[Annabi Muusa suuge]
32
« Kanmu ke wo, n terinka, n faayi sefene ! Ɲiiɲe wo, n digan koninton mugu ! 2 N xaranŋunden gan na tolli xo kanme, n digaamen gan na yanqa xo nigije ; xo nigijen gaa funtindon ŋa, xo kanɲepeɲepen gaa sokkinxayen ŋa. 3 N na Tunka Duumanten toxon ya suugunu. Xa da darontaaxun saaga o Kaman ŋa.4 « A ya ni o gidinbanben ŋa, na o tanga. A gollen su tinmanten ya ni. A killen su teleŋonten ya ni. A ya ni kamanen ŋa, duntenŋe ga ni, toora nta a yi, tonŋuntaaxun do teleŋontaaxu, a ya ni. 5 Xa keeta kuŋa, axa baananbe be nda bono ke falle keeta, ken ni a renme yi xadi ba ? Ke jama : yangoburugumu, janbanto.¤ 6 Axakun bakka ti ku ya yi katta Tunka Duumanten ŋa ? Ku xawuyu ku, tuwanbalinu ! Aken ya feti axa faaba yi, ke be ga da axa taga, na axa sawura, na axa bangandi ?
7 « Xa sinme do kiyi fanon ŋa ; axa n sinme do waxati danginton ŋa. Xa da axa seri fanon tirindi, i na axa xibaari, a do axa xirisu, i na a koni axa da. 8 Bire be Kallanken ga da duna jamon taqen kini i ya, na haadamarenmun fata bakka me yi, a da gingun kara Banisirayila seron¤ jaaten lanɲaran ŋa. 9 Tunka Duumanten ken taqen ni a jama ke ya. Yaaxuba ya ni a xallitaqen ŋa. 10 A da i genmanlenmaaxu gunjuran ŋa, gundunwullun wa foxunu do noqun su yi. A da i koroosi na i tanga xoyi i yaaxen fo binne, 11 nan ɲa xo gopen gaa jeerette i renmun kanma sonkan ŋa, a gaa i kanpon banbana, na i jongi i kunkun kanma. 12 Tunka Duumanten baane ya n da i kanda, kamane tana ma ɲi non ŋa. 13 A da i segendi ɲiiɲen gidi giilun ŋa, i da gunnen yittirenmun yiga. A da yaagen xaarandi bakka gidinkunmen ŋa i da, na ten funtindi bakka gidinɲiiɲen ŋa. 14 Ken do nan feenen do tanmisaxatti, jaxanlen tiyi katen do Basaaninjaxandige, ken do sugundige, nan kafi soxoyillen noonen fo siren ŋa, na reeseyaaxa dunben reesendolon mini, nan fogu.
15 « Yesuruuna¤ kato, a xosi muruti. A kato a fogu, nan daro, a kateyen fuumu, a da Tunka Duumanten sedi, Alla ke be ga da a taga, tangandan sire ke be ga da a tanga, a da a yebure. 16 I da a butundi ti kaman sagantanto ya yi, na a mamandi ti i munu ɲexunton ŋa. 17 I xurusindi jinnanseetaanun ya da, ku be ga feti Alla, kamanu beenu i ga nta i tu, kaman kurunbo lagarintanri, axa faabanu ga ma ɲi ku be batta. 18 Kamane be ga ɲa an da faabe yi nan an tanga xo gidinbanbe, axa da ken sedi ; Alla ke be ga ɲa axa da saaxe yi na axa bangandi, axa mungu do ken ŋa.
19 « Tunka Duumanten ga da ken wari, a da i sedi. A ren yugun do a ren yaxarun da a roxo na a mamandi. 20 A daali : “ N wa in kaaran koyini i ya, n na a wari ke be gaa riini i kita, baawo ku ni seri bononton ya, duntenŋu fe. 21 I da in ɲaxandi ti i sawuranun ya yi, ku beenu ga feti kamanu yi, i da in mamandi ti munonun ya yi, ku beenu ga feti fo wo fo yi. Nke xa wa i ɲaxandini ti fo yi seri tinmanto ga fe, n wa i butundini ti jama bononte yogo yi.* 22 Baawo in butten yanganxatan ya n giri xo yinbe, a wa buyindini ma ɲiiɲanfata wuredunke, a wa ɲiiɲen do i funtifon su yigana, a na gidun xurudunmun buyi. 23 N na masiibon wara do me batten ŋa katta i ya, na in bundanŋun su sedi i ya. 24 Dullen na i lanpundi, fatankumun na i yiga, ken do karawatti buru. N na fonyaatun janba i ya xadi, a do saman tooxinto. 25 Kaafan na i do renmun fata tageyinbinnen falle, xaaxantaaxun mullun na xenu i ya tageyen noxo, fonnanxayi yugon do fonnanxayi yaxare, a do ren roxon do xirisi xaso, ken me ya na i su kitta.
