1 Samuyeli 14

Koota yogo, Sawulu renyugo Yoonata ti i yugunninlenme, gajanyokkiwutundaanan da : « Li, o n daga filisitinun daaxan di, kaara baane ke yi. » Nxa, a ma ɲi ga da i haaba tuwindi ti ken ŋa. 2 Ken da a ɲi, Sawulu yinme wa Gibeeya kaara baanen ŋa rumaaninyitten wure Migiroona, kamu tunmi yugo ɲi do a batte. 3 Jama ke di, Haya ɲi i naxa, Hayituubu renmen ga ni, ken ga ni Yixabooda waaxi yi, ken haaba ga ni Pinaasi yi, ken haaba ga ni Yeli yi. Aken ya n ɲi sadaaxakiɲandaanan ŋa Silo, a ɲi na i batinxusaaben rondi. Sere su ma seede a yi nan ti Yoonata daga. 4 Yoonata ga daga do kille be yi filisitinun daaxan ŋa, gidu sexetu hilli ɲi no, baanen wa killen kaaran ŋa, kiteeren wa kaara baanen ŋa. Baanen toxon ni Boce, kiteeren toxon ni Senne. 5 Baanen ɲi do saahilin ŋa Miximaasi baŋen ŋa, kiteeren ɲi do hankitten ŋa Geeba baŋen ŋa.

6 Yoonata ti i yugunninlenmen da : « Li, o n daga ku muruntu daaxan di, a yogo di, Tunka Duumanten wa o deemana, bawo ho wo ho ra nta o deemanden kabana, ken nta o gaboyen do o roxoyen ŋa. » 7 A gajanyokkiwutundaanan ti a da : « Hi be ga liŋi an da, ken dabari, nke wa do an batte. » 8 Yoonata ti : « O n daga katti i ya, na o du bangandi i da, 9 i ga na ti o da : “ Xa da o terinka, o n ri katti axa yi non ŋa ”, o wa sikki o batten di, o nta dagana katti i ya. 10 Nxa, i ga na ti : “ Xa ri katti o yi ”, o wa dagana, ken wa ɲaana taagumansen ŋa, ti Tunka Duumanten da o deema i kanma. »

11 I xusanta na du bangandi filisitinun da. Filisitinun xusa ti me da : « He ! Xa da Habaraaninun haayi, i bugu i fuxuranun ŋa. » 12 Daaxan serun da Yoonata do i yugunninlenmen gangu nan ti : « He ! He ! He ! Xa ri katti o yi yere ! O na wallahalaqe kini axa yi. » Kendi, Yoonata ti i yugunninlenmen da : « Li do in halle yi, Tunka Duumanten na i ro kitten di. » 13 Yoonata sege katti i ya, i taanun hilli do i kittun hilli kanma, a yugunninlenmen wa do a yi. Filisitinkon xusa xenu-xenu Yoonata kaane, a yugunninlenmen wa na i kari-kari a halle. 14 Ke xenni hana di, Yoonata do i yugunninlenmen da tanpille me yugo ya kari biranne di, a nta dangini sogoɲu dantanu di. 15 Kurinkitten su kanu, i beenu sanqinten ga ɲi gunnen di, ado beenu ga ɲi daaxan di, ado gajaŋaanan kutten su, ɲiiɲen xa saralle nan ɲa kanuyi xoore yi.

16 Sawulu yugu beenu ga ɲi Gibeeya, Beniyamiina baŋen ŋa, i ya ga ɲi hiinun koroosini, i da filisitinun kurinlenmun wari wurunu, i wa nan sanqi do baŋen su yi. 17 Sawulu ti i terallenmun da : « Ibeenu ga wa yere, xa da kun toxon xiri, yelli ku beenu ga daga bakka o naxa, o na kun tu. » I da toxoxiriyen ɲa, i da a ɲi, Yoonata do i yugunninlenmen ya nta no. 18 Kendi Sawulu ti sadaaxakiɲandaana Haya da : « Li ti ŋa. » Bawo, ke haxati, Alla waxanden ɲi Banisirayilarankon daaxan di. 19 Na Sawulu toxo sehene da a yi, manqaŋen tallanjiidini filisitinun gajanyugun naxa, Sawulu xusanta ti sadaaxakiɲandaanan da : « Sigi kundu ! » 20 Sawulu do beenu ga wa doome, i su xusanta na me kahu me yi, nan wuru nan daga gajaran ŋa, i da a ɲi filisitinun wa bonondindi xoore di, i yinmenu wa kanma na me kari ti kaahanun ŋa. 21 Banisirayilaranko beenu ga ɲi ga kahu filisitinun ŋa, yelli nan gaja do i batte, i saage riini do Banisirayilaranko beenu ga ɲi do Sawulu do Yoonata yi. 22 Banisirayilaranko beenu ga ɲi ga fuxu Hefarayimu gidinsiŋanun di, i ga da a mugu ti filisitinun wuru, kun xa ro gajaŋen di, na filisitinun xata. 23 Tunka Duumanten da Banisirayilaranko kisindi ke koota yi.

Ken halle gajaŋen yille ma Beeti-weeni halle. 24 Ken kootan ŋa, Banisirayilarankon raxaduxaasa, bawo ken da a ɲi Sawulu langandi nan ti : « Sere su nda yige na nellen saama katti nke ga wa dugutana tanbotugeyen ŋa n xonnun ŋa, Ari na a kaman langa. » Sere su xa ma hari loxoma baane ro i raqen di. 25 Kuren su daga sutten di, yaagi joxinte ɲi ɲiiɲen kanma. 26 I ga ro sutten di, yaagen ɲi no ma a ga wa woyono ɲiiɲen kanma, nxa sere su ma ho temu a di, langande ke saabu da.

