[Sawulu xonnaaxu Daawuda yi]
18
Daawuda ga duguta sehene do Sawulu yi,
Yoonata sondonmen toxo do Daawuda yi na a xanu,
xoyi i yinme moxo.
2 Nan giri ken kootan ŋa,
Sawulu da a toxo i noqun ŋa,
a ma a saagandi dagana i haaba kaara.
3 Yoonata da lahidu wutu do Daawuda yi,
bawo,
a ɲi a munda xoyi i yinme moxo.
4 Doroki xoore be ga ɲi Yoonata xannen ŋa,
a da a bugu i ya na a kini Daawuda yi,
nan saage na i mexendoroke,
i kaaha,
i bundaŋen do i naxansiitaaden xa kini a yi.
5 Daawuda ɲi Sawulu ga na a wara gajaŋe ho wo ho yi,
a wa niyindini,
a xusanta a ɲa kurinyingume yi,
ken liŋo jaman su do Sawulu yugun da.
6 Daawuda ga da Jaaluuta kari,
kuren ga ɲi nan saage,
yaxarun bugu do Banisirayila baŋen su yi,
yelli na tunkayugo Sawulu gemu ti suugen do regen do ɲaxaliyen ŋa ti gitanun do kucancucanun ŋa.
7 I ɲi suugunu na me jaabi :
« Sawulu wujunun kallaana,
Daawuda wujunun tanmi kallaana ! »
8 Sawulu xusanta butu dangihaqe,
ke sehe digi a yi,
a ti :
« I da wujunun tanminun kini Daawuda yi,
na wujunun ya kini inke yi.
Ayiwa ken halle,
sikka nta a di,
i wa riini a ɲa tunkayugo yi. »
9 Gelli ken haxati yi Sawulu ma Daawuda haayi ti yaaxa sire yi.
10 Ken yillankara,
Alla da taaxalenburen xeyi katta Sawulu yi,
a lagari,
a wa yindunsehene kan di xoyi tuurinte.
Daawuda ɲi kanma na ganbaren tinmi xoyi a ga ɲi a ɲaana koota su moxo be.
Sawulu tanmen ɲi a kitten di,
11 a ti i noxon di :
« N wa Daawuda gengene kobin ŋa saasa.
» A xusanta na i tanmen wutu,
a ɲi a munda na Daawuda suha,
Daawuda da tanmen wanga taanun hilli su di.
12 Sawulu lagari kanna Daawuda yi,
bawo Tunka Duumanten ɲi ga da aken wara,
nxa a ɲi do Daawuda batte.
13 Kendi,
Sawulu da a laatondi bakka du yi na a ɲa wujune sorodaasi yingume yi,
a ɲi walle kun kaane gajaŋen di.
14 Daawuda ɲi niyindini ku bakku su di,
bawo Tunka Duumanten ɲi do a batte.
15 Sawulu ga da a wari Daawuda wa nan taqidarikite moxosiri,
a kanu a yi,
16 nxa,
Banisirayila seren kutten su do Yehuudanko ɲi Daawuda munda,
bawo,
a ya ɲi walle i kaane gajaŋen di.
[Daawuda ɲaxa]
17 Sawulu ɲi a munda na i du mundu Daawuda yi,
na a toxo i ma i kitten saxu a kanma,
filisitinun na ɲa a saaten ŋa.
Kendi a ti Daawuda da :
« Ke haayi n renyaxarin xooren ya yi,
Meraabu,
n wa a kinni an ŋa yaqe yi,
nxa sarati ya :
an nan golli in da ti saagoye yi,
na Tunka Duumanten gajaŋe ɲa,
Tagahoonun su Kama. »
18 Daawuda ti Sawulu da :
« Nke ni ko yi,
n serun ni koonu yi,
n haabankan ni mani yi Banisirayila yere,
n ga wa tunkayugon renyaxaren kitana yaqe yi ? »
19 Nxa,
Meraabu yaxubiren ga kiɲe Daawuda yi,
Sawulu da a kini yugo tana yi,
Diriyeeli,
Mehoolanke ga ni.
20 Nxa,
Sawulu renyaxare Mixaali da Daawuda xanu.
Sawulu da ken mugu,
a liŋi a da.
21 A ti i noxon di :
« N wa a kinni a yi,
a nan ɲa kalaŋe yi a da,
na a ro filisitinun kitten di.
» Kendi Sawulu ti Daawuda da taa hillandi yi :
« Saasa xoni,
an ra wa ɲaana in kallu yi. »
22 Kendi,
Sawulu da serun yaamari,
i nan sehe do Daawuda yi gundo di,
i nan ti a da :
« Tunkayugon ɲaxalinten wa ti an ŋa ke haxati yi,
a serun su xa wa an munda,
saasa,
a wa a munda na an ɲa i kallu yi. »
23 Tunkayugon seritintun ga da ke digaame ko Daawuda da,
a ti i da :
« Axakun da a sinma hi neye ya ni,
nke na tunkayugon renyaxaren yaxi ?
Nke ni misikiine ya yi,
toxontaŋe ! »
24 I da Sawulu xibaari ti Daawuda sehen ŋa.
25 Sawulu ti :
« Xa ti Daawuda da :
“ Tunkayugon haajun nta yaxintanaabure yi de,
a wa kame muru ya mundunu i xonnun di,
i tanbotugeye yi filisitinun kanma.
” » Sawulu ŋanniyan ɲi ya,
Daawuda nan toxo gajaŋen di filisitinun maxa.
26 Sawulu serun ga da ke digaame ko Daawuda da,
a ɲaxali nan ti,
ike wa riini ɲa tunkayugon kalliyugon ŋa.
Katti haxati koninten ga wa kiɲene,
27 Daawuda do i yugun daga kamu hilli yugo kari filisitinun di,
nan ri ti i murun ŋa,
na i jaate tunkayugon da,
yelli i na a renyaxaren yaxi.
Kendi,
Sawulu da i renyaxare Mixaali yaxindi a yi.
28 Sawulu da a tu ti Tunka Duumanten wa do Daawuda batte,
nan ti i renyaxare Mixaali xa wa a munda,
29 Sawulu kannen talla xoto Daawuda yi,
a da a ɲa xonne yi i ŋarintaaxun kutten su di.
30 Filisitinun kurinyingumun ɲi bakka bire su nan gaja,
Daawuda xa ɲi i niyini diinanta Sawulu kurinyingumun su yi,
a toxon xusanta bugu moxosiri.