[Daawuda do Yoonata kapanlenmaaxu]
20
Daawuda wuru bakka Nayooti,
annabinyinmun meɲiran ŋa,
Raama maran di,
nan daga Yoonata ne nan ti a da :
« Nke da mani ɲa,
n hoburen ni kanni xa yi ?
Nke da hobure ɲa an haaba yi ba,
a ga wa a munda na in kari ? »
2 Yoonata ti a da :
« Ken wara,
an nta kalla !
N haaba nta ho wo ho dabarini,
a ho tugunne kahu a ho xoore yi,
a ga ma in xibaari ti a yi,
a xa ra wa ke huxundini nke yi kan moxo ?
Ken nta sahana ! »
3 Daawuda kuna nan ti :
« An haaba wa a tu moxosiri nan ti,
nke ni anken menjanliŋe ya yi,
ken ya ni,
a ga da inke kallen huxundi an ŋa,
yelli an nan maxa suno.
N wa kunana an da ti Tunka Duumanten ŋa ado ti an ŋarintaaxun ŋa,
ho wo ho ntaxa nke do kallen naxa sibiri baane halle ! »
4 Yoonata ti Daawuda da :
« An wa mani munda na a ɲa an da,
n wa ken ɲaana. »
5 Kendi,
Daawuda ti Yoonata da :
« A haayi xunbane ya ni xason koota hanan* ŋa,
a waajibinten ni nke kanma,
n nan yige do tunkayugon ŋa,
nxa,
n wa a munda nan daga fuxu gunnen di ma xunbane halle nelle.
6 An haaba ga na in hi tirindi,
an nan ti a da,
n da duŋeye mundu anken maxa nan daga in deben di Beeti-leheemi tawuye di,
bawo,
xabiilan su wa siinanyillan sadaaxan bugundini no.
7 A ga na ti,
ken siren ni,
nke haqiren wa taaxunu,
nxa,
a nda butu,
a tu nan ti,
a haqiren wa hoburen ya di.
8 N yinmanke,
siri in da,
bawo,
an da lahidu wutu in da Tunka Duumanten jon di.
Genni in ga da hobure ya ɲa,
anken yinme na in kari,
maxa in kini an haaba xoni yi. »
9 Yoonata ti :
« Ken he de !
Genni n ga wa a tu,
nan ti n haaba haqiren wa hobure di katta an ŋa,
n ɲi an xibaarini. »
10 Daawuda ti Yoonata da :
« An haaba jaabinden ga ma ɲa hosire yi,
koxa wa ken konno inke da ? »
11 Kendi Yoonata ti Daawuda da :
« Li,
o n daga doome gunnen di.
» I hilli xusanta bugu doome.
12 Ken halle Yoonata ti Daawuda da :
« N kuna ti Tunka Duumanten ŋa,
Banisirayila Kama,
nan ti xunbane ma xunbanihalle do ke haxati,
n wa in haaba tirindini.
Genni a ga wa hosire ŋanniyana katta an ŋa,
n nta an xibaarini,
13 walima,
genni a ga wa hobure xa ya ŋanniyana katta an ŋa,
n ga ma a ko an da,
an nan saage kisiye di,
yelli Tunka Duumanten ga na in yanganxata moxoburen su di.
Yelli Tunka Duumanten ga na ɲa do an batte,
xoyi a ga ɲi da inke haaba yi moxo be.
14-15 Koota wa riini,
Alla wa an xonnun su burunqunu bakka ɲiiɲen kanma baani-baane,
n ga na toxo birene,
an na siri in da xoyi a ga n liŋi Tunka Duumanten da moxo be,
nxa n ga na kara,
maxa hosiriɲaayen raqewara katti in soxoodun ŋa.
16 Ke ya na o lahidun ŋa do an batte,
an ga na a bonondi,
yelli Tunka Duumanten ga na an do an soxoodun yanganxata. »
17 Ken halle,
Yoonata da Daawuda kunandi xadi i xanuyen saabu da,
bawo,
a da Daawuda xanu xoyi i yinme moxo.
18 Ken halle,
Yoonata ti Daawuda da :
« Xunbane ni xason koota hanan ŋa,
a wa riini tuwi nan ti,
an nta yere,
bawo,
an noqu ke wa riini duuraaxu.
19 Kendi,
xunbane halle daga,
an ga demu muqu noqu be Yeejeli giden halle,
an nan terinkandi non ŋa.
20 Kendi,
nke wa bunnu sikki sedini gide ke kaaran ŋa xoyi n ga wa ho yogo bununu.
21 Ken halle,
n wa yugunninlenmen walla dagana nan ti a da :
“ Daga,
an na bunnu ku sagara riini.
