[Alla nimisiye Sawulu sugandiyen di tunkayugo yi]
15
Samuyeli ti Sawulu da :
« Tunka Duumanten da inke ya xeyi,
n na ten surundu an yinmen kanma na an ɲa tunkayugo yi,
i jama Banisirayilaranko yinmen ŋa.
Kendi saasa,
Tunka Duumanten sehen terinka.
2 « Tunka Duumante,
Tagahoonun su Kaman ti kundu ya :
“ N wa riini Hamaleexirankon yanganxata,
na a sababun ɲa,
i ga da hi be ɲa Banisirayilaranko yi,
bawo,
i sigi i kaane killen di,
i bugunte bakka Misira.
3 Kendi,
daga saasa,
an na Hamaleexirankon gaja,
ho wo ho ga wa i maxa an na a su burunqu,
maxa hinne i ya lewu,
yugun do yaxarun,
leminun do lendunbu,
naanun do tanmisu,
ɲogomun do haru. ” »
4 Sawulu xusanta na kuren xiri na a jaate Teleemu baŋen ŋa,
i ɲi kamu hilli wujunu tanmaxe,
ado Yehuudankon wujunu tanmi yugo.
5 A daga Hamaleexirankon deben di,
a ga tinto,
a huxu lanbankitten di.
6 A da haare wara dagana katti Xeeninun¤ ŋa nan ti i da :
« Xa maxa toxo Hamaleexirankon naxa,
xa bugu,
axa n daga,
n nan maxa ri axa halaki do i batte,
bawo axakun da hosire ya ɲa Banisirayilaranko su da,
i bugunte Misira.
» Ken ga ko,
Xeenirankon bugu Hamaleexirankon naxa.
7 Sawulu xenu Hamaleexirankon ŋa nan giri Haawila baŋen ŋa nan daga a wara Suura be ga wa Misira gingen ŋa.
8 A da Hamaleexirankon tunkayugo Hagaaga ŋarinten raga,
na a seren su kari ti kaahan ŋa.
9 Sawulu do i yugun hinne Hagaaga yi na a toxo no,
i yaaha naaburen ho hasaŋunten xa di,
xoyi tanmisun do naanun ho katen do tollanu,
ado ho wo ho siren ga ɲi moxosiri,
i ma duŋe na kun halaki,
nxa,
ho wo ho laahunten ga ni,
ma a xuumanten ga ni,
i da ken halaki.
10 Kendi Tunka Duumanten ti Samuyeli da :
11 « N nimisi,
n ga da Sawulu ɲa tunka yi,
bawo a ɲenge,
a ma golli ti in sehexannen ŋa.
» Samuyeli buten xusanta xaasa na wuron su ɲa wuunu katti Tunka Duumanten ŋa.
12 Samuyeli giri kendi soxuba hanan ŋa,
nan daga Sawulu gemu.
Nxa,
a da a mugu ti Sawulu daga Karameela,
na gondanma sigindi i yinme da non ŋa.
Ken halle,
a saage nan daga Giligaali.
13 Samuyeli ga kiɲe Sawulu yi,
Sawulu ti a da :
« Ari na barike ro an di !
N da gollen ɲa xoyi Tunka Duumanten ga da a ko moxo be. »
14 Samuyeli xusanta ti :
« Kendi,
nke taron wa mani manqaŋe di ?
Tanmisi xaasaxanne ba,
ma na xaasaxanne ya ? »
15 Sawulu ti a da :
« I da i raga Hamaleexirankon ya yi,
nxa,
jaman yaaha tanmisun do naanun hosiren di,
na kun ɲa sadaaxa yi an Kama,
Tunka Duumanten da,
nxa a kutte,
o da ken su halaki. »
16 Samuyeli ti Sawulu da :
« Kuuru in ŋa !
Tunka Duumanten ga da ke be ko in da wuro ke,
n na a ko an da.
» Sawulu ti a da :
« N xibaari. »
17 Samuyeli ti :
« Anken ma ɲi an du jaatene seri xoore yi,
an haayi ga ɲa Banisirayila xabiilan su tunkayugon ŋa,
Tunka Duumanten da an sugandi,
na an ɲa tunkayugo yi i kanma.
18 Ken halle,
na an xeyi hi hanminte yi nan ti :
“ Daga,
an na Hamaleexirankon burunqu,
seri buru,
i gaja ma an ga da i ɲama. ”
19 Mani da an ga ma Tunka Duumanten sehen batu,
ma an dire naaburen ya kanma ?
An da hoburen ɲa Tunka Duumanten ŋa de ! »
20 Sawulu ti Samuyeli da kendi :
« N da Tunka Duumanten sehen terinka,
a ga da in wara xeyinde be yi,
n da ken dabari,
n da Hamaleexirankon halaki,
nan ri ti i tunkayugo Hagaaga yi.
21 Ayiwa,
kurinlenmun da tanmisun do naanu beenu,
o ga ɲi ga n xawa i kalli ho siren wutu,
yelli ken na ɲa an Kama,
Tunka Duumanten da sadaaxa yi Giligaali. »
22 Kendi Samuyeli ti :
« An da a sinma Tunka Duumanten wa ɲaxalini ti sadaaxan ya yi diinanta i sehen batuyen ŋa ba ?
Alla sehen batuyen ya xa ga n hasu sadaaxan ŋa,
a terinkanden nan hasu jaxandigun katoyen ŋa.
23 Allakutayen ni hoburi xoore ya yi xoyi haayinden moxo,
xandunxotaaxun xa ni hobure yi xoyi booribatiyen moxo.
Anken bara Tunka Duumanten sehen ŋa,
Tunka Duumanten xa bara anken tunkaaxun ŋa. »
24 Ke halle Sawulu ti Samuyeli da :
« N samu,
n xenperandangi Tunka Duumanten yaamariyen ŋa,
ken do anken gongonden ŋa.
N kanu jaman ya yi,
n ga da i terinka.
25 Kendi saasa,
n wa an ɲaagana,
an na in junuubun yaaheye muuru,
an nan saage do in batte,
n nan sujudi Tunka Duumanten da. »
26 Nxa Samuyeli ti a da :
« N nta saagene do an batte.
Anken bara Tunka Duumanten sehen ŋa,
Tunka Duumanten xa bara an tunkaaxun ŋa Banisirayila yinmen ŋa. »
27 Samuyeli da i hallekoyi,
a wa a munda nan daga.
Sawulu xusanta a raga ti i yirankanpen ŋa,
ken xusanta booxe.
28 Samuyeli ti a da kendi :
« Tunka Duumanten da Banisirayila tunkaaxun booxo bakka an ŋa lenki,
na a kini sere tana yi,
a ga n haso an ŋa.
29 Banisirayila Alla nooronte nta gaarana,
a nta nimisini,
sere he,
a ga wa nimisini. »
30 Sawulu saage nan ti :
« N samu !
N daro xoni n xirisun do Banisirayilaranko jon di,
an nan saage do in batte,
n nan sujudi an Kama Tunka Duumanten da. »
31 Samuyeli saage do Sawulu batte,
a sujudi Tunka Duumanten da.
32 Ken halle Samuyeli ti :
« Xa ri ti Hamaleexirankon tunkayugo Hagaaga yi.
» Hagaaga daga katta a yi,
a ɲaxalinte¤,
a wa nan ti i du da :
« Kallen xaraxacoyen daga. »
33 Samuyeli ti :
« An kaahan ga da yaxarun kuma i renmun ŋa moxo be,
an xa maa wa kumene i renmen ŋa !
»
Samuyeli xusanta na Hagaaga kutu-kutu allabatiran ŋa Giligaali.