[Xeyila deben tangaye Daawuda maxa]
23
Daawuda da a mugu ti filisitinun wa na Xeyila gaja,
na i yillun xaaxa do gendun ŋa.
2 Daawuda da Tunka Duumanten ɲaaga nan ti :
« N nan daga filisitinu ku gaja ba ?
» A da a jaabi nan ti :
« Daga,
an na filisitinun gaja na Xeyila kisindi. »
3 Nxa a terallenmun ti a da :
« Oku xaaxantun wa Yehuuda yere,
o ra wa dagana kanmoxo Xeyila,
na filisitinun kuren gaja ? »
4 Daawuda saage na Tunka Duumanten ɲaaga ta hillandi yi.
A ti a da :
« Giri an nan daga Xeyila,
bawo,
n wa an deemana filisitinun kanma. »
5 Kendi,
Daawuda do i yugun daga Xeyila na filisitinun gaja,
na i daabanun raga,
na kasaara xoore kiɲe i ya.
Kundu ya ni a ga da Xeyila taaxaanun kisindi.
6 Hayimeleexi renyugo,
Habitaari,
a ga ɲi ga wuru dagana Daawuda ne Xeyila,
batinxusaaben ɲi a maxa no.
[Daawuda haraxatuye Sawulu maxa]
7 Sawulu da a mugu nan ti Daawuda daga Xeyila.
A xusanta ti :
« Alla da a ro in kitten di,
a ga daga i du ro kason ŋa debe di,
roraqi gabu do i soxaadun ga wa a yi. »
8 Sawulu da kuren su xiri gajaŋen xannemaxa,
i n daga Xeyila,
na Daawuda do i yugun raqeraga.
9 Daawuda da a tu Sawulu wa na ho bure dabari i xannemaxa,
a ti sadaaxakiɲandaana Habitaari da :
« Batinxusaaben riiti. »
10 Ken halle Daawuda ti :
« Tunka Duumante,
Banisirayila Alla,
n da a mugu nan ti Sawulu wa nan ri Xeyila,
a wa riini deben burunqu nke saabu da.
11 Ayiwa,
Xeyilankon wa duŋene nke kinni a yi ba ?
Toŋun xa yi,
a wa riini ba ?
Tunka Duumante,
Banisirayila Alla,
n xibaari,
nke na an komen ya yi.
» A ti :
« A wa riini. »
12 Daawuda ti kendi :
« Xeyilankon xa wa duŋene nke do in yugun kinni Sawulu yi ba ?
» Tunka Duumanten ti :
« I wa axa kinni a yi. »
13 Daawuda da i yugun xusanta giri,
i ɲi kamu tunmi me haqe nan bugu Xeyila,
i wa terene bakka noqu nan daga noqu tana.
Sawulu da a mugu ti Daawuda wuru bakka Xeyila,
a maxa bugu katta a yi xadi.
14 Daawuda toxo muqen ŋa Jiife gunjuran gidinkunmun di.
Ken da a ɲi,
Sawulu wa na a mundu koota su,
nxa Alla ma Daawuda kini a yi.
15 Na Daawuda toxo Hoorisa,
Jiife gunjuran di,
a da a tu Sawulu bugu,
a ga wa a munda na i kari.
16 Nxa Sawulu renyugo Yoonata daga Daawuda ne Hoorisa na a limaanaaxun xotondi do Alla yi.
17 A ti a da :
« Maxa kanu,
n haaba Sawulu kitten nta katini an ŋa abada,
anken ya wa riini ɲa Banisirayila tunkayugon ŋa,
nke wa ɲaana an battamaxan ŋa,
hari nke haaba Sawulu yinme wa ken seeda. »
18 I hilli da lahidun kurunbankaaxundi Tunka Duumanten jon di.
Ken halle Yoonata saage dagana i kaara,
nxa Daawuda toxo Hoorisa.
19 Jiifenkon yogo daga katta Sawulu yi Gibeeya,
nan ti a da :
« Daawuda fuxunten wa oku maxa Hoorisa*,
Haxiila siŋan baŋen ŋa,
gunjuran hankitten di.
20 Kendi saasa,
tunkayugo,
genni an ga wa a munda nan daga no,
haxati su ga liŋi an da,
li,
o wa a kinni an ŋa. »
21 Sawulu ti i da :
« Ari na axa barikandi,
bawo axa hinne in ŋa.
22 Xa daga,
axa n segesegendi moxosiri,
axa na a tu danqanaaxu kanma,
a ga wa noqu be,
ado sere be ga da a wari,
bawo,
n da a mugu ti gotinte ya ni moxoburu.
23 Xa da a tu danqanaaxu kanma,
a fuxunten ga wa noqunu beenu,
kendi,
axa n saage riini xibaari senbente ko in da.
Genni a ga wa non maran di,
n wa dagana do axa batte,
na a mundu Yehuuda xabiilan su di. »
24 I saage nan daga Jiife Sawulu kaane.
Ken da a ɲi,
Daawuda do i yugun ɲi Mooni gunjuran di,
beranɲara be ga wa gunjuran hankitten di.
25 Sawulu ken di i yugun daga a mundu.
Daawuda ga da ken mugu,
a xusanta daga do giden baŋen ŋa,
nan toxo Mooni gunjuran di.
Sawulu ga da ken mugu,
a da a batu dagana non ŋa.
26 Sawulu do i yugun ɲi terene do giden kaaran ŋa,
Daawuda xa do i yugun wa terene do kaara baanen ŋa.
Daawuda ɲi a soobene nan wuru Sawulu yi,
bawo Sawulu ɲi a munda na aken do i yugun liixi ya,
na i kittiranlaga.
27 Haare xusanta ri Sawulu yi nan ti a da :
« An ga ma ri hane,
filisitinun xenu jamaanen ŋa de ! »
28 Sawulu xusanta saage bakka do Daawuda yi,
nan daga filisitinun gaja.
Ken ya saabu da,
noqu ke toxon ga xiri « Hateyen gide ».