” N ga na ti a da :
“ Bunnun nan tinto an ŋa,
i riiti.
” N wa kunana an da ti Tunka Duumanten ŋa,
ken wure ni,
anken nan ri,
bawo,
toora nta an kitana.
22 Nxa,
n ga na ti yugunninlenmen da :
“ Bunnun na laato an ŋa,
dangi de !
” Ken wure ni,
an nan daga,
bawo,
Tunka Duumanten wa a munda,
an nan wuru ya.
23 A tu xa nan ti,
Tunka Duumanten wa seedaaxunu nke do anken lahidu ke kanma bada. »
24-25 Kendi Daawuda fuxu gunnen di.
Xason koota hana,
tunkayugon taaxu yigeran ŋa i taaxura xasen ŋa kobin kaaran ŋa,
Yoonata ɲi a yinteleŋan di¤,
Habineeri ken wa a kaaran ŋa.
Daawuda ken taaxuran duuraaxunten ɲi.
26 Ken kootan ŋa Sawulu ma ho ko,
bawo a ti i noxon di :
« A n gaba a di,
ho yogo ɲa a yi,
ken da a bugu sennaaxun di,
sikka su nta a di,
a senne he¤. »
27 Nxa xason bita hillandi,
Daawuda taaxuran duuraaxunten ga ɲi,
Sawulu da Yoonata tirindi :
« Manni Yisaayi renyugon ga ma ri yige daaru do lenki ? »
28 Yoonata ti a da :
« A da duŋeyen mundu inke maxa na a xotondi ti i wa dagana Beeti-leheemi.
29 A ti,
“ N wa a mundunu an maxa,
n nan daga,
bawo sadaaxabakke wa oku maxa o deben di,
o serun wa a bugundini,
n waaxin da in yaamari,
a nan maxa ɲa in halle.
Genni a ga wa genme an ŋa,
n rawara nan daga,
n na in waaxinun xa wari.
” Ke ya ni,
a ga ma ri tunkayugon yigeran ŋa lenki. »
30 Sawulu butu moxoburu Yoonata wure nan henti a yi :
« Yaxarinburi renme ke !
Nke da a tu nan ti,
anken do Yisaayi renyugo ke menjaŋaaxu,
a wa riini yaagu kiɲandi anken do an maa be ga da an saara yi.
31 Na Yisaayi renyugun toxo birene,
anken nta sabatini,
an maranden xa nta sabatini.
Kendi saasa,
haare wara da a yi,
a nan ri,
bawo,
a kallen ni waajibin ya yi. »
32 Yoonata da a tirindi :
« A karayinmen ni kanni xa yi ?
A da mani ɲa ? »
33 Sawulu xusanta tanmen wutu katta a yi,
a ga wa a munda na a suha.
Yoonata da a tu nan ti haaben kuti a kanma na Daawuda kari.
34 Yoonata xusanta giri bakka yigeran ŋa,
a butunten wa moxoburu.
A maxa yigande yiga xason do ken bita hillandi yi,
bawo,
a ɲi ga kanu Daawuda da,
ado haaben ga da roxomaxantaaxu be kiɲandi a yi.
35 Soxuban ŋa,
Yoonata bugu nan daga gunnen di,
i do Daawuda lahidun ŋa,
yugunninlenmen ɲi do a batte.
36 A ti a da :
« A jewondi,
n ga wa riini bunnu beenu sedi,
an na i sagara.
» Na yugunninlenmen toxo wurunu,
Yoonata da bunni baane sedi na a laatondi yugunninlenmen ŋa.
37 Yugunninlenmen ga kiɲe bunnen noqun ŋa,
Yoonata da a xiri do i halle yi nan ti a da :
« Daga kaane,
bunnen na laato an ŋa.
38 Li hane,
maxa sigi !
» Yugunninlenmen da bunnun sagara nan ri i kini i kamanyugon ŋa.
39 Yugunninlenmen ma ɲi ho wo ho seedo ku hiinu di.
Yoonata do Daawuda hilli baane ya ɲi a seedo.
40 Ken halle,
Yoonata da i gajanyokkun kini i yugunninlenmen ŋa nan ti a da :
« Daga ti i ya kan di. »
41 Yugunninlenmen ga daga,
Daawuda bugu i fuxuran ŋa Yeejeli giden halle,
nan sujudi ta sikko,
i hilli da me sunbu-sunbu nan wu,
nxa Daawuda wuyen ɲi ga n kasaho.
42 Yoonata ti Daawuda da :
« Daga xeeri di,
bawo,
oku hilli ya n kuna ti Tunka Duumanten toxon ŋa nan ti :
“ Tunka Duumanten wa seedene nke do anken naxa,
nan seede n bonsoŋun do an bonsoŋun naxa bada*. ” »