28
Ke haxati yi,
filisitinun da i kurinlenmun kahuma me yi na Banisirayila gaja.
Kendi Haxiisa ti Daawuda da :
« Moxo su nta a yi,
ma an da an yugun ga bugu da in ŋa dagana gajaran ŋa ya. »
2 Daawuda ti Haxiisa da :
« A siro,
an komen ga wa riini ke be dabari,
an wa ken walli.
» Haxiisa ti kendi :
« Ken ga na ɲa,
nke xa wa anken ɲaana in tangadaanan ŋa,
an wuyu kutten su. »
[Sawulu do doomayaxare]
3 Ke haxati da a ɲi Samuyeli faati*,
Banisirayilarankon su da a furunhin ɲa,
na a rondi i deben di Raama.
Sawulu xa ɲi ga da jinnagumun su xata bakka jamaanen di,
ado seru beenu ga wa sehene do hurun ŋa*.
4 Filisitinun kahu me yi nan ri nan daaxa Suneemu,
Sawulu xa da Banisirayila su kahu me yi nan daaxa Gilibooya.
5 Sawulu ga da Filisitinu kuren wari,
a kanu ma a sondonmen ga wa sarallene.
6 A da Tunka Duumanten tirindi,
nxa Tunka Duumanten ma a jaabi.
A ma a jaabi ti kuyu yi,
a ma a jaabi ti Wuriimi sokkiwutiye yi,
a ma a jaabi ti xeyihaaru yi.
7 Kendi Sawulu ti i seri tintun da :
« Xa da yaxare mundu in da,
a do furun ga wa sehene doome,
n nan daga in xibaaren haayi.
» A yugun ti a da :
« Baane wa kitene Heeni-dooro. »
8 Sawulu da i yiraamen yilla,
na ho tana rondi,
yelli sere nan maxa i tu.
A do yugu hilli daga da i ya,
nan daga yaxaren ne wuron di,
nan ti a da :
« Siro in da de,
an nan haayindi in da,
n ga wa riini sere be toxon ko an da,
an na a yonkin riiti in da. »
9 Yaxaren ti a da :
« Sawulu ga da ke be ɲa,
anken ma ken mugu ya ba ?
A da jinnagumun xata bakka jamaanen di,
ado sere su ga wa sehene do furun ŋa.
Anken xa wa kalaŋe tugunu inke yi,
manni an ga wa a munda na in halaki ? »
10 Sawulu kuna a da ti Tunka Duumanten ŋa nan ti :
« N kuna ti Tunka Duumanten ŋa nan ti,
toora su nta an kitana ke hi di. »
11 Kendi yaxaren ti :
« N na koxa riti an da ?
» A ti :
« Samuyeli riti in da. »
12 Yaxaren ga da Samuyeli wari,
a xaaru nan ti Sawulu da :
« An xa da in janba mani ya ?
Na a toxo,
an ya ni Sawulu yi ! »
13 Tunkayugon ti a da :
« Maxa kanu,
a ko in da,
an da mani wari ?
» A ti Sawulu da :
« N yaaxen wa yonki yi segene bakka do ɲiiɲen ŋa. »
14 Sawulu ti a da :
« A na kanmoxo ?
» A ti :
« Yugu xase ya ni,
a wa na doroki xoore rondi.
» Sawulu da a tu,
Samuyeli ya ni,
a xusanta tusi nan sujudi.
15 Kendi Samuyeli ti Sawulu da :
« An xa da in tanpindi mani yi,
na in girindi riini ?
» Sawulu ti :
« N wa xote ya di,
filisitinun wa na in gaja,
Kamanen xa da in wara.
A ntaxa in jaabini xadi,
a nta in jaabini ti xeyihaaru yi,
a nta in jaabini ti kuyu yi.
Ken ya ni,
n ga da an xiri,
an na in xibaari,
n ga n xawa ke be ɲaana. »
16 Samuyeli ti :
« Anken wa inke tirindini mani yi ?
Tunka Duumanten ga duguta na an wara,
na an xoni.
17 Nke ga da Tunka Duumanten sehexanne be ko*,
a da ken sabatindi,
na an tunkaaxun booxo bakka an ŋa,
na a kini sere tana yi,
ken ga ni Daawuda yi.
18 Bawo,
an ma Tunka Duumanten sehen terinka,
na Hamaleexirankon halaki Tunka Duumanten butuyen haqen ŋa*.
Ken ya saabu da,
a ga da ke ɲa an ŋa lenki.
19 Ken duuron he,
a wa riini an do Banisirayilarankon su ro filisitinun kitten di.
Xunbane,
anken do an renyugun wa kapa inke yi.
Banisirayila kurinlenmun xa wa roono filisitinun kitten di. »
20 Ken noqu su di,
Sawulu xusanta xenu seyen di i sigan su kanma,
a ga kanu Samuyeli sehe ke yi moxoburu.
A senben su xa bugu a di,
bawo,
a ma ɲi ga da ho wo ho yiga kiye do wuro.
21 Yaxaren tinto a yi,
a da a wari,
a kanunten ni moxoburu,
a xusanta ti a da :
« A haayi,
n yinmanke,
nke da an yaamariyen batu na in yonkin rawara,
an ga da ho be mundu,
n da a ɲa an da.
22 Saasa anken xa nan siro inke da na in terinka,
n wa yigandinne kinni an ŋa,
an na a yiga nan senbe,
an nan kite dagana. »
23 A bara nan ti :
« N nta yigene.
» A yugun do yaxaren da a xotondi a kanma,
a da i terinka.
A giri bakka seyen di nan taaxu texen kanma.
24 Ken da a ɲi,
gunbunlen kate wa yaxare ke maxa kan di,
a da a jewondi na a xurusi,
na yillijura wutu,
a da a xooti na a katu,
na buuru huuxaadintaŋe dabari.
25 A da a kini Sawulu do i yugun ŋa,
i da a yiga.
Ken halle,
i saage ken wuru kutte su di.