[Daawuda do Jaaluuta xiisa]
17
Filisitinun da i kurinlenmun moxon sirondi gajaŋen xannemaxa,
i kahuma me yi Sooxo be ga wa Yehuuda di,
i da daaxan taaxundi Yefeesi-damiimu,
Sooxo do Hajeexa naxa.
2 Sawulu xa da Banisirayila yugun kahu me yi,
nan daaxa Heela holonberan di,
na sapanun dabari filisitinun gajaŋen xannemaxa.
3 Filisitinun ɲi gide kanma,
Banisirayilaranko xa ɲi gide tana kanma,
i jonkoyinten wa me yi,
xoolen wa i naxa.
4 Yugu saage yogo bugu filisitinun jaman di nan ri sigi,
a wa gajanlenma mundunu,
a toxon ni Jaaluuta,
a wa bakka Gaata deben di.
A yindanman ɲi sogoɲu tunmi ado sibiri baane,
5 jaxawallinkuhune ɲi a yinmen ŋa,
mexendoroke wa a yi,
ken xotoyen ni tandunme kilo me haqe.
6 A taanun xa xuhaarinten ɲi ti kiren ŋa,
do jaxawallingajanxedo baane jonginte wa a yi.
7 A tanmen baraxaten ɲi xoyi geesimeraananxoren moxo,
a tanmen nuxunnen ɲi mexen ŋa,
a xotoyen ni kilonu ɲeeri.
A xodoriwutaanan ɲi terene do a kaane.
8 Jaaluuta xusanta sigi naxaanen di nan gangundi Banisirayilaranko sapan di nan ti :
« Hee !
Axakun xa bugu nan ɲa sapa yi mani yi,
gajaŋen xannemaxa he ?
Nke ni Filisitinken ya yi,
axa ni Sawulu komun ya yi,
ayiwa,
xa da seri baane sugandi axa di,
a nan ri katti in ŋa.
9 A ga na in gaja na in kari,
o wa ɲaana axa da komu yi,
nxa,
nke ga na katta a kaman da na a kari,
axa wa ɲaana o komun ŋa nan golli o da. »
10 Ken halle,
a ti xadi :
« Hee xadi !
Nke wa do Banisirayila gajanyugun ya yi lenki.
Xa da yugu baane wara riini katti in ŋa,
o n gaja ! »
11 Sawulu do Banisirayilaranko ga da yugo ke sehun mugu,
i su saralle kannen maxa.
12 Daawuda,
Yisaayi renmen ga ni,
Hefuraatinke,
a ɲi no,
a wa bakka Beeti-leheemi,
Yehuuda maran di.
Renyugu segi ya n ɲi Yisaayi maxa.
Sawulu haxati,
a ɲi ga xirisaaxu,
serun ɲi a darono¤.
13 Yisaayi renyugu xoorun sikki ɲi ga daga do Sawulu batte gajaran ŋa,
kun ga ni :
sooma Heliyaabu,
tanba Habinadaabu ado yaraja Sanma.
14 Daawuda ya n ɲi i su ho tugunnen ŋa.
Ho xooru ku sikki daga do Sawulu yi.
15 Daawuda ɲi daganansaagene Sawulu do i haaba tanmisun nagaaniyen naxa Beeti-leheemi.
16 Jaaluuta da tannaxate bito ɲa,
soxuban do nelle,
a wa i du koyini jaman di,
a wa Banisirayilaranko raxosono.
17 Koota yogo,
Yisaayi ti i renyugo Daawuda da :
« Ke alikaamahunsi ɲaaɲante booton wutu ado ku buurunyinmu tanmi,
an na a jewondi dagana i kini an gidanu yi daaxan ŋa.
18 Ku xatinxutu tanmi xa wutu,
an na kun kini axa yingumen ŋa,
an nan danqanaaxu genni an waaxinun ga wa xeeri di,
an nan ri ti ho yi bakka i ne,
ken ga wa ken sabatindini.
