[Daawuda do Naabali xibaare]
25
Ku hiinu halle,
Samuyeli faati.
Banisirayilaranko su kahu me yi na a furunhin ɲa,
na a rondi i kaara,
Raama.
Ken halle,
Daawuda daga Paraana gunjuran¤ di.
2 Ke haxati,
banna xoore ɲi Mooni,
naaburi gabe ɲi a maxa Karameela¤ kaaran ŋa,
wujunu sikki jaxe ɲi a maxa ado wujune sugo.
A ɲi i jaxayinten xeesunu¤ Karameela ya.
3 A toxon ɲi Naabali,
a yaqen toxon ɲi Habigaayila.
Habigaayila ɲi haqirisirigume ya yi,
a haranparen ɲi.
Nxa Naabali yinme ɲi xawuye yi,
a hiiɲataqun sire ma ɲi.
A ɲi bakka Kaalebu xabiilan ya di.
4 Daawuda da a mugu na i du toxo gunjuran di ti Naabali wa jaxayintixeesini.
5 A xusanta na haaru wara dagana katta a yi,
seru tanmi,
a ti i da :
« Xa daga katti Naabali yi Karameela,
axa na in kuuɲinde kiɲandi a yi.
6 Axa n ti a da :
“ An do an kaadunko,
xa kebirewaaga.
Ari na barike ro an do an kittirahon su di.
Ari na axa kahu waaga jaman ŋa !
7 N da a mugu ti an wa jaxayintixeesini.
An xa nagaananun ga ɲi da o batte,
o ma i tooro ti ho wo ho yi,
i ga da wuce su ɲa da o yi Karameela,
ho wo ho ma sanki i da.
8 An golliɲaŋaanun tirindi,
i wa an xibaarini.
O haayi ga ri an ŋa ke sallinkoota yi,
Daawuda wa a mundunu an maxa kuna,
an nan siro i haaru ku da.
An ga ra wa ke be da,
a kini oku o do an renyugo Daawuda yi. ” »
9 Haarun daga Naabali ne,
na haaren su kiɲandi a yi,
nan ti haare ke bugu Daawuda ya yi.
Ken halle i terinkandi.
10 Naabali ti i da :
« Ke Daawuda ni koxa yi ?
Yisaayi renme ke ni ko yi ?
Komi wurunton gabo wa bakka i kamanun maxa ke haxati yi de !
11 Mani maxa nke wa in yiganden do in jin do in ga da ho be xurusi in jaxayintixeesaanun da,
ken kinni seru ya n ga nta i bugura tu ? »
12 Xeyihaarun saage do i killen ŋa nan ri Daawuda ne,
na sehen su saagandi a da.
13 Daawuda xusanta i yugun yaamari nan ti :
« Xa da axa kaahanun wutu !
» Baane su da i kaahan jongi,
Daawuda yinme xa da i kaahan jongi.
Kamu naxati yugo me daga do Daawuda batte,
kamu hilli toxo batten di na yokkun koroosi.
[Habigaayila deemande katta Daawuda yi]
14 Golliɲaŋaana baane ti Naabali yaqe Habigaayila da :
« A haayi,
Daawuda da haaru wara riini katta o yinmanken ŋa,
i na a kuuɲi,
nxa a henti i ya na i ka.
15 Na a toxo,
ku seru xa siro o da moxosiri,
o ga ɲi i tintoyen di biran be gunnen di,
toora su ma o kita,
ho wo ho ma sanku o da.
16 I ɲa o da kobi yi wuron do kiye,
o ga da wuce su ɲa na o tanmisun nagaani.
17 Anken nan sinme saasa,
an na a haayi an ga n xawa ke be dabarini,
bawo maasiba xoore ya jonkoyinten wa o yinmanken do i kaadunkon ŋa.
Aken xa ni baataransere ya yi,
ado sere nta me haamunu. »
18 Habigaayila da a jewondi,
na kamu hilli buuruyinme wutu,
ado resenjigirihu hilli,
do jaxi xeexentu karagi,
ado alikaamahunsi ɲaaɲante muudu karagi,
ado kame resenmolla kaawantu,
ado turonlen kaawanten kamu hilli molla,
na ku su tiŋandi harun ŋa,
19 nan ti i golliɲaŋaanun da :
« Axa,
xa daga in kaane,
n wa do axa halle yi.
» A ma i kiina Naabali xibaari ti ke golle yi.
20 Na a toxo haren kanma,
a wa nan daga do giden halle yi,
Daawuda do i yugun xa ɲi kanma nan daga do a baŋen ŋa,
i xusanta gemu.
21 Daawuda ɲi malasana,
a wa tini :
« Nke xoni da ke yugo naaburen tanga gunjuran di duuro ya,
ho wo ho ma sanku a da,
nxa a da a tuga in ŋa ho bure ya yi.
22 Yelli Alla ga na in yanganxata¤,
n ga na yugu baane toxo a yugun di yere do yillankaran naxa ! »
23 Habigaayila ga da Daawuda wari baane,
a yanqa karama bakka haren kanma,
nan jimi nan sujudi Daawuda jon di.
