[Daawuda yaaheye Sawulu maxa]
24
Kendi,
Daawuda bugu non ŋa nan daga fuxu Heeni-geedi noqu beenu segenden xoten ga ni.
2 Sawulu ga saage bakka filisitinun xataran ŋa,
a da a mugu ti Daawuda wa gunjuran di Heeni-geedi.
3 Sawulu xusanta wujunu sikki yugo sagara Banisirayilaranko di nan daga ti i ya,
i na Daawuda do i yugun mundu Gidinkanmansugun-hatanun do me naxa.
4 I ga kiɲe tanmisun gallu be ga wa killen di,
Sawulu da gidinkunme wari,
a xusanta ro no xurayinterende yaaxemaxa.
Ken da a ɲi,
Daawuda do i yugun fuxunten wa gidinkunme ke di.
5 Daawuda yugun xusanta ti a da :
« Eeyi,
Tunka Duumanten ga da koota be lahidun wutu an da haayi lenki ya yi,
a ga ti :
“ Nke wa an xonnen roono an kitten di,
hi be ga n liŋi an da,
an na a ɲa a yi.
” » Daawuda xusanta giri,
na Sawulu dorokinkanpen mullinkutu,
6 nxa,
a ga da ken ɲa,
a yinme haqiren da a waaju.
7 A ti i yugun da :
« Ari na in kisindi hobure ɲaaye yi n yinmanken ŋa,
walima na in kitte kiɲandi a yi,
bawo Tunka Duumanten da a sugandi na a ɲa tunkayugo yi. »
8 Daawuda doxo i yugun ŋa,
i do ke sehe konnen di,
a da i kaba xa,
i nan maxa xenu Sawulu yi.
Ken halle,
Sawulu bugu gidinkunmen di nan daga do i kille yi.
9 Ken halle Daawuda bugu gidinkunmen di na Sawulu gangu nan ti :
« N yinmanke,
tunkayugo !
» Sawulu xusanta i halle haayi.
Daawuda jimi nan sujudi.
10 Kendi Daawuda ti Sawulu da :
« Manni an ga wa serun sehen terinkana,
ku beenu ga wa tini,
Daawuda wa an tooroyen ya munda ?
11 An yinme da a wari lenki,
Tunka Duumanten ga da an ro in kitten di moxo be gidinkunmen di.
I ti n na an kari yinme ya,
nxa,
n hinne an ŋa nan ti,
n nta in kitte kiɲandini an ŋa,
bawo,
an ni Tunka Duumanten seri sugandinte ya yi.
12 Hee n haaba,
anken yinme na a haayi,
ho be ga wa in kitten di,
an na ken tu.
An dorokinkanpen ya ni !
N da a kutu,
nxa,
n ma duŋe an kalli.
Kendi,
an wa a haamunu ke di nan ti,
nke nta hobure ŋanniyana ti an ŋa,
n nta an janbana.
N ma an haqe bonondi,
nxa nan kahu ke su yi,
anken wa na inke xata,
an wa a munda na in kari.
13 Tunka Duumanten wa kiitini o naxa,
a wa inke tanbon tugana an di,
nxa nke yinme xoni nta hobure su ɲaana an ŋa.
14 Xoyi taalin ga wa tini :
“ Hoburun wa bakka hoburen ya di ”,
nxa nke,
n nta hobure ɲaana an ŋa.
15 Banisirayila tunkayugon bugu ko xannemaxa ?
Anken wa do ko batte ?
An wa da inke ya batte,
nke xa heti ho tana yi wulli hure halle,
walima duuɲe.
16 Ari na Tunka Duumanten ɲa o kiitaanan ŋa,
a na in hi ke haayi,
nan ɲa in da haasandaana yi,
a na in xurandi hi ke di,
na in kisindi an ŋa. »
17 Daawuda ga duguta sehen ŋa biran be,
Sawulu ti :
« Ke ya na an xannen ŋa,
eh n renme Daawuda ?
» A wu ti sonqoxan xoore yi.
18 Ken halle nan ti Daawuda da :
« Anken ni seri sire yi diina nta inke yi,
bawo,
an da in tuga ti hosire yi,
na a toxo nke da an tuga ti hobure ya yi.
19 An da a bangandi in da lenki,
nan ti an da hosiren ya ɲa in da,
bawo,
Tunka Duumanten da in ro an kitten di,
an ma duŋe in kalli.
20 Seren ga na i xonnen kita,
a na a rawalla ya ?
Ari na an tuga xeeri yi,
an ga da ke be ɲa in da lenki.
21 Nke da a tu saasa,
an wa ɲaana tunkayugo yi,
Banisirayila tunkaaxun wa sabatini an kitten di.
22 Kendi,
kuna in da ti Tunka Duumanten ŋa saasa nan ti,
an nta in soxoodun burunqunu in halle,
an nta in toxon burunqunu bakka in haabankan ŋa. »
23 Daawuda kuna Sawulu da.
Ken halle,
Sawulu daga i kaara.
Nxa Daawuda do i yugun kun kun daga i huxuran* ŋa.