19 I wa do Sawulu batte,
Banisirayila yugun su xa wa Heela holonberan di,
i wa na filisitinun gaja. »
20 Daawuda giri soxuba hanan ŋa na tanmisun toxo koroosindaana maxa,
na yigandun wutu,
nan daga xoyi haaben ga da a ko a da moxo be.
A ga kiɲe gajaran ŋa bire be,
kurinlenmun bugu,
i wa kanma na me teleŋondi,
i wa na yugunxaaruyen ɲa.
21 Banisirayila yugun do filisitinu yugun sigi nan teleŋo nan jonkoyi me yi.
22 Daawuda xusanta i yokkun toxo koroosindaanan maxa,
na a jewondi dagana gajaŋaanun sapan di,
na i waaxinun kuuɲi.
23 A ga wa kanma nan sehe do i ya,
Jaaluuta bugu,
filisitinun yugu saage,
a ga wa bakka Gaata,
a bugu filisitinun sapan di,
a wa nan saage i xenparandangintandigaamu ku di.
Daawuda da digaamu ku mugu.
24 Banisirayilaranko ga da yugo ke wari,
i kanu dangihaqe nan bugu do halle.
25 Banisirayila yugun ɲi kanma nan ti me da :
« Axa yaaxe wa ke yugo yi ?
A wa bakka na Banisirayilaranko raxoso,
sere be xoni nda katta a kalli,
tunkayugon wa ken kaman bannaaxundini,
na i renyaxaren yaxindi a yi,
nan yaaha a kaman kaadunkon sagallen di. »
26 Yugu beenu ga ɲi Daawuda kaaran ŋa,
a xusanta na i tirindi ti :
« Sere be nda ke filisiti kari,
na yaagu bugu Banisirayilaranko yi,
mani wa ɲaana ken kaman da ?
Ke filisiti murunten ni mani yi,
a ga wa na Alla ŋarinten kuren raxoso ? »
27 I da a saagandi a da nan ti :
« Sere be nda ke yugo kari,
an wa ho koninte ke su kitana. »
28 A gidanyugu xoore Heliyaabu da a sehenten mugu do yugu ku yi,
a butu a wure moxoburu nan ti a da :
« Anken ri yere mani ya ?
An da ku tanmisinnu toxo ko maxa gunjuran di ?
Nke wa a tu nan ti,
anken ni dundare yi ado sondonbure xa,
an ri gajaŋe ke ya haayi tanni. »
29 Daawuda ti :
« N da mani ɲa ?
Walima nke nta xawa sehene ya ? »
30 A da i halle koyi i gidanyugun ŋa nan daga sere tananu ne,
na i tirindi ken hi baane yi,
i xa da jaabi hanan me ya koni.
31 Yogonu da Daawuda sehe ke mugu na a laxami Sawulu da,
a xusanta na haare wara dagana do a yi na a riiti.
32 Daawuda ti Sawulu da :
« A nta xawa moxo su di,
seren kanu ke filisiti yi.
N yinmanke,
nke wa dagana a gaja. »
33 Sawulu ti Daawuda da :
« Anken ra nta dagana ke yugo gaja,
bawo,
anken ni lemine ya yi,
aken xa ni gajanyugo ya yi gelli a tugunne. »
34 Daawuda ti Sawulu da :
« N yinmanke,
nke ya wa in haaba tanmisun nagaanini,
jarinte ma turuŋen nda ri tanmise raga,
35 n wa wurunu do a yi,
na a katu ma a ga da tanmisen wara,
a nda yille katta nke yinme yi,
n wa a ragana ti i xanyinten ŋa,
na a katu ma in ga da a kari.
36 N yinmanke,
ke moxo ya ni n ga da jarintun do turuŋun kari,
ke filisiti murunte xa wa ɲaana xoyi kun yogo baane ya,
bawo,
a da Alla ŋarinten kuren raxoso.
37 « Tunka Duumante ke be ga da in kisindi jarinten do turuŋen ŋa,
a wa in kisindini ke yugo yi.
»
Kendi Sawulu ti Daawuda da :
« Daga, yelli Tunka Duumanten ga na an deema. »
38 Ken halle,
Sawulu da i yiraamun ro Daawuda xannen ŋa,
na jaxawallinkuhune ro a yinmen ŋa,
na mexendoroke ro a yi.
