21
Kendi Daawuda daga,
Yoonata ken saage dagana deben di.
[Daawuda dagaye Nooba katti Hayimeleexi ya]
2 Daawuda daga Nooba,
katta sadaaxakiɲandaana Hayimeleexi yi.
Hayimeleexi ga da a wari,
a xusanta kanu nan ti a da :
« Anken xa baane ri mani yi,
sere su nta do an batte ? »
3 Daawuda ti a da :
« Tunkayugon da hi xote ya wara in kanma,
nan ti sere su nan maxa bugu a seedo.
Nxa n seru,
lahidu wa in da i naxa noqu xerexerente yi.
4 Mani xa na anken maxa saasa ?
Buuruyinmu karagi kini in ŋa,
walima ke be ga wa an maxa. »
5 Sadaaxakiɲandaanan ti Daawuda da :
« An ga wa buuru be tu nta in maxa de,
nxa sadaaxanbuurun* ya wa in maxa,
n wa a kinni an ŋa ti sarati yi,
genni an yugun ga haama kiɲene yaxarun ŋa.* »
6 Daawuda ti sadaaxakiɲandaanan da :
« Ken na oku laadan ya yi,
o wa kumene yaxarun ŋa,
o ga na ɲi bakka gajaŋen xannemaxa.
N yugun yinmenu xa senontun ni,
i wa i du tangana sennaaxun baŋen ŋa,
billati ke me hi xoore ! »
7 Kendi,
sadaaxakiɲandaanan da sadaaxanbuuru kini a yi,
bawo ho tana ma ɲi no,
ma ken baane be ga koyi Alla yi,
a ga wa wutini bakka allabatiran ŋa,
na buuru taye wara a batten di,
a wutikootan ŋa.
8 Ken kootan da a ɲi,
Sawulu yugu baane wa no hanmi ya allabatiran ŋa,
a toxon ni Doweega,
Hedoomuranke ga ni,
aken ya n ɲi Sawulu nagaananyingumen ŋa.
9 Daawuda ti Hayimeleexi da :
« Tanme walima kaahan nta an maxa yere ba ?
Bawo nke ma ri ti kaaha yi,
n ma ri ti gajanyokke su yi,
saabu da,
tunkayugo ke yaamariyen ɲi ga n tawu moxoburu. »
10 Hayimeleexi ti a da :
« Jaaluuta ya kaahan wa yere,
filisiti ke,
an ga da a kari Heela holonberan di,
a hanamanten wa yiraame di ke batinxusaabe halle.
Genni a ga liŋi an da,
a wutu,
bawo,
kaaha tana nta yere.
» Daawuda xusanta ti :
« Kaaha nta haso ken ŋa.
A kini in ŋa ! »
[Daawuda dagaye Gaata, filisitinun noqun ŋa]
11 Ken koota su yi,
Daawuda jokki do wuruyen ŋa bakka Sawulu yi,
nan daga Gaata tunkayugo Haxiisa noqun ŋa.
12 Haxiisa yugun ti a da :
« Ke ya heti Daawuda yi,
jamaanen tunkayugo ?
» Yaxarun ɲi aken ya suugunu nan rege nan ti :
« Sawulu wujunun kallaana,
Daawuda wujunun tanmi kallaana ! »
13 Daawuda haqiren toxo do ke sehe di,
a kanu Gaata tunkayugo Haxiisa yi.
14 A xusanta i du ɲa xoyi tuurinte serun yaaxara,
a wa xalantansahandini karaŋan raxaxoorun kanma,
yaaron wa juurini do a senqen ŋa.