1 Samuyeli 30

[Hamaleexirankon haraxatuye Daawuda maxa]

Daawuda do i yugun kiɲe Sixilaaga, i gillen bita sikkandi. I da a ɲi Hamaleexirankon da hankitten do Sixilaaga gaja, nan xenu a yi, na a biyi, 2 na yaxarun kittiranlaga, ado sere su ga wa deben di. I ma seri baane kari, ho tugunne yi walima ho xoore yi, nxa, i da i kittiranlaga ya nan dangi. 3 Daawuda do i yugun ga ro deben di biran be, i da a ɲi, deben biyinten ni, i yaxarun xa do i leminun do i renyaxarun kittirallage. 4-5 Daawuda yaqun hilli, Yijireelinke Hayinoomu ado Karameelanke Naabali furujante Habigaayila ɲi seri ragantun di, Daawuda xusanta wu ado sere su ga ɲi do a batte ti wuyixan xoore yi, ma i senben su ga wa ɲemene wuyen maxa. 6 Daawuda liixi moxoburu, bawo, a serun ɲi a munda a nan gididungulle ya, nan sababu, i su sunonten ɲi i renyugun do i renyaxarun kanma. Nxa, Daawuda da senbe kita ti deemanden ŋa, i Kama.

7 Daawuda ti sadaaxakiɲandaana Hayimeleexi renyugo Habitaari da : « Batinxusaaben kini in ŋa de ! » Habitaari da yiraamen kini Daawuda yi. 8 Daawuda xusanta Tunka Duumanten tirindi nan ti : « N ga na ku xennaanu haraxatu, n wa ɲorono i di ba ? » A ti a da : « I haraxatu, an wa i kitana, an wa i kittiranserun xa kisindini. »

9-10 Kendi, Daawuda do kamun tunmi yugo be ga ɲi do a yi daga doome. I ga kiɲe Besoora lanbankitten ŋa, kamu hilli yugo konto non ŋa tanpiyen maxa, i ma katta lanbankitten kutunu, nxa, Daawuda do kamun naxati yugon jokki do i killen ŋa.

11 Gunnen di, i xusanta na Misirankanyugo wari, i da a raga nan ri ti a yi Daawuda ne, na yigande do ji kini a yi. 12 I da turollen kaawantu molla kini a yi, ado resenmolla kaawantu hilli. A yige na hanka kita, bawo, a ɲi ga da kiyu sikki do wuru sikki ya ɲa, a ma yige, a ma mini.

13 Kendi Daawuda da a tirindi : « Anken kaman ni ko yi, an bugu minna ? » Yugon ti a da : « Nke ni Misiranke ya yi, Hamaleexi kome ya na in ŋa. N kamanyugon bara in ŋa, bawo, ke haayi in bita sikkandin ya yi watten di. 14 O xenu Kereeti jamaane hankitten ŋa, do Yehuuda jamaane, ado Kaalebu jamaane hankitte, na Sixilaaga biyi. » 15 Daawuda xusanta ti a da : « An ra wa in kiɲandini ku xennaanu yi ba ? » A ti a da : « Kuna in da ti Alla yi nan ti an nta in kalli, an nta in kinni in kamanyugon ŋa, kendi, n wa an kiɲana i ya. »

16 Kendi, yugon daga ti Daawuda yi xennaanun ne, a da a ɲi i sanqinten wa do noqun su yi, i wa yigene, i wa minni, i wa regene, na a sababun ɲa, i ga da wutte be kita filisitinun do Yehuudakaarankon ɲiiɲen di. 17 Daawuda xusanta i gaja, gelli fajiri ma futuro. Sere su ma kisi i di ma kamu naxati yaxanbaane, kun setu ɲogomun ŋa nan wuru. 18 Hamaleexirankon ga da ho wo ho raga, Daawuda da a su saagandi na i yinme yaqun hilli kisindi. 19 Ho wo ho ma sanku i da, ho xoore kahu ho tugunne yi, renyugo kahu renyaxare yi, walima naabure i ga ɲi ga da a boosi i ya, Daawuda da a su saagandi. 20 Daawuda da Hamaleexirankon tanmisun do naanun raga, a yugun da i geesu riini daabanun tananun kaaran ŋa nan ti : « Ke ni Daawuda ya wutte yi. »

21 Ke ga ɲa, Daawuda saage katti kamun hilli yugu beenu ga ɲi ga konto riini do a batte, i ga toxo Besoora lanbankitten baŋen ŋa. I xusanta bugu na Daawuda do i jaman gemu. Daawuda daga katti i ya na i kuuɲi.

22 Ibeenu ga ɲi ga daga do Daawuda yi, seri buru beenu ga wa i di, baataranseru xa, i ti : « Xoyi i ma daga do o yi gajaran ŋa, kendi, o nan maxa wutte ke yogo kini i ya de ! I na i yaqun do i renmun wutu tanni, i n daga. »

23 Daawuda xusanta ti i da : « N maarenmu, xa maxa ke ɲa. Tunka Duumanten da o ku, na o tanga, na xennaanu ku ro o kitten di, i ga ɲi ga ri xenu o yi. 24 Ko ra wa axa deemana, axa do ke digaame yi ? Hi be ga wa ɲaana : baane su do i taqe, i be daga gajaran ŋa wo, i be toxo daaxan ŋa wo nan koroosindi, a su taqen wa ɲorono. » 25 Gelli ke kootan ŋa, Daawuda da ken ɲa sariya waajibinte yi kanma ma lenki.

26 Bire be, Daawuda ga saage dagana Sixilaaga, a da wutte yogo xeyi katta i menjaŋun ŋa Yehuuda xirisun di nan ti i da : « O ga da wutte be raga Tunka Duumanten xonnun ŋa, ke ni kuyiye yi axa danŋa a di. » 27 A da ho wara dagana Beeti-yeli, Ramooti-negeba, Yatiiri, 28 ado i beenu ga wa Haroweera, Sifimoota, Sitimooya, 29 Raxaali, ado ibeenu ga wa Yarameeli do Xeeninu debun di, 30 ado i beenu ga wa Harima, Booro-hasaana, Hataaxi, 31 Heburoona, ado noqu tananu be Daawuda do i yugun ga daganansaage no.