24 Ken halle,
a tusi nan ti :
« N yinmanke,
ke sanme na inke ya batte yi.
Haqutoxo,
sehe wa in maxa na a ko an da,
n terinka,
nke na an komiyaxaren ya yi.
25 N kamanyugo,
Naabali hin nan maxa an hanmi,
baataransere ya ni.
A toxo ke do a yinme su ya nan xawa :
Naabali wure ni xawuyen ya,
xawuyen xa ya ni.
Nke na an komiyaxaren ya yi,
an ga da haaru beenu wara dagana,
n ma seede i ya.
26 N kamanyugo,
n wa kunana an da saasa ti an birantaaxun ŋa,
nan ti Tunka Duumanten da an tanga horijoqen do tanbotugeye yi ti an kitten ŋa.
An xonne su ga wa kanma na hoburen ya mundu ti an ŋa,
Ari na a su lagarindi xoyi Naabali moxo.
27 Kendi,
n wa a mundunu an maxa,
n yinmanke,
n do darontanhoonu be haayi ga ri,
an na i raga,
an na i kini an yugu beenu ga wa do an batte ya.
28 Nke wa a mundunu an maxa xa,
an nan yaaha in maxa,
bawo sikka nta a di,
Tunka Duumanten wa riini tunkaaxu sabatinte kini an ŋa,
bawo an wa na gajaŋen ɲa Tunka Duumanten ya saabu da.
Ari na an tanga hoburen ŋa an wuyun kutten su.
29 Sere girinte wa,
a wa na an haraxatu yelli i na an kari,
nxa an yonkin tanganten wa Tunka Duumanten maxa,
an Kama.
Nxa an xonnun yonkinun wa hittene laatoye di xoyi kocen ga wa hittene manangullan ŋa moxo be.
30 Ayiwa,
Tunka Duumanten ga da xeeri be lahidun wutu an da,
a ga na a su tinmandi an da bire be,
na an ɲa Banisirayila geesundaanan ŋa,
31 an nta riini nimisi nan ti an da hore joxu na a toxo sababun nta a yi,
walima an da tanbo tuga an yinme da.
Ayiwa Tunka Duumanten ga na neeman ɲa an da,
sinme do in ŋa,
an komiyaxare. »
32 Daawuda ti Habigaayila da :
« Tiigeyen wa Tunka Duumanten da,
Banisirayila Alla,
aken be ga da anken xeyi inke da lenki.
33 N wa Alla tiigana an hontuwaaxun da,
na an yinme nawaari,
bawo an da in tanga bakka horijoqe yi,
ado tanbotugeyen ŋa n yinme da ti in kitten ŋa.
34 Nxa,
n wa kunana ti Tunka Duumanten ŋa,
Banisirayila Alla :
aken be ga da in kisindi bakka hoburen ɲaayen ŋa katta an ŋa,
an ga ɲi an ga ma a jewondi riini katta in ŋa,
yugu baane ma ɲi toqo Naabali maxa yere do soxubahanan naxa. »
35 Daawuda da darontanhoonun raga nan ti a da :
« Saage dagana an kaara,
an kisinte.
N da an sehen mugu,
n duŋe an muuruhon ŋa. »
[Naabali kalle]
36 Habigaayila xusanta saage Naabali ne,
a da a ɲi waliima xoore wa a maxa kan di xoyi tunkayugunwaliima.
Ken da a ɲi,
Naabali ɲaxalinta xooren ya ni,
a mininten xa ni dangihaqe.
Habigaayila ma ho wo ho ko a da ma yillen ga kare.
37 Soxuban ŋa,
minnen ga dangi a yi,
yaqen da hin su laxami a da,
a sondonmen xusanta kuti a noxon di,
a kaawa xoyi gide.
38 Bito tanmi me dangi halle Tunka Duumanten saage na a katu,
a xusanta kara.
39 Daawuda ga da a mugu ti Naabali kara,
a ti :
« Tiigeyen wa Tunka Duumanten da,
aken be ga da in tanga bire be,
Naabali ga da in roxo,
a ga da in tanga xa bakka hoburiɲaayen ŋa.
N wa a nawaarini,
a ga da Naabali hoburen saaga a yinme yi xa.
» Ken halle,
Daawuda da haare wara katta Habigaayila yi nan ti i wa a munda na a yaxi.
40 Daawuda haarun ri katta a yi Karameela nan ti a da :
« Daawuda da o wara katta an ŋa nan ti i wa a munda na an yaxi. »
41 A xusanta giri nan sujudi nan ti :
« A ɲi inke wasana nan ɲa komiyaxare yi,
na in kamanyugun golliɲaŋaanun taanun yanqi ! »
42 A giri tawuye di,
nan setu hare yi,
na komilenxusu karagi wutu do i ya,
kun ware do a halle yi.
A da Daawuda haarun batu dagana,
nan ɲa a da yaqe yi.