[Daawuda kallen ramuuruye Sawulu maxa]
19
Sawulu da a mundu i renyugo Yoonata maxa ado i seri tintun su,
i na Daawuda kari.
Nxa,
Yoonata ɲi Daawuda munda moxosiri,
2 a da a gongo nan ti a da :
« N haaba wa a munda na an kari de !
An moxotu,
soxuban ŋa,
an nan daga fuxu noqu yogo.
3 Nke wa bakka do in haaba batte nan sigi an fuxunten ga wa gunne be di.
N wa sehene do a batte an hin di,
a ga wa na ŋanniye be wutu,
n na ken ko an da. »
4 Yoonata ga wa sehene do i haaba yi,
a da Daawuda tiiga moxosiri,
a ti a da :
« Tunkayugo,
maxa hobure ɲa an komiyugo Daawuda yi,
a ma hobure su ɲa anken ŋa,
a wa golli siren duuron ya ɲaana an da.
5 A da i yonkin kini na Jaaluuta kari,
Tunka Duumanten xa xusanta na Banisirayilaranko deema deemandi xoore yi,
anken yinme seedaaxu ken ŋa,
an ɲaxali xa.
Anken xa wa hobure ɲaana serixulle yi mani ya xoyi Daawuda me,
na a kari,
sababu su nta a yi ? »
6 Sawulu da Yoonata sehu ku haamu,
a ti a da :
« N kuna ti Tunka Duumanten ŋa,
Daawuda ntaxa kalla xadi. »
7 Yoonata da Daawuda xiri,
na hin su yaaxen ko a da,
nan ri ti a yi Sawulu ne.
A da Sawulu wuretaaxen ɲa xoyi a ga ɲi a ɲaana moxo be.
8 Hi halle,
gajaŋen kurunbankaaxu,
Daawuda xusanta bugu na filisitinun gaja gajaŋi xote,
nan katta i da ma i ga wa wurunu.
9 Koota yogo,
Tunka Duumanten da taaxalenburen xeyi Sawulu da,
na a toxo i kaara,
a tanmen wa a kitten di.
Daawuda ɲi kanma na ganbaren tinmi a da.
10 Sawulu da tanmen sedi,
a ga wa a munda na Daawuda genge kobin ŋa.
A xusanta na tanmen wanga,
tanmen tuti kobin di.
Daawuda wuru,
a kisi ken wuro yi.
11 Sawulu da seru wara dagana Daawuda kaara,
i na a koroosi,
yelli i na a kari soxuban ŋa.
A yaqe Mixaali da a xibaari ti a yi nan ti :
« An ga ma wuru wuro ke,
i wa an kalli xunbane ko ! »
12 Mixaali da a bugundi do hulunboten ŋa,
a wuru nan kisi.
13 Ken halle,
Mixaali da boori wutu na ken saxundi a batten di texen kanma,
na sugunyinten ro a yinmen ŋa,
na a xuhu ti doroke yi.
14 Sawulu da haaru wara dagana Daawuda raga,
Mixaali ti i da :
« A ma saha de ! »
15 A da haarun saagandi,
i na Daawuda wari i yaaxen ŋa,
nan ti i da :
« Xa ri ti a yi i texen di,
n na a kari. »
16 Haarun ga ro,
i xusanta na boorin ya ɲi texen kanma,
sugunyinten wa a yinmen ŋa.
17 Sawulu ti Mixaali da :
« An da in janba mani yi,
na in xonnen dugutandi ma a ga wa kisini ?
» Mixaali ti i haaba da :
« A ti in da ya :
“ An ga ma in kisindi,
n wa an kalli. ” »
18 Daawuda ga wuru bire be nan kisi,
a daga Samuyeli noqun ŋa Raama,
Sawulu ga da ho wo ho ɲa a yi na a su laxami a da.
Kendi,
a do Samuyeli daga taaxu Nayooti¤,
annabinyinmun meɲiran ŋa.
19 Xibaaren kiɲe Sawulu yi ti Daawuda wa Nayooti,
Raama maran di.
20 A da haarun girindi da a yi,
i na a riiti.
Nxa,
haaru ku da annabinyinmun jaman wari,
i wa xibaarindini,
i yingumen ni Samuyeli ya.
Alla hanken xusanta yanqa haaru ku kanma,
i xa ɲa xibaarikiɲandaanu yi.
21 Sawulu ga da ken mugu,
a da haaru tananu wara dagana,
kun xa ɲa xibaarikiɲandaanu yi.
A da haaru tananu wara dagana ta sikkandin ŋa,
kun xa ɲa xibaarikiɲandaanu yi.
22 Kendi,
a yinme daga Raama,
a ga kiɲe gedi xoore be ga wa Seexu,
a tirindindi nan ti :
« Samuyeli do Daawuda na minna ?
» I ti a da :
« I wa Nayooti,
Raama. »
23 A dagante non ŋa,
Alla hanken yanqa a xa kanma,
a xusanta nan ɲa,
a wa xibaarindini killen di ma a ga wa kiɲene Nayooti.
24 A ga kiɲe,
a xa da i yiraamun wara nan xibaarindi Samuyeli jon di,
na i duuron wara,
nan xenu seyen di ken kiye do ken wuro su yi.
Ken ya saabu da,
i ga wa ke taali katta :
« Sawulu xa ɲa annabinyinme ya yi ba ? »