26 « “ N ɲi tini in na i buruxana ya bogo-bogo, na i fin buruxa bakka seron sinmeyun ŋa. 27 Xa in gaa kanna ke be yi, xonnon nan maxa daga a sinma, i gaa tini Tunka Duumanten ma ku ɲa de, ikun ya n da ke su ɲa ti i senben ŋa. 28 Banisirayilaganko feti wulluliŋonto yi, haqile nta i ya. 29 I gan n ɲa haqilanto yi, i na ke faamu, nan xate i lagarun ŋa. ”
30 « Tunka Duumante ke be ga ɲi i tangana xo gidinbanbe, a ga na ɲi ken ya ga n maxa i gaaga, yugu baane katta wujune xatana kan moxo ? Fillo baane na wujunun tanmi xata, Tunka Duumanten yinme ga n maxa i jaman kuyi seri tana yi ? 31 Baawo i tangandaanan do o tangandaanan nta baana, hari o xonnon wa ken tu ! 32 I ɲangollun ni Sodoomunko do Hamooranko ɲangollun ya, i ɲangollun xaxacun ya ni, i tooxinton ya ni. 33 I tooxinton ya ni xo samantooxe, biidan tooxen ya ni a gaa karindini.¤ 34 Tunka duumanten daali kuŋa : “ Yaala ke su tanganten nta in maxa ya ba, ma a sawunten nta in maxa ya ? 35 Binbaganden daga inke ya da, nke ya ni tugandaanan ŋa. I finbini i finbiwaxatin ya yi. I halakikootan tinken ya ni, buruxeyen xoroti i danŋa. ” 36 Baawo Tunka Duumanten na i jaman kiitini ya, a ga na a wari nan ti i komo ku kiɲe i lanpuntaaxun xenpan ŋa, kome ntaxa, hoore ntaxa, a na hinne i ya. 37 A na daali : “ I kamannu na minne ? Tangandaano ku be i ga ɲi du xaliifana i ya, i na minne ? 38 Ku beenu ga ɲi i sadaxon kateyun yigana, i ga ɲi i jinsadaxon minni, i n giri i nan ɲaŋi i da deemandaano yi ke, i na axa kisi ! ”
39 « “ An da a wari de ! Nke, n baane ya ni kamanen ŋa, kamane tana nta kafiini in ŋa. Nke ya n karindini, nke ya n birandindini, nke ya n joogindini, nke ya n sellandindini. Fo wo fo ra nta fo deemana in kitten ŋa. 40 N na in kitten wurugi katta kanmun ŋa nan kuna ti in jaatin ŋa : ‘ Nke ya ni abadanŋalinten ŋa. 41 N ga na in kaafan xenqu, n na a jaasu kiiten xanne maxa, n na in gajanlenmon yanganxata, ku beenu gaa in xonno, n na i tuga. 42 N na in bunnun minindi xonnon foren ŋa, na i tiyun do in xonnon jaman yinmankon yinkollon yigandi in kaafan ŋa. N na jooginton foron joxi, na seri raganton foron joxi. ’ ”
43 « Duna jamon wo, axa da a tiiga do i jaman batten ŋa, baawo a na i battaanon foren tanbon tugana ya, a da yanganxatan saagandi katta i teyinnun ŋa, nan xafarindi i ɲiiɲen do i seron danŋa. »
44 Muusa do Nuunu renme Yuusawu ri, na suuge ke digaamen su mugundi jaman ŋa. 45 Bire be Muusa ga duguta ku digaamu danmon su yi koono Banisirayilagankon da, 46 a jaabi i danŋa : « Ku digaamu beenu su n ga da i seedandi axa maxa yi lenki, xa da i raga axa sondomun ŋa, kuudo axa na axa renmun ɲaamari ti i ya, i na ke sariya digaamen su tanga, nan golli ti a yi. 47 Baawo digan duuru fe katta axa yi, xa, axa bireyen ya ni, axa wuyunun giiloono ti i ya yi ɲiiɲen kanma, ke ɲiiɲe be axa gaa Yaradefanŋe karana katta a yi kuudo na a mara. »
[Annabi Muusa segeye Bariimu giden kanma]
48 Ken koota yinme, Tunka Duumanten daali Muusa da : 49 « Sege Bariimu giden kanma, Neebo gide ke be gaa Mowaaba jamaanen ŋa, Yeriiho teŋo. An na Kanaana jamaanen faayi, n gaa ke be kinni Banisirayilaganko yi faabanxeye. 50 Ken falle an na faati gide ke kanma yi, nan kafi an seri fanon ŋa, xo an waaxi Haaruna ga faati Hoori giden kanma moxo be nan kafi i seri fanon ŋa. 51 Baawo, an do Haaruna da in sooxi Banisirayilaganko naxan ŋa ya Meriba jin ŋa, Xadesi yi, Siini gunjuran ŋa. Axa ma in senontaaxun bangandi Banisirayilaganko naxan a koota.* 52 N gaa jamaane ke be kinni Banisirayilaganko yi, an na a hacene ya, xa an nta roono. »