[Daawuda dagaye filisitinu ne]
27
Kuunu dangi halle,
Daawuda ti i noxon di :
« A su di,
koota yi Sawulu wa duŋene in kalli.
Ken ho siren ni,
n nan wuru dagana filisitinun jamaanen di,
kendi Sawulu ga na in mundu moxon su di Banisirayila ɲiiɲe ke su di,
a jikken na xose n wariyen di,
n na kisi a yi. »
2 Ken halle Daawuda ado kamun tunmi yugo be ga wa da a yi daga Gaata tunkayugon baŋen ŋa,
Mooxa renme Haxiisa.
3 Daawuda do i yugun toxo Haxiisa ne Gaata,
baane su do i koren ɲi doome,
Daawuda yinme do i yaqun hilli ɲi doome Yijireelinke Hayinoomu,
ado Karameelanke Habigaayila,
Naabali hurujanyaxare.
4 Sawulu ga da a mugu ti Daawuda daga Gaata,
a maxa a mundu xadi.
5 Ken halle,
koota yi Daawuda ti Haxiisa da :
« Genni an saxiraaxun ga wa in kanma,
noqu kini in ŋa an debi tugunnu ku di taaxura yi.
An komiyugon nta xawa taaxunu kapa an ŋa debi xooren di. »
6 Ken koota su yi,
Haxiisa da Sixilaaga deben kini a yi.
Ken noqu xusanta ɲa Yehuuda tunkayugun xalle yi ma lenki.
7 Daawuda da siine do xasu naxati ya ɲa filisitinun jamaanen di.
8 Ken haxatin ŋa Daawuda do i yugun ɲi baamen ɲaana Gesuururanko do Gijiirirankon do Hamaleexirankon ŋa.
Ku jama taaxu jamaane ke di gelli ganni¤,
nan giri Suura yi nan daga a wara Misira yi.
9 Daawuda ga ɲi i gajana,
a ma ɲi yugo toqo,
a ma ɲi yaxare toqo,
a ɲi tanmisu,
naanu,
haru,
ɲogomun do yiraamun wutunu,
ken halle nan saage dagana katta Haxiisa yi.
10 Kendi Haxiisa wa tini a da :
« Axa da gajaŋen ɲa minna lenki ?
» Daawuda ɲi tini :
« Yehuuda hankitten di,
ma Yarameeli hankitten di walima xa,
Xeeninun maran hankitten di. »¤
11 Daawuda ma ɲi yugo toqo,
a ma ɲi yaxare toqo,
a ɲi tini :
« Sere su nan maxa hirindi dagana Gaata,
kuudo o ga wa hi be ɲaana,
a toŋun nan maxa ri tuwi.
» Daawuda da ke golle dabari i taaxuwucen su di filisitinun ne.
12 Haxiisa ɲi Daawuda toŋundini,
a wa tini i noxon di :
« Xoyi Daawuda ga da ku golli buri gabu ɲa Banisirayilarankon ŋa,
a na toxo inke gollen ŋa bada. »