[Annabi Muusa duwanŋe Banisirayilagankon da]
33
Alla sere Muusa ga da duwaawu be wutu Banisirayilaganko da saado a gaa faatini, a faayi ke ! 2 A ti : « Tunka Duumanten ri gilli Tuurisiina giden ŋa, a giri i da ti Seyiri banŋe yi xo kiye, nan ɲelunqe gelli Paraana* gide ke yi, a ri kiɲe Meriba gaa Xadesi yi gilli i da ti banboxun ŋa, katta yanqandanun ŋa, wujunun wujunun maliikanun wa do a batten ŋa, sariyan wa ŋaalini a sooxi tayen ŋa. 3 Iyo, anken be gaa jamon mulla, sere sennun su wa an kitten ŋa, i wa deerini do an ŋa, i gaa sagarandini bakka an daalen ŋa. 4 Muusa da sariya safa o da, na a kini Yaaxuba kafundon ŋa taqe yi. 5 Bire be jaman yinmankon i do Isirayila xabiilanun ga da me ɲi, Yesuruuna ¤ da tunka kita dubaane.6 « Rubeeni gan na bire, a ga n nta kara, a seri lamaanu ku xa gan na ɲa ken moxo yi. »
7 A ga da ke be ko Yehuuda xa da, a faayi : « Tunka Duumante, Yehuuda xannen terinka : a riiti katta i jaman ŋa, a yinme kitten gan na i du faasa, ɲaŋi a da yidanda yi a xonnon kanma. »
8 Leewi xa toxon ŋa, a ti : « Tunka Duumante, an ga da ke be jaarabi Maasa yi,¤ * na a gaja Meriba yi, an Tumiimun do an Wuriimun¤ na aken duntenŋe ya fo yi, ¤ * 9 a be ga ti ike yaaxe nta i ma do i faaba yi ; a ga bara i waaxinun tuunu, nan sanku i renmun ŋa. Baawo a da an daalen tanga, nan mali an laayidun kacen ŋa.* 10 I wa an kiitun tuyindini Yaaxuba yi, nan an sariyan xa tuyindi Isirayila yi xadi, i gaa an futaadini ti sadaxa muumen ŋa, an sadaxindinoqun kanma. 11 Tunka Duumante, a maxankuton wurugi, na a gollun raga, na ku beenu gaa sikki a kaane yi xabaanun kara, ku beenu xa gaa a xonno ga ntaxa gilli. »
12 Ti Beniyamiina toxon ŋa, a ti : « Tunka Duumanten xana xote, ke be gaa a tangana koota su, a wa tuumana ken kaaran ŋa, a wa tuumana a tanganden noxon ŋa¤. »
13 Ti Yuusufu toxon ŋa a ti : « A jamaanen gan na bareki gilli Tunka Duumanten ŋa, kanmun kuyi fasanŋunten gan na a xumaari, ken ga ni nigijen ŋa, a do guufo beenu gaa dullana wureedun ŋa, 14 ken do kiyen gaa ke be jabarindini fo sire, a do fo be gaa saareene xaso su yi fo sire, 15 kafiini gannigan gidun funtifo sirun ŋa, a do tintiŋa xason xalli sire, 16 ken do taqi sire be su ga da jamaanen faga, a do Alla ke be ga bange badagen noxon ŋa, fonnansiraaxu* : ken su gan na Yuusufu yinmen kufunu, aken be ga sugandi i waaxinun naxan ŋa yinmanke yi. 17 Aken ya ni a gunbu fana saarante, darontaaxun wa a da ! A bennun ni gundunan bennun ya, a na jamon takki ti i ya doome ɲiiɲen kanpon su yi. Hefarayimu wujunun-wujuunun do Manaase wujununjaatun na ken moxo ya. »
18 A jaabi Jebuluunu toxon ŋa ti : « Sewo ti an saafariyen ŋa, Jebuluunu, kafiini aken Yisaxaari be gaa an tilliisun wure. 19 I wa jamon gangunu gidinsegendanun kanma, i gaa sadaxa waajibinton sadaxini noqu be. I wa geejin neeman kunpunkenpene, ken ga ni bannaaxu muxunto be gaa seyinŋen ŋa¤. »
20 A jaabi Gaadi toxon ŋa ti : « Xeerin wa yenmen da, ke be ga da Gaadi ɲiiɲen yuruwandi. Gaadi na xo jarinten ga fuuti ya, a gaa i tumujan yinmen do a feefen jenjene bakka me yi. 21 A da dingiran fo siren ya sugandi du da, tunkaaxun dokkon sawunten gaa noqu be yi. Bire be jaman yinmankon ga kafi, I da Tunka Duumanten kiiten do a fo ramuurunton ro ta yi, Isirayila jamun da. »
22 Ti Daani toxon ŋa, a jaabi : « Daani ni jarintan renmen ya, a wa bonte-bontene gilli Basaani yi. »
23 A jaabi ti Nafutaali toxon ŋa ti : « Nafutaali fogu yideyen ŋa, a tiŋe Tunka Duumanten bareken ŋa, a gan na kinxennan do banboxun wutu xalle yi. »
24 Haseeri da, a ti : « Haseeri nan ɲa duwarenme yi renmun su naxa, a gan na yide i waaxinun noxon ŋa, a gan na i tan deebi ten noxon ŋa. 25 An baafun gerun gan na ɲa jaxawallen do mexenbinnen ŋa. An senben gan na duume xoyi an wuyin moxo. »
26 « Yesuruuna¤, fo wo fo nta xo Alla, aken be gaa an deemana. A wa kanfaton ɲeri do tabullun booxono ti senben ŋa. 27 Abadan Alla ke ni senberan ya, a abadandeemanden ya na do ke duna yi. A da xonnon xata bakka an kaane, nan ti : “ I n ɲeme ! ” 28 Isirayila wa tuumana tangeyen noxon ŋa, Yaaxuba waranlaqen wa joqo kaaran ŋa, katta alikaaman do reesendolo kurunban jamaanen ŋa, kanmun yinme xa warandi ti nigijen ŋa. 29 Sewoyen wa an da Isirayila ! Kan jama ni xoyi anken moxo, a gaa Tunka Duumanten tangeyen noxo ? Xodoren ¤ya ni a ga ri an ŋa deemande xanne maxa ; kaafan ya ni xadi a ga da an senbendi. Axa xonnon siroono munaafaxaaxun ya yi katta axa yi, axa wa i jamaanun wurugintaaxun danpunu axa taanun wure. »