[Daawuda yaaheye Sawulu maxa ta hillandi yi]
26
Ken halle,
Jiifenkon daga Sawulu ne Gibeeya nan ti a da :
« Daawuda fuxunten wa Haxiila siŋan kanma nan jonkoyi gunjuran ŋa. »
2 Sawulu xusanta daga Jiife gunjuran di.
Wujunun sikki yugo be,
a ga da i sagara Banisirayilarankon di,
wa do a batte,
yelli i na Daawuda mundu non ŋa.
3 Sawulu daaxa killinkaaran ŋa,
Haxiila siŋan kanma,
gunjuran kaaran ŋa.
Ken da a ɲi,
Daawuda wa gunjuran di.
A ga da a mugu ti Sawulu ri do i batte non ŋa,
4 a da sorosorondaanun wara dagana hin yaaxen mundu,
a tuwi a di danqanaaxu yi ti Sawulu ri.
5 Daawuda xusanta giri nan daga Sawulu daaxaran ŋa.
A da Sawulu saxuran wari,
a wa xenqene a do i kurinyingume Habineeri,
Neeri renyugon ga ni.
Sawulu ɲi xenqene daaxan di kurinlenmun naxa.
6 Hayimeleexi,
Heetiranke ga ni,
ado Habisaayi,
a maa ga ni Seeruya yi,
Yowaabu waaxin ga ni,
ɲi ga ri do Daawuda yi,
a ti i da :
« Ko wa dagana do inke batte Sawulu ne daaxan di ?
» Habisaayi ti :
« Nke wa dagana do an batte. »
7 Daawuda do Habisaayi xusanta daga daaxan di ken wuro yi,
i da Sawulu ɲi xenqene no,
a tanmen tutunten wa a yinbaŋen ŋa,
Habineeri do kurinlenmun wa xenqene a kaaran ŋa nan koori a yi.
8 Habisaayi ti Daawuda da :
« Lenki xoni Alla da an xonnen ro an kitten di.
An nta sikki nke na a tonto ɲiiɲen ŋa ti tanmen ŋa,
botoyi baane,
ken wa wasene. »
9 Daawuda ti Habisaayi da :
« Maxa a kari de,
bawo sere be nda i kitten ro Tunka Duumanten seri sugandinten ŋa,
an wa yanganxatene ! »
10 Ken halle Daawuda ti xadi :
« N kuna ti Tunka Duumanten ŋa nan ti,
Tunka Duumanten yinme wa riini a katu,
a kootan wa riini,
a wa kalla,
walima a na daga gajara yi,
a na halaki no.
11 Tunka Duumanten nta a newundini in da na in kitten kiɲa i seri sugandinten ŋa.
Nxa saasa,
li,
tanmen wutu,
ke be ga haayi do a yinbaŋen ŋa,
ado boli ke,
o n daga. »
12 Daawuda da tanmen do bolin wutu Sawulu yinbaŋen ŋa,
kendi i daga.
Sere su ga ɲi daaxan ŋa ɲi xenqene ya,
seri baane nta i di,
an be ga wundi walla an ga tuwi a di ke be ga ɲa,
walla an ga buguseedo,
bawo Tunka Duumanten da xenqo xote ya wara i kanma.
13 Daawuda da holoŋen kutu nan daga do giden kaara baanen ŋa,
nan sigi giden tontonbooren di laatoye di,
bera xoore ɲi i naxa.
14 Daawuda da Neeri renme,
Habineeri do kuren gangu nan ti :
« Ee Habineeri,
manni an ga nta in jaabini ?
» Habineeri xusanta a jaabi nan ti :
« Ko wa na tunkayugon gangu ? »
15 Daawuda ti Habineeri da :
« Anken heti yugo ya yi ba ?
Kan yugu sire na Banisirayila xoyi an moxo ?
Manni an ga ma tunkayugon tanga,
an yingume ?
Sere haayi ga ro daaxan di,
a wa a munda na a kari.
16 An ga n xawa hi be ɲaana,
an ma ken dabari !
N kuna ti Tunka Duumanten ŋa,
anken da an yugu ku nan xawa kalla ya,
bawo,
Alla ga da axa yingume be sugandi,
axa ma a koroosi.
Anken yinme na a haayi,
tunkayugon tanme be do a bolin ga ɲi a yinbaŋen ŋa na minna ? »
17 Sawulu da Daawuda xannen tu,
a xusanta ti :
« Ke na an xannen ya yi ba,
n renme Daawuda ?
» Daawuda ti :
« N xannen ya ni,
n yinmanke tunkayugo. »
18 Daawuda ti xadi :
« N yinmanke,
manni an ga wa an komiyugon xatana ?
N da mani ɲa,
n hoburen ni kanni xa yi ?
19 N kamanyugo tunkayugo,
n sehen terinka !
Genni Tunka Duumanten ya ga da an wara in ŋa,
n wa sadaaxa bugundini a da,
n na laxahiya.
Genni serun ya ga da a ɲa,
yelli Tunka Duumanten ga na i langa,
bawo,
i da in xata bakka ɲiiɲe be Tunka Duumanten ga da a sugandi i jaman da,
nan ti in da :
“ Daga alla tananu batu ! ”
20 Kendi saasa,
yelli n horen gan nta joqi do tuŋan ŋa,
n laaten ga ni bakka Tunka Duumanten ŋa !
Manni Banisirayila tunkayugon ga wa inke mundunu kundu,
n xa heti ho tana yi duuɲe halle ?
Manni a ga wa in togaarini xoyi togaanan ga wa sagaran togaarini moxo be yi giden di ? »
21 Sawulu ti kendi :
« Nke ya nda hoburen ɲa.
N renme Daawuda,
saage,
an da in yonkin daro lenki,
ken saabu da,
lenki dangi halle nta hobure ɲaana an ŋa.
Nke ya n xawuyaaxu,
n da hoburen ɲa. »
22 Daawuda ti kendi :
« Ke haayi tunkayugon tanmen ya yi,
an ra wa an yugun yogonu walla riini do a batte.
23 Tunka Duumanten wa beesu tugana ti an teleŋontaaxun do an saxiraaxun ya yi.
Tunka Duumanten da an ro inke kitten di lenki,
nxa,
n ma duŋe n kitten saqa sere be yi,
Tunka Duumanten ga da a sugandi.
24 Xoyi in ga da an yonkin jaate ho xoore yi moxo be lenki,
Tunka Duumanten wa riini inke yonkin jaate ho xoore yi kundun ŋa,
na in tanga liixiyen su yi. »
25 Kendi Sawulu ti Daawuda da :
« N renme Daawuda,
Ari na an barikandi.
Anken wa riini sigi ti gollu xooru ya yi,
ayiwa,
an wa yinmarawutiye kitana a su di xa.
» Ken halle,
Daawuda daga do i killen ŋa,
Sawulu xa saage do i kaara yi.