[Daawuda saageye bakka do filisitinu tunkayugon ŋa]
29
Filisitinun da i kuren su kahuma me yi Hafeexa,
Banisirayilarankon xa kahu me yi jinyaaxe kaaran ŋa,
Yijireeli tintoyen di.
2 Filisitinun yingumun ɲi terene do i kurinlensapanun ŋa,
kun ga ɲi kaminjaatu ma wujunun ya yi.
Daawuda xa do i yugun ɲi i hallamaxanterene kahunu Haxiisa yi.
3 Filisitinun yingumun ti :
« Ku Habaraaninu wa mani mundunu yere ?
»
Haxiisa ti i da :
« Axa nta a tu nan ti,
ke ni Daawuda ya yi ba,
aken be ga ɲi Banisirayila tunkayugo Sawulu yugun yogo yi ?
Saasa,
a wa da inke batte,
a nan gaba siine yi.
Ayiwa,
gelli a ga ri in ŋa nan ri a wara saasa yi, n ma leebu wari a yi ! »
4 I xusanta butu a wure nan ti a da :
« A saagandi,
an ga da noqu be xerexere a da,
a nan daga non ŋa.
A nan maxa ri daga do o yi gajaran ŋa nan yille katta o yinme yi na o gaja.
Aken ra wa i kamanyugo Sawulu liŋun kitana ti mani yi,
oku kurinlenmun yinkollanun ga he ?
5 Ke Daawuda ya he,
yaxarun ga da a suugu nan rege nan ti :
“ Sawulu wujunun kallaana,
Daawuda wujunun tanmi kallaana ! ” »
6 Kendi Haxiisa da Daawuda xiri nan ti a da :
« N kuna ti Tunka Duumanten ŋa,
anken ni lahidugume yi,
a nan liŋi in da,
an na gajaŋen ɲa do in batte.
Nke ma hobure su wari an ŋa,
gelli an ga ri in ŋa ma saasa.
Nxa filisitinun yingumu ku kuttu ku saxunten nta a yi abada nan ti an ni teleŋonte yi.
7 Kendi,
saage saasa laxahiya di,
an na maxa filisitinun yingumun butundi. »
8 Ken ga ɲa Daawuda ti Haxiisa da :
« Nke xa da mani ɲa ?
An da mani leebu wari in ŋa,
gelli n ga ri an ŋa nan ri a wara saasa yi ?
Mani maxa,
n ga nta in kamanyugo tunkayugon xonnun gajana ? »
9 Haxiisa da a jaabi nan ti :
« N wa ken tu,
n wa a tu xa,
anken siren ni xoyi Alla malikan moxo.
Nxa filisitinun yingumun nta a munda,
an nan daga da o yi gajaran ŋa.
10 Kendi,
axakun nan furute nan giri,
anken do an komu beenu ga ri do an ŋa bakka Sawulu ne,
kiyen ga na bugu baane,
axa n daga. »
11 Ken ga ɲa,
Daawuda do i yugun furute nan saage dagana filisitinun jamaanen di.
Nxa filisitinun yinme daga Yijireeli.