39 Daawuda da Sawulu kaahan jongi i yiraamun kanma,
a ga ti,
i wa terene,
terenden xoto a kanma,
bawo,
a ma ɲi ga demu ku yi.
A xusanta ti Sawulu da :
« Nke ra nta terene ti ku su yi,
n ma demu i ya.
» Daawuda da i koroosi bakka i ya.
40 Ken halle,
a da i guman wutu,
na koci melexu karagi sagara lanbankitten di,
na kun ro i booton di.
A da i manangullan wutu i kitten di nan daga katti filisiti ke yi.
41 Yugon tinto Daawuda yi honne-honne na xodoriwutaanan toxo i kaane.
42 A ga da a wari baane,
a nexu a di,
bawo Daawuda ɲi lemine ya yi,
a xullen ni,
a waritiyaaxen siren ni.
43 Yugon ti Daawuda da :
« Nke ni wulle ya yi ba,
an ga wa riini in ŋa ti guma yi ?
» A da Daawuda langa ti i munonun ŋa.
44 Kendi,
a xaaru a yi nan ti a da :
« Li,
n na an tiyen kini yeliŋun do gunduhoonun ŋa. »
45 Daawuda xa ti yugon da :
« Anken wa inke gajana ti kaahanun do tanmen do jaxawallingajanxedon ya yi,
nke xa wa anken gajana ti Tunka Duumante toxon ya yi,
Tagahoonun su Kama,
do Banisirayilaranko kuren Kama,
an ga da Banisirayila ke be raxoso.
46 Tunka Duumanten wa anken kinni inke yi lenki,
n wa an kalli na an yinmen kutu bakka an xannen ŋa.
Lenki n wa filisitinun hurun kinni yeliŋun do gunduhoonun ŋa,
ɲiiɲen su na a tu nan ti Alla wa Banisirayila yi.
47 Sere su ga wa yere na a tu nan ti,
Tunka Duumanten nta lahini kaaha walima tanme yi na i serun kisindi,
bawo,
aken ya wa gajana oku da,
na o niyindi axa kanma. »
48 Yugon xusanta tere dagana katta Daawuda yi.
Daawuda xa wuru tawoye di nan daga da a baŋen ŋa,
49 na i kitten ro i booton di,
na koce yogo wutu,
na a sedi ti manangullan ŋa.
Kocen xusanta na yugon kita i taŋen ŋa,
na a boto nan ro,
yugon xusanta xenu i noxon kanma ɲiiɲen di.
50 Daawuda katta yugon da kundu ya ti manangullan do kocen ŋa,
na a gulla a yi na a kari,
na a toxo kaaha nta a maxa.
51 Daawuda wuru nan sigi yugon yinmen di,
na a kaahan raga na a foosi bakka i ŋanan di,
na yugon kutten tinmandi na a yinmen kutu.
Filisitinun ga da a wari i yugu saagen kara,
i wuru.
52 Banisirayila yugun do Yehuuda yugun yugunxaaru filisitinun ŋa,
na i haraxatu ma i ga wa kiɲene xoolen raqen ŋa¤ ado Hexoroona karaŋan raxaxooren ŋa.
Filisitinun seri karantun xenu-xenu Saraayimu killen di katta Gaata do Hexoroona baŋen ŋa.
53 Ken halle,
Banisirayilaranko saage bakka do filisitinun ŋa,
nan ri i daaxan xaaxa.
54 Daawuda da Jaaluuta yinkollan wutu nan daga ti a yi Yerusalaamu,
na a gajanyokkun xa wutu na i wara i tillisen wure.
[Yoonata do Daawuda menjanmaaxun rooye]
55 Sawulu ga ɲi kanma na Daawuda koroosi,
a dagante filisitinken gaja,
a ti i kurinyingume Habineeri da :
« Ke lemine ni koxa renme yi ?
» Habineeri ti a da :
« N kuna ti an ŋarintaaxun ŋa,
n nta a tu. »
56 Tunkayugon ti :
« Tirindindi de,
ke lemine ni koxa renme yi. »