[Daawuda muqe Dullaami gidinkunmen di]
22
Daawuda wuru bakka Gaata,
nan daga huxu Dullaami gidinkunmen di.
A waaxinun da a kaadunkon su ga da ken mugu,
i daga kahu a yi no.
2 Xotoye ga ɲi sere su kanma walima tanborante,
ma noxudusamunte,
i su daga kahu a yi no,
a ɲa i da yingume yi,
kamu naxati yugo me ɲi da a yi no.
3 Ken halle,
Daawuda bugu non ŋa nan daga Micipe,
Mowaaba maran di,
nan ti Mowaaba tunkayugon da :
« N wa a mundunu an maxa,
n haaba do in maa n taaxu an maxa yere,
katti n ga wa Alla hi dabarinten walli. »
4 I toxo Mowaaba tunkayugon maxa no Daawuda muqen wucen su di karaŋan di.
5 Nxa,
annabi Gaadi ti Daawuda da :
« Maxa toxo ke karaŋa di,
saage dagana Yehuuda ɲiiɲen di.
» Kendi Daawuda daga Hereete sutten di.
[Nooba sadaaxakiɲandaanun kalle]
6 Sawulu da a mugu nan ti Daawuda da i yugun noqun tuwi.
Ken da a ɲi,
a wa taaxunu yitte wure Gibeeya tintiŋan kanma,
a tanmen wa a kitten di,
a yugun su siginten wa a kaaran ŋa.
7 Sawulu xusanta ti i da :
« Beniyamiina soxoodu,
xa da in terinka,
axa sinmeyen di,
Yisaayi renyugun wa riini teenun do resennaaxonun kini axa su yi ya ba ?
A wa axa ɲaana yingumu yi wujunu walima kamun kurinkitton da ba ?
8 Manni,
axakun su ga da inke janba ?
Seri baane nta axa di,
ke be ga da a ko in da ti in renmen da lahidun wutu do Yisaayi renyugon ŋa.
Sere su ma hinne in ŋa axa di,
na in renyugon golliɲanto ko in da.
Lenki a ga wa na in komiyugon deema na kalaŋe tugu in kaane. »
9 Doweega,
Hedoomuranke be ga ɲi Sawulu yugun yingumen ŋa,
xusanta ti :
« Nke da Yisaayi renmen wari riini Nooba,
Hayituubu renyugo Hayimeleexi noqun ŋa.
10 Ken da a xibaaren haayi Tunka Duumanten maxa,
na silahanda kini a yi,
na filisiti Jaaluuta xa kaahan kini a yi. »
11 Tunkayugon xusanta haare wara do sadaaxakiɲandaana,
Hayituubu renyugo Hayimeleexi yi,
a da a kaadunkon su,
sadaaxakiɲandaanu ga ni,
Nooba deben di.
I su ri katta tunkayugon ŋa.
12 Kendi Sawulu ti :
« Hayituubu renyugo,
n terinka !
» A ti a da :
« Naamu,
n yinmanke. »
13 Sawulu ti :
« Axa muruti in ŋa mani yi,
anken do Yisaayi renyugo ?
An da silahanda kini a yi na kaaha kini a yi,
nan saage na a hiinun haayi Alla maxa,
yelli a na muruti in ŋa,
na in gaja saasa ? »
14 Hayimeleexi da tunkayugon jaabi nan ti :
« Ko wa anken yugun di,
duntaŋe ga ni xoyi Daawuda ?
An renyaxaren kiina ya ni,
an tangandaanun yingumen ya ni,
seri xoore xa ya ni an kaara.
15 Ee !
Ke ta baane ya ni,
nke ga da a hiinun haayi Alla maxa ?
Ke ta baane he !
N yinmanke,
maxa in jaragi,
maxa in kaadunkon jaragi,
bawo,
nke nta hari baane tu ke hi di ! »
16 Tunkayugon ti :
« Hayimeleexi,
an do an kaadunkon su n xawa kalla ya ! »
17 Ken halle,
tunkayugon da yaamariyen kini tangandaanu be siginton ga ɲi no nan ti :
« Xa dangi,
axa na Tunka Duumanten sadaaxakiɲandaanun kari,
bawo,
i da Daawuda deema,
i ga da a tu ti a wa wurunu,
i ma a ko in da.
» Nxa tunkayugon yugun ma duŋe i kittun fuutunu ti i wa Tunka Duumanten sadaaxakiɲandaanun kalli.
18 Kendi,
Tunkayugon da Doweega Hedoomuranke yaamari,
a nan daga sadaaxakiɲandaanu ku kari.
Doweega xusanta dangi na i kari.
Ken kootan ŋa,
a da tansege do yugu karagi ya kari,
i wa na leeninxusaaben rondi.
19 Ken halle,
sere su ga wa Nooba,
sadaaxakiɲandaanun deben ga ni,
Sawulu da a su kari ti kaahan ŋa,
yugun do yaxarun,
leminun do sugundinto,
ado naanun do harun do tanmisu.
20 Renyugu baane ya n kisi Hayimeleexi da,
a toxon ni Habitaari,
ken wuru nan daga katta Daawuda yi,
21 a da a xibaari nan ti :
« Sawulu da Tunka Duumanten sadaaxakiɲandaanun su kari. »
22 Daawuda xusa ti Habitaari da :
« Gelli koota be n ga da Doweega Hedoomunken wari Nooba,
n da a tu,
a wa a konni Sawulu da.
Nxa,
nke yinmen wa axa kaadunkon kallen wure.
23 Toxo in maxa yere,
maxa kanu.
Ke be ga wa a munda na an kari,
a ya wa a munda na in xa kari,
nxa,
an wa haqiritaaxe di nke maxa yere. »