27 Nxa, Yoonata ma ɲi ga do i haaba langanden mugu, a da i guman nuxunnen doxomi ŋunuŋen hakkan yaagen di, na a tara, a yaaxanlaqen xusanta xura. 28 Kurinlenman yugo ti a da : « An haaba langandi nan ti : “ Sere su nda yigande yiga lenki, Ari na a langa. ” Ken ya saabu da, jaman su ɲi ga tanpi. » 29 Yoonata ti a da : « N haaba da hoburi xoore ɲa beesu yi, a haayi, nke ga barike moxo be, bawo, n da honne temu ke yaage di. 30 Genni kurinlenman su ga ɲi yigene o ga da ho beenu raga o xonnun ŋa di, filisitinun xosoyen ɲi xotono diinanta ke yi. »

31 Ke kootan ŋa, gajaŋen bono filisitinun maxa nan giri Miximaasi nan daga a wara Yaloona. Banisirayilaranko, kun tanpi moxoburu. 32 I xusanta na xonnun naaburen xaaxa, na tanmisun wutu do naanun do naanlenmu, na i kari seyen di na i tiyen do i horen yiga. 33 Ken xibaaren kiɲe Sawulu yi nan ti, jaman xenperandangi Tunka Duumanten haqen di, i da tiyen do i horen yiga. Sawulu xusanta ti : « Ke ni janbeyen ya yi, xa da gidi dinka birinbirindi katti in ŋa saasa. » 34 Ken halle, a ti : « Xa sanqi serun naxa, axa nan ti i da, i n ri ti i gunbun do i jaxun su yi yere, i na i xurusi na i yiga. Xa maxa xenperandangi Tunka Duumanten haqen di na tiyen do i horen yiga. » Baane su do i daaban ri ken wuro yi, na i xurusi non ŋa. 35 Kendi, Sawulu da sadaaxandinoqu taga Tunka Duumanten da. Ken ya n ɲa Sawulu sadaaxandinoqu hana siginten ŋa.

36 Ken halle Sawulu ti : « Xa ri, o n daga xenu filisitinun ŋa wuron di, na i xaaxa ma fajiri, o nan maxa hari baane toxo i di. » I ti : « Hi be ga liŋi an da, ken dabari. » Nxa, sadaaxakiɲandaanan ti : « He, O na Alla ɲaaga hina. » 37 Sawulu da Alla ɲaaga nan ti : « N nan daga xenu filisitinun ŋa ba ? An wa Banisirayilaranko deemana i kanma ba ? » Alla ma a jaabi ken kootan ŋa. 38 Kendi Sawulu ti : « Axa su n ri yere, kurinyingumu, o na a tu, golli bure be ga ɲa yere lenki. 39 N kuna ti Tunka Duumante be ga da i jaman kisindi, hari genni n renyugo Yoonata ya ga da golli bure ke ɲa, a kallen waajibi. » Beesu kuurunten toxo. 40 A ti i su da : « Axakun su nan sigi dooren ŋa, nke do n renyugo Yoonata wa sikki yere. » Jaman ti a da : « Hi be ga liŋi an da, ken dabari. »

41 Sawulu ti Tunka Duumante, Banisirayila Alla da : « Toŋun bangandi o da. » Sokken gemu Yoonata do Sawulu yi, jaman kutten xura. 42 Sawulu ti : « Xa da sokken wutu nke do n renyugo Yoonata naxa. » Sokken gemu Yoonata yi. 43 Kendi Sawulu ti Yoonata da : « An ga da ke be ɲa, a ko in da. » A ti a da : « N da honne ya temu yaage ke di ti in gumannuxunne ke yi, ayiwa saasa ke, n duŋe ti kallen ŋa. » 44 Sawulu ti : « Yelli Alla ga na in yanganxata yanganxateyi xote yi, genni an ga nta kalla Yoonata. » 45 Jaman ti Sawulu da : « Yoonata be ga da ke deemandi xoore ɲa Banisirayilarankon da ya wa kalla ba ? Abada, Tunka Duumanten nta ken ɲaana ! Yinti baane nta kutini bakka a yi, bawo, a da ke ɲa ti Alla deemanden ya yi lenki. » Jaman da Yoonata kisindi bakka kallen ŋa.

46 Sawulu da filisitinun haraxatuyen raqewara, kun xa saage dagana i ɲiiɲen di.

[Sawulu niyinde jamaanu tananun ŋa]

47 Sawulu ɲa Banisirayila tunkayugon ŋa, na i kooriyen xonnun su gaja, Mowaabaranko, Hamooniranko, Hedoomurankon ado Sooba tunkayugun do filisitinu, ayiwa, a ga da i jonkoyi noqu su yi, a niyindi. 48 A gaja ti yugusaagaaxu yi na Hamaleexirankon niyi, na Banisirayilarankon kisindi seru beenu ga ɲi ga da i xaaxa.

[Sawulu kaadunko]

49 Sawulu renmun ni : Yoonata, Yisiiwi, Maaliki-suwa ado a renyaxarin xoore Meraabu do ho tugunne Mixaali. 50 A yaqen toxon ni Hayinoomu, Hayimaca renyaxare. A kurinyingumen toxon ni Habineeri, Neeri renyugo, Neeri ke yinme ɲi Sawulu haaba tugunne yi. 51 Sawulu haaba Xiisu do a haaba tugunne Neeri, Habineeri haaba ga ni, i haaba toxon ni Haabiyeli.

52 Gajaŋen xoto filisitinun kanma Sawulu haxatin su di, ken ya saabu da, a ɲi yugu saagen do yugu siren su kapa i yinme yi.