere na fayi ba,
walima a hare ?
N da sere naha wutu in yinme da ba ?
N da sere tooro ba ?
N da wurunhon raga sere yi,
na in yaaxen texe a hoburen kanma ba ?
Genni ke yogo ga ɲa,
n wa a saagana axa yi. »
4 Banisirayilaranko da a jaabi nan ti :
« Ke ma ɲa,
an ma o naha wutu an yinme da,
an ma o tooro,
an ma wurunho raga sere su yi. »
5 Samuyeli ti xadi :
« Kendi,
Tunka Duumanten do tunkayugon ni nke seedan ŋa lenki,
nan ti,
ho wo ho nta axa maxa na in jaragi ti a yi.
» I ti :
« Toŋu. »
6 Samuyeli ti xadi :
« Tunka Duumanten ya n da axa kisimanu bugundi Misira ti Muusa do Haaruna yi.
7 Kendi saasa,
xa sigi,
Tunka Duumanten ga da gollu siru beenu ɲa axa serihananun da,
n na i jaate axa do a jon di.
8 Yaaxuba ro halle Misira,
axa kisimanu ga toore,
i raxaduxaasa Tunka Duumanten ŋa,
a da Muusa do Haaruna wara na i bugundi Misira na i taaxundi ke jamaane di yere.
9 Nxa,
axa kisimanun mungu Tunka Duumanten ŋa,
i Kama,
ken ya saabu da,
a da Siseera¤ xeyi i da,
Hacooro deben kurinyingume,
ado filisitinun do Mowaaba tunkayugo,
na i gaja nan katta i da.
10 « Ken ga ɲa,
i raxaduxaasa Tunka Duumanten ŋa xadi nan ti :
“ O Kama,
o da an kuta,
bawo o bara an ŋa,
na Baali do Sitarooti* munonun batu,
nxa saasa,
o kisindi o xonnun ŋa,
o na an batu.
11 Ken ga ɲa,
Tunka Duumanten da inke Samuyeli do Yerubaali¤ do Bedaani¤ ado Yifuta¤ xeyi,
na axa bugu axa taaxanlenxonnun kitten di,
kendi,
axa haqiritaaxunton taaxu jamaanen di.
12 Bire be,
axa ga da a wari,
Nahaasi,
Hamoonirankon tunkayugon wa na axa ɲongoti,
axa ti in da,
n na tunkayugo wara axa yinmen di,
na a toxo Tunka Duumanten yinme,
axa Alla ya ni axa tunkayugon ŋa.
13 A haayi,
axa ga da tunkayugo be mundu na a sugandi,
Tunka Duumanten da ken kini axa yi.
14 Kendi saasa,
genni axa ga wa kanna Tunka Duumanten ŋa,
na a batu,
axa wa a sehexannen su terinkana,
axa n maxa a yaamariyun mesooxi,
kendi axakun do axa tunkayugon hin su wa sirono.
15 Nxa,
axa ga bara Tunka Duumanten terinkana,
nan bara a yaamariyun batunu,
a wa i katudaŋen koyini axa yi,
xoyi a ga da a koyi axa serihananun ŋa moxo be.
16 « “ Kendi saasa,
xa sigi,
axa na ke hi xoore be Tunka Duumanten ga wa riini a ɲa axa jon di haayi.
17 A haayi,
saasa ni yillihatawaxatin ya yi,
nxa,
n wa Tunka Duumanten ɲaagana,
a na kangidinlenmen do kanmen xeyi,
axa wa a tuunu kendi ti,
axa da hoburi xoore ɲa Tunka Duumanten ŋa,
axa ga da tunkayugo mundu. ” »
18 Kendi,
Samuyeli da Tunka Duumanten ɲaaga,
a xusanta na kangidinlenmen do kanmen xeyi ken kootan su yi,
jaman su xusanta kanu Tunka Duumanten do Samuyeli yi,
kanuyi xote.
19 Kendi,
jaman su ti Samuyeli da :
« Deemande mundu Tunka Duumanten maxa,
an Kama,
an komun saabu da,
o nan maxa ri kara,
bawo,
o da hobure kahu o junuubunun ŋa,
o ga da tunkayugo mundu. »
20 Samuyeli ti jaman da :
« Xa maxa kanu,
toŋu,
axa da ke hobure su ɲa,
nxa,
xa maxa ɲenge bakka Tunka Duumanten ŋa xadi,
xa da a batu ti axa sondonmen su yi.
21 Xa maxa sigi boorinun na axa samundi,
i nta naha sirono,
i nta kisindini,
bawo hoxafuunun ya ni.
22 Nxa,
axa na a tu,
Tunka Duumante,
a toxo xooren saabu da,
a nta axa rawarana,
bawo,
a yinme ya n da axa sugandi i jama yi.
23 Nke be ga ni,
Ari na in kisindi junuubun ŋa,
n nan bara duwana axa da,
nxa n wa axa tuwindini killi teleŋonta siren ŋa.
24 Kendi,
xa kanu Tunka Duumanten ŋa,
axa na a batu ti xalasiye yi,
ti axa sondonmen su yi,
axa nan sinme a ga da gollu xooru beenu ɲa axa da.
25 Nxa,
axa nda hobure ɲa,
axa do axa tunkayugon wa halakini. »