[Daawuda sugandiye Alla maxa. Sawulu, Yoonata do Daawuda xiisa]
(1 Samuyeli 16-31)
[Daawuda sugandiye Tunka Duumanten maxa]
16
Ku halle,
Tunka Duumanten ti Samuyeli da :
« Harisa an sunonten ni do Sawulu yi mani yi ?
Nke baati nan bara a tunkaaxun ŋa Banisirayila yinmen ŋa.
An gubon haga ten ŋa,
an nan ri,
n na an xeyi Yisaayi ne Beeti-leheemi,
bawo,
n da baane sugandi a renmun di,
a nan ɲa tunkayugo yi in da. »
2 Samuyeli ti :
« N wa dagana kan moxo di ?
Sawulu ken ga da a mugu tanni,
a wa in kalli.
»
Tunka Duumanten xusanta ti a da :
« Nanyeere wutu do an batte,
an nan ti, an ri sadaaxa bugundi Tunka Duumanten da.
3 An na Yisaayi xiri dagana do an batte sadaaxabakke ke yi,
an ga n xawa ke be ɲaana,
n wa a konno an da,
n ga wa riini ke be ko an da,
an wa ten surundunu ken kanma in da. »
4 Samuyeli golli xoyi Tunka Duumanten ga da a ko moxo be.
A ga kiɲe Beeti-leheemi,
deben xirisun bugu na a gemu,
i noxudusamunte,
i ti :
« An ri xeeri ya yi ba ? »
5 A ti i da :
« Yabo,
xeerin ya ni,
n ri sadaaxa bugundi Tunka Duumanten da.
Xa da axa du senondi¤,
axa n ri do in batte sadaaxandinoqun ŋa.
» Ken halle,
Samuyeli ti Yisaayi do i renmun na i du senondi,
i n daga sadaaxandinoqun ŋa.
6 I ga kiɲe no,
Samuyeli ga da Heliyaabu wari,
a ti i noxon di :
« Sikka nta a di,
Tunka Duumanten da ke ya sugandi. »
7 Tunka Duumanten ti Samuyeli da :
« A waritiyaaxen do a giiloyen nan maxa an wutu,
nke baranten wa a yi.
Serun yaaxen ga wa hi be yi,
Tunka Duumanten yaaxen nta ken ŋa,
serun wa waritiyaaxen ya haayini,
Tunka Duumanten xa wa sondonmen ya haayini. »
8 Kendi,
Yisaayi da Habinadaabu xiri,
a ti,
a nan dangi do Samuyeli kaane yi.
Samuyeli ti :
« Tunka Duumanten ma ke xa sugandi. »
9 Ken halle,
Yisaayi ti,
Sanma xa n dangi.
Samuyeli ti xadi :
« Tunka Duumanten ma ke xa sugandi. »
10 Hin ɲa kundu ma Yisaayi renmun ɲeeri ga wa dangini do Samuyeli kaane yi.
Kendi,
Samuyeli ti Yisaayi da :
« Tunka Duumanten ma ku ho wo ho sugandi. »
11 A ti Yisaayi da :
« An renmun su ni ku ya yi ba ?
» Yisaayi ti :
« Ho tugunnen wa halle tanmisun nagaanini.
» Samuyeli ti a da :
« Haare wara na a riiti,
bawo,
o ra nta yigene,
a ga ma ri. »
12 Yisaayi da haare wara do a yi na a riiti.
A haten xullen ɲi,
a yaaxanhunsun haranparen ɲi,
a waritiyaaxen siren ɲi.
Tunka Duumanten ti kendi :
« Giri,
an na ten surundu ke kanma,
ke ya ni. »
13 Samuyeli xusanta tengubon wutu na a surundu Daawuda kanma i waaxinun naxa.
Gelli ken kootan ŋa dagana,
Tunka Duumanten hanken xusanta yanqa Daawuda kanma ti senbe yi.
Ken halle,
Samuyeli saage dagana Raama.
[Daawuda dagaye Sawulu wuretaaxen ŋa]
14 Hi halle,
Tunka Duumanten hanken ɲi ga bugu do Sawulu yi,
a ɲi ga da taaxalenbure xeyi a da,
ken wa a toorono.
15 A golliɲaŋaanun ti a da :
« Ke haayi taaxalenbure ya yi,
Alla ga da a xeyi an da,
a ga wa an toorono.
16 An ga na yaamariyen kini o yi,
o wa sere mundunu an da,
a ga wa ganbaren tu,
taaxalenbure ke ga na ri an ŋa,
a na ganbaren tinmi,
ken wucen di,
an na mungu. »
17 Sawulu ti i da :
« Xa daga sere mundu riini,
a ga wa ganbaren tu moxosiri. »
18 Golliɲaŋaanan yogo ti :
« Nke da Yisaayi renyugo yogo wari,
Beeti-leheeminke,
a wa ganbaren tu moxosiri,
yugu saage ya ni,
gajanyugo xa ya ni.
A seheneenen siren ni,
a waritiyaaxen siren ni.
Ayiwa,
Tunka Duumanten wa do a batte xa. »
19 Sawulu da haare xeyi Yisaayi da nan ti :
« An renme Daawuda be ga wa tanmisun nagaanini wara riini katti in ŋa. »
20 Yisaayi xusanta na hare raga na a tiŋandi buurun do girihe hakka resenji do sugunlenme,
na a do i renyugo Daawuda wara dagana Sawulu ne.
21 Daawuda daga ke moxo di Sawulu noqun ŋa,
na a gollun joŋa.
Sawulu da a xanu moxosiri,
na a ɲa i gajanyokkiwuttaanan ŋa.
22 Sawulu da haare wara katti Yisaayi yi nan ti :
« N wa a mundunu an maxa,
an renyugo Daawuda nan toxo in maxa yere in wuretaaxen ŋa,
bawo,
n ɲaxali ti a yi. »
23 Sawulu ɲi,
taaxalenburen ga na ro a di,
Daawuda wa ɲanɲooren wutunu na a tinmi,
ken wucen di Sawulu wa laxahiyana,
a moxon wa sirono,
taaxalenbure ke wa a walla.