[Samuyeli doxoye Sawulu ya]
13
Sawulu ga ɲi maranden joŋana,
a wuyu ɲi [tanjikke] siine,
a da [tannaxate*] do siinu hilli ya ɲa Banisirayila yinmen ŋa.¤
2 Sawulu da wujunu sikki yugo sugandi Banisirayilarankon di,
wujunu hilli ɲi da a yinme batte Miximaasi do Beeti-yeli gidinsiŋanun baŋen ŋa,
wujune ɲi do Yoonata batte Gibeeya,
Beniyamiina maran di,
a da kuttun saagandi dagana i kaanun di.
3 Koota yi,
Yoonata da filisitinun kurinkitti yingume be ga wa Geeba kari,
filisitinun da ken mugu.
Sawulu xa da yaamariyen kini na buutun huute jamaanen su di yelli Habaraaninun na a mugu.
4 Banisirayilarankon su xa xusanta na xibaaren mugu nan ti,
Sawulu xenu filisitinun ŋa,
ayiwa,
ku hiinu da filisitinun butundi.
Banisirayilaranko kahu me yi Sawulu halle Giligaali.
5 Filisitinun ɲa kure yi na Banisirayilarankon gaja,
tanjikke wujunu wotoro ɲi i maxa do wujunu tunmi siigume,
ado kurinlen gabe xoyi seyijura.
I daga i daaxan dabari Miximaasi,
Beeti-weeni kinbakkan ŋa.
6 Banisirayilaranko ga da a wari hin gemumoxon ntaxa i maxa,
bawo,
filisitinun ɲi ga liixindi i ya,
i fuxu gidinkunmun do gunbanun do hatanun wure do gedi xasun di.
7 I yogonu da Yarade haŋen kutu nan daga Gaadi do Gilaadi maran di.
Nxa Sawulu yinme toxo Giligaali,
yugo su ga ɲi do a batte,
a su ɲi sarallene kannen maxa.
8 Sawulu da bito ɲeeri terinka xoyi Samuyeli ga da a ko a da moxo be*.
Nxa Samuyeli ma ri,
kurinlenmun toxo hate-hatene bakka Sawulu yi.
9 Sawulu ti kendi :
« Xa ri ti sadaaxa xuruminte do allatiigeyinsadaaxa yi.
» Sawulu yinme da sadaaxa xuruminte ke gollun ɲa.
10 A ga duguta a gollun ŋa,
Samuyeli xusanta kiɲe,
Sawulu bugu na a kuuɲi.
11 Samuyeli ti a da :
« An da mani dabari ke yi ?
» Sawulu ti :
« N da a wari jaman wa nan hate-hate bakka in ŋa,
anken xa ma ri waxatin gemundi,
ayiwa,
filisitinun xa kahumanten wa me yi Miximaasi,
12 n ti,
i nan maxa ri xenu in ŋa Giligaali yere,
na a toxo,
o ma deemande mundu Tunka Duumanten ŋa.
Ken ya saabu da,
n ga hanqe a kanma na ku sadaaxanu xurumindi ! »
13 Samuyeli ti Sawulu da :
« An da hontuwanbalaaxu ɲa,
an ma golli ti an Kama,
Tunka Duumanten yaamariyen ŋa,
a ga da an yaamari ti ke be yi,
an ga ɲi gollini ti ken ŋa,
Kamane ke ɲi an tunkaaxun sabatindini Banisirayila kanma bada.
14 Nxa saasa,
an tunkaaxun ntaxa duumene,
Tunka Duumanten da yugo tana sugandi,
ken nan liŋi a yonkin da,
a da a sugandi,
a nan ɲa i jaman yinmanken ŋa,
bawo,
anken ma golli ti a yaamariyen ŋa. »
15 Samuyeli bugu Giligaali.
Kuren kutten daga do Sawulu yi Gibeeya,
Beniyamiina maran di.¤
Sawulu da yugu beenu ga toxo do a batte jaate,
a da a ɲi kamu tunmi yugo me ya ni.
16 Sawulu do i renyugo Yoonata do yugu beenu ga ɲi do i batte ɲi Geeba.
Filisitinun xa daaxanten ɲi Miximaasi.
17 Koota su,
gajaŋaanu yogonu ɲi bakka filisitinun daaxan di debun karayen xannemaxa nan ɲa sapanu sikki yi.
Sapa hanan jonkoyi Hofaara killen ŋa katta Suwaala ɲiiɲen ŋa,
Miximaasi saahilin di.
18 Sapa hillandin daga kinqennan di,
Beeti-horoona killen di,
sikkandin daga kinbakkan di,
do Turunholoŋe gingun killen ŋa,
gunjuran baŋen ŋa.
19 Ke haxati da a ɲi,
tage nta Banisirayila ɲiiɲen su,
filisitinun ɲi ga da i kaba ken ŋa,
yelli i nan maxa ri kaahanun do tanmun dabari.
20 Banisirayilarankon su ɲi dagana filisitinun noqun ŋa na i naantongu,
i tongu,
ado i sagaadun liŋondi.
21 Naantongun do tongun liŋondimuson ɲi genme godixullen garamunu karagi,
saasamaaden do sagaaden do kunsoxaaden sirondimuson ɲi garamunu naxati.
22 Ken ya saabu da,
gajaŋen ga giri koota be,
kaaha walima tanmen ma ɲi sere su maxa Sawulu do i renyugo Yoonata kurinlenmun di.
A ɲi i kun hilli baane lewu ya maxa.
[Yoonata xenuye filisitinun ŋa]
23 Filisitinun gajanyugun yogonun bugu nan daga Miximaasi dangiran ŋa.