[Annabi Muusa faatiye]
34
Annabi Muusa giri Mowaaba ɲiiɲanbaayanmen ŋa, nan sege Neebo giden kanma, Pisiga gidintonben ŋa, Yeriiho teŋon ŋa. Tunka Duumanten da jamaanen su koyi a yi, na a wutu Gilaadi yi, nan daga a wara ma Daani, 2 a do Nafutaali jamaanen su, Hefarayimu do Manaase jamaane, ken do Yehuuda jamaane, nan daga a wara ma kinxennan geejin ŋa, 3 a do Negeba, ken do tamarun debe Yeriiho guufurunbayanmen ŋa, ma Suwaara. 4 Ken falle Tunka Duumanten daali : « N da ke jamaane ya fin ko, na a laayidun wutu ti kunayen ŋa Ibirahiima do Isiyaaxa do Yaaxuba da, nan ti i da : “ N na a kinni axa bonsonŋun ya yi. ” N da a koyi an ŋa ya, an yinme yaaxen na a wari, xa an nta roono. »5 Ken falle Tunka Duumanten kome Muusa faati Mowaaba jamaanen ŋa, xo Tunka Duumanten ga da a ko moxo be yi. 6 A da a firindi Mowaaba jamaanen ŋa, Beeti-poora teŋon ŋa. Sere su xa nta a xaburan noqu tu hari ke lenki. 7 Muusa faati na a wuyin toxo kame do tanpille siine ya. Fo ma bogu a yaaxon wariyun ŋa, a senbe ke xa na i moxon ya. 8 Banisirayilaganko da Muusa wu Mowaaba ɲiiɲanbaayanmen ŋa tanjikke bito, ken falle a sunon wuyen dangi.
9 Ken da a ɲi Nuunu ren yugo Yuusawu da tuwaaxu xoore kita na a sababun ɲa Muusa ga da i kitten saxu a yinmen ŋa.* Banisirayilaganko da a terinka, Tunka Duumanten ga da ɲaamarindixannu be kini Muusa yi, i da i batu.
10 Muusa me xayifaare ma demu riini Isirayila, Tunka Duumanten do a gaa me tu yaaxe ti yaaxe. 11 A da aken Muusa ya xayi Misira yi, na ku fi xooro do ku kaawafiinu dabari Firawunan do i batulanun do i jamaanen su jon ŋa. 12 Kanufi xoore ma toxo du yi, Muusa ga ma a dabari ti senbe xooren ŋa Banisirayilaganko jon ŋa.