[Sawulu do i renmun kalle]
31
Ken waxati noxon di,
filisitinun xenu Banisirayilaranko yi.
I katta i da,
seri gabe kara i di Gilibooya giden di.
2 Filisitinun da Sawulu do i renmun haraxatu,
na Yoonata do Habinadaabu do Maaliki-suwa kari,
Sawulu renmu.
3 Ken halle,
gajaŋen xoto Sawulu kanma,
bundansedaanun bunnu da a kita na a joogi moxoburu.
4 Kendi,
Sawulu ti i gajanyokkiwuttaanan da :
« An kaahan foosi an na in suha ti a yi,
ku muruntun maxa ri in suha nan duguta nan soyi in ŋa.
» Gajanyokkiwuttaanan bara,
bawo a xa kanu buru.
Sawulu yinme da i kaahan wutu na i du sedi a kanma.
5 Biran be gajanyokkiwuttaanan ga da a wari Sawulu kara,
a xa da i du sedi i kaahan kanma nan kara kahunu Sawulu yi.
6 Kundu ya ni,
Sawulu do i renyugun sikki do i gajanyokkiwuttaanan do i kurinlenmun su ga kara ken koota baananne yi.
7 Banisirayilaranko beenu ga ɲi holonberan¤ kaara baanen ŋa,
ado ku beenu ga ɲi Yarade haŋen kaara baanen ŋa,
i ga da a mugu ti Banisirayila kuren wuru,
Sawulu xa do i renmun kara,
i xusanta i debun wara nan wuru.
Kendi,
filisitinun ri taaxu no.
8 A yillankaran ŋa,
filisitinun ri seri karantun kittirahoonun xaaxa,
i da Sawulu do i renmun sikki karantun ɲi Gilibooya giden kanma.
9 I da a yinkollan kutu,
na a gajanyokkun bugu a yi,
na i xeyi filisitinun jamaanen su di na xibaaren ko i booribatiranun do jaman su da.
10 I da gajanyokkun wara Sitarooti batikan di,
na a furen genge kobin ŋa Beeti-saana.
11 Filisitinun ga da ke be ɲa Sawulu yi,
Yaabesinko da a mugu,
Gilaadi jamaanen di.
12 Ken ga ɲa,
i seri senbentu su giri,
nan tere do wuron ŋa,
nan daga Sawulu do i renmun furen yanqandi bakka kobin ŋa Beeti-saana,
nan daga ti i ya Yaabesi,
na i biyi non ŋa.
13 I da i xottun wutu na i buru yitten wure Yaabesi,
na bito ɲeeri suumu.